ពន្ធដារដាក់ឱសានវាទដល់គ្រឹះស្ថានហិរញ្ញវត្ថុទាំងអស់បញ្ជូនរបាយការណ៍គណនីជនជាតិអាមេរិកទៅអាជ្ញាធរចំណូលផ្ទៃក្នុង ត្រឹមថ្ងៃទី៣០ ខែមិថុនា ​

គ្រប់​គ្រឹះស្ថាន​ហិរញ្ញវត្ថុ​ទាំង​អស់​ដែល​មាន​កាតព្វកិច្ច​បញ្ជូន​របាយការណ៍​គណនីជនជាតិអាមេរិក ត្រូវបញ្ជូន​របាយការណ៍​ឱ្យ​ទទួល​បានលទ្ធផលមានទម្រង់ត្រឹមត្រូវ និងគ្មានកំហុស ទៅ​អាជ្ញាធរ​ផ្ទៃ​ក្នុង​អាមេរិក​ឱ្យបានត្រឹមថ្ងៃទី៣០ ខែមិថុនា ឆ្នាំ២០២៥ ជាកំហិត។

តាម​រយៈ​សេចក្តី​ជូន​ដំណឹង​របស់​អគ្គនាយកដ្ឋាន​ពន្ធដារ ចុះ​នៅថ្ងៃទី០២ ខែឧសភា ឆ្នាំ២០២៥ នេះ​ បាន​ឱ្យ​ដឹង​ថា យោង​តាមប្រកាសលេខ ១៤៥៩ សហវ.ប្រក ចុះថ្ងៃទី៣១ ខែធ្នូ ឆ្នាំ២០១៩ ស្តីពី​ការអនុវត្ត កិច្ចព្រមព្រៀង FATCA គ្រឹះស្ថានហិរញ្ញវត្ថុ​ទាំងអស់​តម្រូវ​ឱ្យបញ្ជូន​របាយការណ៍គណនីជនជាតិអាមេរិកដែលត្រូវរាយការណ៍ សម្រាប់ឆ្នាំប្រតិទិន២០២៤ ទៅអាជ្ញាធរចំណូល​ផ្ទៃក្នុងសហរដ្ឋអាមេរិក (U.S. Internal Revenue Service IRS)។

ក្នុង​នោះ​ គ្រឹះស្ថានហិរញ្ញវត្ថុ​ទាំងអស់ ត្រូវពិនិត្យ និងផ្ទៀងផ្ទាត់របាយការណ៍ U.S. Reportable Accounts នេះ តាមទម្រង់ និងបទដ្ឋានរបស់ IRS ឱ្យបានត្រឹមត្រូវ​មុននឹង​បញ្ជូន​របាយការណ៍​ទៅ​ក្នុង​ប្រព័ន្ធ​បញ្ជូន​របាយការណ៍ IDES Gateway ដោយ​អគ្គនាយកដ្ឋាន ពន្ធដារ​នឹងសម្របសម្រួលបញ្ជូនរបាយការណ៍នេះបន្តទៅ IRS។

អគ្គនាយកដ្ឋានពន្ធដារ បាន​សង្កត់​ធ្ងន់​ថា «គ្រឹះស្ថាន​ហិរញ្ញវត្ថុ​ទាំងអស់ដែលមានកាតព្វកិច្ចរាយការណ៍ ត្រូវ​បញ្ជូន​របាយការណ៍​ឱ្យទទួលបានលទ្ធផលមានទម្រង់ត្រឹមត្រូវ និង​គ្មាន​កំហុស ឱ្យបានត្រឹមថ្ងៃទី៣០ ខែមិថុនា ឆ្នាំ២០២៥ ជាកំហិត»។

ក្នុង​ករណី​ពុំមានការបញ្ជូន​របាយការណ៍ ឬ​មាន​កំហុស និង​ហួស​កាល​កំណត់ គ្រឹះស្ថាន​ហិរញ្ញវត្ថុ​ទាំងអស់​ដែល ស្ថិត​នៅ​ក្រោម​កាតព្វកិច្ច​រាយការណ៍​អនុលោម​តាម​កិច្ចព្រមព្រៀង FATCA ត្រូវទទួលខុសត្រូវដោយ​ខ្លួនឯង​ចំពោះ​ការពិន័យ ទោស​ទណ្ឌនានា ដោយ​អនុលោមតាមកិច្ចព្រមព្រៀង FATCA នេះ មាត្រា២២៥ និង​មាត្រា​២៣៥ នៃច្បាប់ស្តីពីសារពើពន្ធ ព្រមទាំង​ត្រូវបន្តបញ្ជូន​របាយការណ៍​នេះ​រហូតទទួល​បាន​លទ្ធផល​មានទម្រង់​ត្រឹមត្រូវ និងគ្មានកំហុស។

អគ្គនាយកដ្ឋានពន្ធដារ ក៏​បញ្ជាក់​ដែរថា ធនាគារ សហគ្រាសធានារ៉ាប់រង គ្រឹះស្ថាន មីក្រូហិរញ្ញវត្ថុ ក្រុមហ៊ុនមូលបត្រ និងស្ថាប័នប្រហាក់ប្រហែលដទៃទៀត អាចចូលទៅកាន់គេហទំព័រ fatca.gov.kh ដើម្បីទាញ យក HCTA Public Key, IRS Public Key និងទទួលបានព័ត៌មានទាក់ទិននឹងតម្រូវការ FATCA របស់ IRS។

អគ្គនាយកដ្ឋានពន្ធដារ ជឿជាក់យ៉ាងមុតមាំថា គ្រឹះស្ថានហិរញ្ញវត្ថុទាំងអស់នឹងចូលរួមអនុវត្តតាមខ្លឹមសារ នៃសេចក្តីជូនដំណឹងនេះប្រកបដោយការទទួលខុសត្រូវ និងប្រសិទ្ធភាពខ្ពស់៕