ព័ត៌មានជាតិ

រាជរដ្ឋាភិបាល ត្រៀមថវិកា ២៥០០លានដុល្លារ ដំឡើងបៀវត្សរ៍ដល់មន្ត្រីរាជការឆ្នាំ ២០២៤

បានផុស

៣ years មុន

នៅ

ថ្ងៃចន្ទ ៣០ តុលា ២០២៣

ដោយ

រដ្ឋាភិបាលកម្ពុជា ត្រៀមចំណាយថវិកាជាតិប្រមាណ ២៥០០លានដុល្លារ សម្រាប់ការបើក និងដំឡើងប្រាក់បៀវត្សរ៍ដល់មន្ត្រីរាជការ និងកងកម្លាំងប្រដាប់អាវុធ នៅឆ្នាំ ២០២៤។ នេះបើយោងតាមខ្លឹមសារសង្ខេបនៃសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៤ ផ្សព្វផ្សាយដោយក្រសួងសេដ្ឋកិច្ច និងហិរញ្ញវត្ថុ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសេចក្តីព្រាងច្បាប់ បានបញ្ជាក់ដូច្នេះថា «រដ្ឋាភិបាលគ្រោងចំណាយថវិកាជាតិសរុបចំនួន ៣៧ ១១០ ៤០៤ លានរៀល ដែលស្មើនឹងចំនួន ២៩,៩៦% នៃសមាមាត្រផលិតផលក្នុងស្រុកសរុប (ផ.ស.ស.) ដែលថយចុះជាងច្បាប់ថវិកា ឆ្នាំ២០២៣ ចំនួន ៥,៣%»។

សម្រាប់ថវិកាថ្នាក់ជាតិដែលត្រូវចំណាយនៅឆ្នាំ២០២៤ មានរង្វង់ ៣៤ ៤៩៧ ៤៤៤លានរៀល ស្មើនឹងអាត្រា ២៤,១៣% នៃផ.ស.ស. និងចំណាយចំនួន ៤ ៣៣១ ៨៧១ លានរៀល ទៅលើគម្រោងចំណាយថ្នាក់ក្រោមជាតិ ដែលស្មើនឹងអាត្រា ៣,០៣% នៃផ.ស.ស.។

ក្នុងនោះ គម្រោងចំណាយទៅលើបន្ទុកបុគ្គលិករដ្ឋ ឬប្រាក់បៀវត្សរ៍មន្ត្រីរាជការ និងកងកម្លាំងប្រដាប់អាវុធស្ថិតក្នុងរង្វង់ ១០ ២៥៤ ៩៦៧ លានរៀល ឬស្មើប្រមាណ ២,៥ ពាន់លានដុល្លារអាមេរិក បែងចែកជា ៣ ផ្នែក ក្នុងនោះមាន (ទី១) ការជ្រើសរើសមន្ត្រីក្របខ័ណ្ឌថ្មី ជំនួសអ្នកចូលនិវត្តន៍, (ទី២) ការដំឡើងបៀវត្សរ៍ជូនមន្ត្រីរាជការ និង (ទី៣) ការដំឡើងប្រាក់បំណាច់មុខងារ។

ខ្លឹមសារក្នុងសេចក្តីព្រាងច្បាប់បានបញ្ជាក់ទៀតថា រដ្ឋមានគោលបំណងបន្តអនុវត្តគោលនយោបាយដំឡើងប្រាក់បៀវត្សរ៍អប្បបរមាជូនមន្ត្រីរាជការ ប្រាក់បៀវត្សរ៍មូលដ្ឋានមន្ត្រីរាជការ និងកម្លាំងប្រដាប់អាវុធនៅឆ្នាំ២០២៤ ក្នុងរង្វង់អាត្រា ៥%។ ហើយរដ្ឋក៏នឹងផ្តល់បន្ថែមជូន ២២ ៥០០ រៀល សម្រាប់មន្រ្តីរាជការស៊ីវិល ដែលមានប្រាក់បំណាច់មុខងារក្នុងកម្រិតចាប់ពី ១ ១៣០ ០០០ រៀល ចុះក្រោម និងបន្ថែមជូន ២០ ០០០ រៀល សម្រាប់មន្រ្តីរាជការដែលមានប្រាក់បំណាច់មុខងារក្នុងកម្រិតចាប់ពី ១ ១៣០ ១០០ រៀល ឡើងទៅ។

ចំពោះការផ្តល់បន្ថែមជូន ២៥ ០០០ រៀល សម្រាប់មន្រ្តីនគរបាលជាតិ និងយោធិន ដែលមានប្រាក់បំណាច់មុខងារ ក្នុងកម្រិតចាប់ពី ៩៦០ ០០០ រៀល ចុះក្រោម និងបន្ថែមជូន ២០ ០០០ រៀល សម្រាប់មន្រ្តីនគរបាលជាតិ និងយោធិន ដែលមានប្រាក់បំណាច់មុខងារក្នុងកម្រិតចាប់ពី ៩៦០ ១០០ រៀលឡើងទៅ។ ចំណែកមន្រ្តីជាប់កិច្ចសន្យា ក៏នឹងត្រូវបានដំឡើងពី ៧១ ម៉ឺនរៀល ទៅដល់ ៧៧ ម៉ឺនរៀលផងដែរ៕