ព័ត៌មានជាតិ

ឃុំខ្លួនមេការក្រុមហ៊ុនលក់រថយន្ត ស៊ីដាច់ប្រាក់ជាង១លានដុល្លារ

បានផុស

៥ years មុន

នៅ

ថ្ងៃចន្ទ ៨ កុម្ភៈ ២០២១

ដោយ

ចៅក្រមសាលាដំបូងរាជធានីភ្នំពេញ លោក ឡុង វណ្ណា បានចេញដីកាសម្រេចឃុំខ្លួនបុរសម្នាក់ ដាក់ពន្ធធនាគារជាបណ្ដោះអាសន្ន ក្រោមការចោទប្រកាន់ពីបទ « រំលោភលើទំនុកចិត្ត បទក្លែងបន្លំ និងប្រើប្រាស់លិខិតក្លែង » ។

ជនត្រូវចោទដែលតុលាការឃុំខ្លួនឈ្មោះ ហ៊ាង សុងហេង អាយុ២៧ឆ្នាំ ជាមេការក្រុមហ៊ុនលក់រថយន្តរបស់ចិនមួយ មានលំនៅស្ថានលេខ៤៩T ផ្លូវលេខ១ សង្កាត់ដង្កោ ខណ្ឌដង្កោ ត្រូវបានចាប់ខ្លួននិងដាក់ឲ្យស្ថិតក្រោមការត្រួតពិនិត្យតាមផ្លូវតុលាការពីបទ « រំលោភលើទំនុកចិត្ត បទក្លែងបន្លំ និងប្រើប្រាស់លិខិតក្លែង » ប្រព្រឹត្តកាលពីឆ្នាំ២០១៩ បទល្មើសដែលមានចែងឲ្យផ្ដន្ទាទោសតាមមាត្រា ៦២៦ , ៦២៧ , ៦២៨ នៃក្រមព្រហ្មទណ្ឌ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធការចាប់ឃុំខ្លួនជនជាប់ចោទខាងលើនេះ ប្រភពព័ត៌មានពីសាលាដំបូងបានឲ្យដឹងថា កាលពីអំឡុងឆ្នាំ២០១៩ មានក្រុមហ៊ុនចិនមួយលក់រថយន្តបានផ្ដល់ទំនុកចិត្តឲ្យឈ្មោះ ហ៊ាង សុងហេង ធ្វើជាមេការក្រុមហ៊ុនកាន់កាប់បញ្ជីស្នាមលក់រថយន្តនិងគ្រប់គ្រងលុយកាក់ ។ លុះក្រោយមកក្រុមហ៊ុនមានការសង្ស័យក៏បានពិនិត្យបញ្ជីស្នាមរកឃើញថា មានការបាត់លុយលក់រថយន្តជាង១លានដុល្លារ ទើបក្រុមហ៊ុនប្ដឹងឲ្យសមត្ថកិច្ចឃាត់ខ្លួនឈ្មោះ ហ៊ាង សុងហេង ហើយបញ្ជូនមកសាលាដំបូង។

ក្នុងនោះក្រោយការសាកសួរ លោក ម៉ុត ដារា ព្រះរាជអាជ្ញារងអមតុលាការបានសម្រេចចោទប្រកាន់ ហ៊ាង សុងហេង ពីបទ « រំលោភលើទំនុកចិត្ត បទក្លែងបន្លំ និងប្រើប្រាស់លិខិតក្លែង »ហើយបញ្ជូនអោយចៅក្រមសើបសួរចាត់ការបន្ត ។ បន្ទាប់លោក ឡុង វណ្ណា ចៅក្រមស៊ើបសួរបានចេញដីកាសម្រេចឃុំខ្លួនឈ្មោះ ហ៊ាង សុងហេង ដាក់ពន្ធនាគារជាបណ្ដោះអាសន្ន ដើម្បីរង់ចាំការសម្រេចជាថ្មីពីតុលាការ៕

អត្ថបទ៖ មករា

សូមចុចអាន៖ ស្នងការខេត្តតាកែវបញ្ជូនជនសង្ស័យគ្រឿងញៀនពីរនាក់ទៅតុលាការ