​ផ្ទះ ១២ ខ្នងប៉ះពាល់ដោយសារទឹកហូរច្រោះបាក់ស្រុតផ្លូវបេតុងជាប់មាត់ច្រាំងស្ទឹងព្រែកត្នោត ៧០ ម៉ែត្រ

ក្រុមការងារបច្ចេកទេស នៃ​នាយកដ្ឋានជលសាស្ត្រ និងការងារទន្លេ ក្រសួងធនធានទឹក និងឧតុនិយមបានឱ្យដឹងថា ករណីបាក់ស្រុតផ្លូវបេតុងជាប់មាត់ច្រាំងស្ទឹងព្រែកត្នោតនៅថ្ងៃទី ១០ ខែវិច្ឆិកា មានប្រវែង​៧០ ម៉ែត្រ​ បាន​ប៉ះពាល់​ដល់ផ្លូវបេតុង និងផ្ទះ១២ខ្នង។

ក្រុមការងារបច្ចេកទេស នៃ​នាយកដ្ឋានជលសាស្ត្រ និងការងារទន្លេ ក្រសួងធនធានទឹក និងឧតុនិយម​ នៅថ្ងៃទី១០ ខែវិច្ឆិកា ឆ្នាំ ២០២៣ បាន​ចុះពិនិត្យ​ផ្ទាល់​​ ច្រាំងស្ទឹងព្រែកត្នោតដែលបាក់ស្រុតផ្តាច់ផ្លូវបេតុង និងស្រុតផ្ទះជាប់មាត់ច្រាំង ក្នុងភូមិព្រែកតាពៅ សង្កាត់ដើមមាន ក្រុងតាខ្មៅ ខេត្តកណ្តាល។

បើតាមក្រុមការងារបានឱ្យដឹងថា​៖ ទីតាំងច្រាំងស្ទឹងព្រែកត្នោតដែលបាក់ស្រុតនេះមានប្រវែង​៧០ ម៉ែត្រ​ បាន​ប៉ះពាល់​ដល់ផ្លូវបេតុង និងផ្ទះ១២ខ្នង។ ដោយឡែកកាលពីឆ្នាំមុនមានការបាក់ស្រុត​ប្រវែង ៦៥ ម៉ែត្រ សរុបបាក់ស្រុតទាំងថ្មីនិងចាស់ ប្រវែងប្រមាណ ១៣៥ម៉ែត្រ។

ក្រុមការងារបញ្ជាក់ថា​ កត្តាដែលបណ្តាលឱ្យមានការបាក់ស្រុតច្រាំងនេះ ដោយសារ​ទីតាំងព្រែកកោង ចរន្ត​ទឹកហូរបុ​កចំម្ខាងនិងដុះដីម្ខាង ទឹកក្រោមដីហូរច្រោះ និងលូចំកណ្តាលផ្លូវអាចជ្រាបទឹក​ចេញ​ពី​លូ​តាម​តំណ ហើយ​ទុយោទឹកស្អាតបានបាក់ និងកំពុងហូរច្រោះ។

ក្រុមការងារបច្ចេកទេសនឹងសិក្សាវិធានការការពារច្រាំងនេះ​ ដើម្បីទប់ស្កាត់ការបាក់តទៅទៀត៕