​រដ្ឋាភិបាលត្រៀមរៀបចំ​សហគមន៍កសិកម្មទំនើប​នូវដំណាំយុទ្ធសាស្ត្រ ៤ ​ប្រភេទ​

រាជរដ្ឋាភិបាលកម្ពុជាជំរុញបង្កើតសហគមន៍កកសិកម្មទំនើប ដើម្បីផ្ដល់ប្រយោជនដល់ប្រជាកសិករឱ្យទទួលបានការគាំទ្រផ្នែកបច្ចេកទេស ហេដ្ឋារចនាសម្ព័ន្ធ និងមធ្យោបាយផលិតកម្មទំនើប​ និងការទទួលបានឥណទានការប្រាក់ទាបក្នុងការកាត់បន្ថយថ្លៃដើមផលិតកម្មអាចប្រកួតប្រជែកជាមួយប្រទេសជិតខាង។

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងនៅក្នុងពិធីប្រកាសដាក់ឱ្យអនុវត្តនូវកម្មវិធីនយោបាយអាទិភាពទី ៥ និងទី ៦ របស់រាជរដ្ឋាភិបាល ស្ដីពីការលើកស្ទួយផលិតផលកសិកម្មថា នៅដំណាក់កាលដំបូង ក្រសួងកសិកម្មត្រៀមរៀបចំសហគមន៍កសិកម្មទំនើបសម្រាប់ដំណាំយុទ្ធសាស្ត្រចំនួន ៤ រួមមាន បន្លែ ស្រូវ ស្វាយចន្ទី និងម្រេច។

លោក ឌិត ទីណា អះអាងថា សហគមកសិកម្មបច្ចុប្បន្នជួបបញ្ហាប្រឈម ដូចជាកង្វះដើមទុន ការដឹកនាំ ឥណទានការប្រាក់ទាប ចង្វាក់ផលិតកម្មថ្លៃដើមខ្ពស់ជាដើម។

រាជរដ្ឋាភិបាលនៅថ្ងៃទី ២០ ខែវិច្ឆិកា ឆ្នាំ ២០២៣ ​បានប្រកាសដាក់ឱ្យអនុវត្តជាផ្លូវការនូវកម្មវិធីនយោបាយអាទិភាពទី ៥ និងទី ៦ ការលើកស្ទួយផលិតផលកសិកម្ម រកទីផ្សារ និងរក្សាលំនឹងថ្លៃកសិផលតាមរយៈកម្មវិធីហិរញ្ញប្បទាន ការដាក់ពង្រាយមន្ត្រីកសិកម្មឃុំ សង្កាត់ និងការអភិវឌ្ឍសហគមន៍កសិកម្មទំនើប៕