មកដឹងពីការគណនាពន្ធត្រូវបង់លើដីធ្លីមិនប្រើប្រាស់

ពន្ធលើដីធ្លីមិនបានប្រើប្រាស់ ត្រូវកំណត់តាមអត្រា ២ ភាគរយ នៃតម្លៃអចលនទ្រព្យ។ មូលដ្ឋានកំណត់ពន្ធ គឺជាថ្លៃដី គិតតាមថ្លៃទីផ្សារ តាមទីក្រុង និងតាមតំបន់នីមួយៗ ដែលវាយតម្លៃទៅតាមតម្លៃគិតក្នុងមួយម៉ែត្រក្រឡា ដែលកំណត់ ដោយគណៈកម្មការវាយតម្លៃដីមិនបានប្រើប្រាស់។

លោក ប៉ែន ពេជ្រដារ៉ូ អនុប្រធានការិយាល័យ នៃនាយកដ្ឋានពន្ធដាចលនទ្រព្យ និងអចលនទ្រព្យនៃអគ្គនាយកដ្ឋានពន្ធ ដារ បានបង្ហាញអំពីការគណនាប្រាក់ពន្ធត្រូវបង់សម្រាប់ការិយបរិច្ឆេទមុនឆ្នាំ ២០០៧៖ ប្រាក់ពន្ធត្រូវបង់ = (ផ្ទៃដីសរុប – ១ ២០០ម២) x មូលដ្ឋានកំណត់ពន្ធ x អត្រាពន្ធ។

ការគណនាប្រាក់ពន្ធត្រូវបង់សម្រាប់ការិយបរិច្ឆេទចាប់ពីឆ្នាំ២០០៧៖ ប្រាក់ពន្ធត្រូវបង់ = ផ្ទៃដីសរុប x មូលដ្ឋានកំណត់ ពន្ធ x អត្រាពន្ធ។

ថ្លែងក្នុងសិក្ខសាលា កាលពីថ្ងៃទី ៣១ ខែតុលា លោក ប៉ែន ពេជ្រដារ៉ូ បានលើកឧទាហរណ៏មកបញ្ជាក់បន្ថែមថា លោក “ក” មានដីធ្លីមិនប្រើប្រាស់មួយកន្លែងទំហំ ៩ ០០០ ម៉ែត្រក្រឡា។ តម្លៃមូលដ្ឋានគិតពន្ធដែលកំណត់ដោយគណៈកម្មការ វាយតម្លៃដីមិនបានប្រើប្រាស់គឺ ១៥ ០០០៛/ម^២។ ដូច្នេះប្រាក់ពន្ធត្រូវបង់គឺ = ៩ ០០០ម^២ x ១៥ ០០០៛ x ២% = ២ ៧០០ ០០០ រៀល។

សូមបញ្ជាក់ថា ដីធ្លីមិនបានប្រើប្រាស់ ជាប្រភេទដីទាំងឡាយណាដែលពុំមានលក្ខណៈណាមួយនៃលក្ខណៈទាំងនេះ ដូចដូចជា៖ ដីមានសំណង់ស្ថិតនៅក្នុងតំបន់លំនៅដ្ឋាន, ដីជួលដែលមានសំណង់មានការកាន់កាប់, ដីដែលមាន សកម្ម ភាពសេដ្ឋកិច្ចស្របតាមការកំណត់តំបន់របស់រដ្ឋ, ដីជាកម្មសិទ្ធិរបស់រដ្ឋ ដែលបានជួលឱ្យទៅនីតិបុគ្គល ឬរូបវន្ត បុគ្គល, និងដីដែលស្ថិតនៅក្រោមកិច្ចព្រមព្រៀងវិនិយោគ៕

អត្ថបទ៖ ផល ធារិត