ព័ត៌មានជាតិ

ខេត្តកំពត ទទួលបានភ្ញៀវទេសចរប្រមាណជាង ៩ ម៉ឺននាក់ រយៈពេល ៣ ថ្ងៃ នៃពិធីបុណ្យភ្ជុំបិណ្ឌ

បានផុស

៣ years មុន

នៅ

ថ្ងៃចន្ទ ១៦ តុលា ២០២៣

ដោយ

នៅថ្ងៃទី ១៦ ខែតុលា ឆ្នាំ ២០២៣ នេះ លោក សយ ស៊ីណុល ប្រធានមន្ទីរទេសចរណ៍ខេត្តកំពត ប្រាប់ឲ្យដឹងថា ខេត្តកំពត រយៈពេល ៣ ថ្ងៃ នៃពិធីបុណ្យភ្ជុំបិណ្ឌ គិតចាប់ពីថ្ងៃទី ១៣ រហូតដល់ថ្ងៃទី ១៥ ខែតុលា ឆ្នាំ ២០២៣ ទទួលបានភ្ញៀវទេសចរជាតិ និងភ្ញៀវទេសចរអន្តរជាតិ ប្រមាណជាង ៩៥ ០០០ នាក់។ ហើយបើតាមការកត់សម្គាល់ឃើញថា ភ្ញៀវទេសចរច្រើនទៅលេងកម្សាន្តនៅរមណីយដ្ឋានតំបន់ដូងទេ និងតំបន់រមណីយដ្ឋាននានាទៀតក្នុងខេត្តកំពត កើនឡើងប្រមាណ ២៤ ភាគរយ ទៅ ៥២ ភាគរយ។

លោក សយ ស៊ីណុល បញ្ជាក់ថា បើគិតពីថ្ងៃទី ១៣ ដល់ថ្ងៃទី ១៥ ខែតុលា ឆ្នាំ ២០២៣ ដែលជាថ្ងៃប្រជាពលរដ្ឋទូទៅឈប់សម្រាកសម្រាប់ពិធីបុណ្យភ្ជុំបិណ្ឌប្រពៃណីជាតិខ្មែរ កំណើនភ្ញៀវទេសចរពីតាមបណ្ដារាជធានី-ខេត្ត មកលេងកម្សាន្តនៅខេត្តកំពតចំនួនប្រមាណជាង ៩៥ ៥៦៥ (ប្រាំបួនម៉ឺនប្រាំពាន់ប្រាំរយហុកសិបប្រាំនាក់) បានចូលសម្រាកដើរលេងកម្សាន្តលម្ហែតាមតំបន់ទេសចរណ៍ និងកន្លែងកម្សាន្តនានាក្នុងភូមិសាស្ត្រខេត្តកំពត។

លោកប្រធានមន្ទីរទេសចរណ៍ខេត្តកំពត លើកឡើងបន្តថា ឆ្នាំ ២០២៣ នេះ ឃើញថា កំណើនភ្ញៀវទេសចរមានការកើនឡើងប្រមាណ ២៤ ភាគរយ ទៅ ៥២ ភាគរយ។ លោកថា បើប្រៀបធៀបរយៈពេលដូចគ្នានៅក្នុងឆ្នាំ ២០២២ រហូតមកដល់បច្ចុប្បន្នក្នុងឆ្នាំ ២០២៣ នេះ ឃើញថា ភ្ញៀវទេសចរជាតិ និងភ្ញៀវទេសចរអន្តរជាតិ បានកើនឡើងជាង ២៤ ភាគរយ ទៅ ២៥ ភាគរយ នៅខេត្តកំពត។ ក្នុងនោះ ភ្ញៀវទេសចរជាតិចំនួន ៩៥ ៤២០ នាក់ និងភ្ញៀវទេសចរបរទេសមាន ១ ១៤៥ នាក់៕

អត្ថបទ ៖ សឹង រ៉ាត់