​ទីផ្សារគោរស់បន្តជាប់គាំង​ដោយសារតម្លៃចុះថោក​

ទីផ្សារតម្លៃគោរស់ស្ទើរតែទូទាំងប្រទេសនៅតែស្ថិតក្នុងកម្រិតទាប ខណៈកសិករត្អូញត្អែរពីតម្លៃ​ធ្លាក់​ចុះ​។

លោក ឆេង ពិសិដ្ឋ កសិករចិញ្ចឹមគោ នៅស្រុកត្រពាំងប្រាសាទ ខេត្តឧត្តរមានជ័យបានប្រាប់ថា​ នៅតំបន់របស់លោក តម្លៃសាច់គោនៅលើទីផ្សារក្នុងរង្វង់ ២៨ ០០០ រៀល ទៅ ៣០ ០០០ រៀល/គីឡូ ខណៈតម្លៃគោរស់នៅតែទាបដដែលក្នុងរយៈពេលប្រមាណជិត ១ ឆ្នាំកន្លងមកនេះ។

​លោកថា ពីមុនគោរស់មួយក្បាលធ្លាប់តែលក់បានតម្លៃជាង ៣ លានរៀល ឥឡូវធ្លាក់មកនៅជាង ១ លាន ទៅ ២ លានរៀលប៉ុណ្ណោះ ​ខណៈតម្លៃនៅលើទីផ្សារនៅតែថ្លៃដដែល។

​បើតាមកសិកររូបនេះយល់ថា ​ការធ្លាក់ចុះ ដោយសារការនាំចូលគោពីស្រុកគេ និងសាច់បង្កកច្រើន លើសលុបដែលជាដើមចមធ្វើឱ្យតម្លៃសាច់ក្នុងស្រុកធ្លាក់ចុះ។ កត្តាមួយទៀត ដោយសារសេដ្ឋកិច្ច ដែលបណ្ដាលមកពីកូវីដ រហូតដល់មានសង្គ្រាមរុស្ស៊ី-អ៊ុយក្រែន។

លោក ស្រ៊ុន ពៅ ​ប្រធានសមាគមចិញ្ចឹមសត្វកម្ពុជា បានឱ្យដឹងថា តម្លៃគោបន្តធ្លាក់ចុះដោយសារ​សាច់បង្កកនាំចូលមកពីឥណ្ឌាចរាចរណ៍នៅស្រុកខ្មែរ ១ គីឡូតែ ២ ម៉ឺនរៀល។​

​លោក ស្រ៊ុន ពៅថា៖«គោយើងស្រស់ យើងលក់បានដល់ទៅ ៣ ម៉ឺនជាង ​ឥឡូវនេះ ៣ ម៉ឺនជាង គេអត់​ញាំទេ គេញាំ ២ ម៉ឺន អញ្ចឹងហើយធ្វើឱ្យគោនៅកម្ពុជាកកស្ទះច្រើន»។

​លោក ស្រ៊ុន ពៅ បានបន្តថា ឥឡូវប្រទេសវៀតណាម មិនទិញគោខ្មែរទៀត ហើយបើទិញឱ្យ​តម្លៃទាប ខណៈវៀត​ណាម​ទិញពីប្រទេសថៃទៅវិញឆ្លងកាត់កម្ពុជា។ ហើយថាគោរស់បច្ចុប្បន្នលក់បាន ៧ ០០០ ទៅ ៨០០០ រៀល ខណៈដើមផលិតប្រមាណ ១ ម៉ឺនរៀល។

លោក ស្រ៊ុន ពៅបន្ថែមថា៖ «កសិករដល់ពេលធ្លាក់ថ្លៃ គាត់ក៏អត់លក់ គាត់អាងថា គោស៊ីស្មៅ តាមស្ថិតិគោកកស្ទះប្រមាណ ៨ លានក្បាលច្រើនណាស់»។​

​បើតាមប្រធានសមាគមរូបនេះ ​ដើម្បីឱ្យតម្លៃគោល្អប្រសើរឡើងវិញ ​រដ្ឋាភិបាលត្រូវ​ទប់ស្កាត់ការ​នាំ​ចូល​សាច់បង្កកខុសច្បាប់ឱ្យបាន៕