ក្រោយដាក់ចេញ«ផែនការពិសេស»មានក្រុមហ៊ុនអាកាសចរណ៍ជាច្រើន​បន្ថែមជើងហោះហើរទៅមករវាងកម្ពុជា-ចិន

លោក ស៊ីន ចាន់សេរីវុត្ថា អនុរដ្ឋលេខាធិការ និងជាអ្នកនាំពាក្យអាកាសចរស៊ីវិលកម្ពុជា បានឱ្យដឹងថា ស្របពេល ដែលពិធីបុណ្យចូលឆ្នាំចិន និងការផ្លាស់ប្តូរទំនាក់ទំនងរវាងប្រជាជនចិន-កម្ពុជាឆ្នាំ ២០២៤ កំពុងខិតជិតមកដល់ ក្រុមហ៊ុនអាកាសចរណ៍មួយចំនួនបានប្រកាសពីការបន្ថែមជើងហោះហើររវាងប្រទេសចិន និងកម្ពុជាចាប់ពីខែធ្នូ តទៅ ដើម្បីសម្រួលដល់ការធ្វើដំណើររបស់ជនជាតិចិន ភ្ញៀវទេសចរណ៍អន្តរជាតិ និងអ្នកវិនិយោគ ដែលទៅសួរ​សុខទុក្ខ​សាច់ញាតិ និងការធ្វើដំណើរកម្សាន្ត ការធ្វើទស្សនកិច្ចអាជីវកម្មរវាងប្រទេសទាំងពីរ។

លោក Zhou Yingping អ្នកគ្រប់គ្រងទូទៅផ្នែកលក់នៅភ្នំពេញរបស់ក្រុមហ៊ុនអាកាសចរណ៍ China Southern Airlines បានលើកឡើងថា ក្រុមហ៊ុនអាកាសចរណ៍ China Southern Airlines នឹងបន្ថែមជើងហោះ​ហើរត្រង់មកកាន់ប្រទេសកម្ពុជាចំនួន ៤ ជើងក្នុងមួយសប្តាហ៍ ដោយផ្អែកលើមូលដ្ឋាននៃជើងហោះហើរដើមចំនួន ២ ជើងក្នុងមួយថ្ងៃ ដើម្បីលើកកម្ពស់កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងការផ្លាស់ប្តូរវប្បធម៌រវាងចិន និងកម្ពុជា។

លោក ស៊ីន ចាន់សេរីវុត្ថា បានគូសបញ្ជាក់ថា ចាប់ពីខែធ្នូតទៅ ជើងហោះហើរក្វាងចូវ-ភ្នំពេញ របស់ក្រុមហ៊ុន​អាកាស​ចរណ៍ China Southern Airlines ជើងហោះហើរ CZ6059 និង CZ323 នឹងដំណើរការមួយថ្ងៃម្តង។ បន្ថែមថ្មីនូវជើងហោះហើរក្វាងចូវ-ភ្នំពេញ CZ8313 នឹងដំណើរការមួយថ្ងៃម្តង រៀងរាល់ថ្ងៃចន្ទ ពុធ សុក្រ និងថ្ងៃ​អាទិត្យ។ នៅពេលនោះ ក្រុមហ៊ុនអាកាសចរណ៍ China Southern Airlines នឹងមានជើងហោះ​ហើរប្រចាំ​សប្តាហ៍ចំនួន ៣៦ ជើងរវាងទីក្រុងក្វាងចូវ និងរាជធានីភ្នំពេញ។

ដោយឡែក ក្រុមហ៊ុនអាកាសចរណ៍ ខេមបូឌា អ៊ែរឡាញ នឹងបើកដំណើរការជើងហោះហើរទៅមកពីភ្នំពេញទៅជីណាន ខេត្តសានទុង នៅថ្ងៃទី២៣ ខែធ្នូ។ ក្នុងចំណោមនោះ ជើងហោះហើរពីជីណានមកភ្នំពេញ នឹងធ្វើដំណើរ នៅម៉ោង ១៥:០០នាទី រៀងរាល់ថ្ងៃសៅរ៍ ហើយមកដល់ភ្នំពេញនៅម៉ោង ១៨:៥៥នាទី ម៉ោងក្នុងស្រុក។ ចំពោះនៅឆ្នាំ ២០២៤ ក្រុមហ៊ុនអាកាសចរណ៍ ខេមបូឌា អ៊ែរវ៉េ ក៏មានគម្រោងបើកជើងហោះហើរថ្មីពីភ្នំពេញទៅ ហៃគូ ហៃណាន និងសាន់យ៉ា ផងដែរ។ នេះជាការបន្ថែមរបស់លោក ស៊ីន ចាន់សេរីវុត្ថា។

ចំពោះតារាងជើងហោះហើរចុងក្រោយបំផុតដែលចេញផ្សាយដោយក្រុមហ៊ុនអាកាសចរណ៍ Lanmei Airlines ក្នុងខែនេះ បានបង្ហាញថា ក្រុមហ៊ុនបើកដំណើរការជើងហោះហើរចំនួន៦ ក្នុងមួយសប្តាហ៍ ពីប្រទេសចិនមក កាន់ទីក្រុងភ្នំពេញ។ ចាប់ពីខែវិច្ឆិកាដល់ខែធ្នូ ក្រុមហ៊ុនអាកាសចរណ៍ China Eastern Airlines នឹងមាន​ជើងហោះហើរត្រង់ ពីសៀងហៃមកភ្នំពេញក្នុងមួយថ្ងៃមួយជើង និងជើងហោះហើរត្រង់ពីគុនមីងមកសៀមរាប ក្នុងមួយសប្តាហ៍ពីរជើង។ ក្រុមហ៊ុន Air China បើកដំណើរការជើងហោះហើរពីប៉េកាំងមកភ្នំពេញ ក្នុងមួយ​សប្តាហ៍បីជើង។

បច្ចុប្បន្ន ចិនមានជើងហោះហើរត្រង់មកកម្ពុជា រួមមានមកពីទីក្រុងប៉េកាំង សៀងហៃ ក្វាងចូវ ណាននីង ឆេងទូ គុនមីង និងកន្លែងផ្សេងៗទៀត។

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ក្នុងកិច្ចប្រជុំកាលពីថ្ងៃទី១៣ វិច្ឆិកាថា រដ្ឋាភិបាលកម្ពុជានឹងដាក់ចេញនូវផែនការពិសេស «ទស្សនាសៀមរាបឆ្នាំ២០២៤» ដើម្បីស្តារវិស័យទេសចរណ៍​របស់ប្រទេសឡើងវិញ។ សម្តេច ក៏បានបញ្ជាឲ្យសមត្ថកិច្ចពាក់ព័ន្ធត្រូវបង្ក្រាបរាល់សកម្មភាពឧក្រិដ្ឋកម្ម ដើម្បីស្តារកេរ្តិ៍​ឈ្មោះ​របស់​ប្រទេស និងស្តារទំនុកចិត្តរបស់ភ្ញៀវទេសចរឡើងវិញផងដែរ៕