ព័ត៌មានជាតិ

លោក ឌិត ទីណា៖ ការបង្កើតសហគមន៍កសិកម្មទំនើបរួមចំណែកផ្ដល់ផលប្រយោជន៍ដល់កសិករ

បានផុស

៣ years មុន

នៅ

ថ្ងៃអង្គារ ២១ វិច្ឆិកា ២០២៣

ដោយ

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានគូសបញ្ជាក់ថា ការបង្កើតសហគមន៍កសិកម្មទំនើបនៅតាមបណ្ដាសហគមន៍រាជធានី-ខេត្ត បានរួមចំណែកយ៉ាងសំខាន់ក្នុងការផ្តល់ផលប្រយោជន៍ជាច្រើនដល់ប្រជាកសិករនៅក្នុងសហគមន៍។ លោកបានលើកឡើងបែបនេះក្នុង “កម្មវិធីគោលនយោបាយអាទិភាពទី៥ និងទី៦ របស់រាជរដ្ឋាភិបាល នីតិកាលទី៧ នៃរដ្ឋសភា” នាព្រឹកថ្ងៃទី២០ ខែវិច្ឆិកា ឆ្នាំ២០២៣នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឌិត ទីណា មានប្រសាសន៍ថា ដោយពិនិត្យឃើញថាសហគមន៍កសិកម្មនាពេលបច្ចុប្បន្នប្រឈមនឹងបញ្ហាជាច្រើន តាំងពីបញ្ហាកង្វះដើមទុន ការដឹកនាំ កង្វះឥណទានក្នុងការប្រាក់ទាប ចង្វាក់ផលិតកម្ម និងការផលិតមានថ្លៃដើមខ្ពស់ និងបញ្ហាទីផ្សារ ដូច្នេះរាជរដ្ឋាភិបាលកម្ពុជា មានទស្សនៈទានជំរុញឲ្យបង្កើតសហគមន៍កសិកម្មទំនើបដែលមានកម្រិតសមាហរណកម្មខ្ពស់ ប្រមូលផ្តុំប្រជាកសិករ ក្រោមយន្តការផលិតកម្មកសិកម្មតែមួយ សំដៅធ្វើយ៉ាងណាឲ្យមានសេដ្ឋកិច្ចមាត្រដ្ឋាន។

លើសពីនេះទៀត ការបង្កើតសហគមន៍កសិកម្មទំនើបនេះ គឺបានរួមចំណែកនិងផ្ដល់ផលប្រយោជន៍ជាច្រើនដល់ប្រជាកសិករ ដោយក្នុងនោះកសិករទទួលបានដូចជា ការគាំទ្រផ្នែកបច្ចេកទេស ហេដ្ឋារចនាសម្ពន្ធ និងមធ្យោបាយផលិតកម្ម ទំនើប ការពិភាក្សាយោបល់ និងការគ្រប់គ្រងមុខជំនាញ ទទួលបានឥណទានការប្រាក់ទាបសំដៅធ្វើយ៉ាងណាជួយកាត់បន្ថយថ្លៃដើមផលិតកម្មឲ្យមានប្រសិទ្ធភាពខ្ពស់អាចប្រកួតប្រជែងនៅលើទីផ្សារនៃប្រទេសដទៃទៀតបាន។

ជាក់ស្ដែង ចាប់តាំងពីឆ្នាំ២០០៣ រហូតមកដល់ពេលបច្ចុប្បន្ននេះ កម្ពុជាមានសហគមន៍កសិកម្មប្រមាណជា ១២៥១ ក្នុងនោះមានសមាជិកសរុប ១៧ម៉ឺននាក់។ ប៉ុន្តែ ចំណោមសហគមន៍សរុបទាំងអស់ សហគមន៍កសិកម្មរឹងមាំគឺមានតែ ២១៧សហគមន៍ប៉ុណ្ណោះ។ ហើយសហគមន៍ទាំងអស់មានដើមទុនសរុប ២៦លានដុល្លារ បើគិតជាមធ្យមភាគ គឺមានតែ ២ម៉ឺនដុល្លារ ក្នុងមួយសហគមន៍។

បន្ថែមពីនេះ លោក ឌិត ទីណា បានអះអាងដែរថា នៅក្នុងដំណាក់កាលដំបូង នៃកម្មវិធីគោលនយោបាយអាទិភាពទី៥ និងទី៦ របស់រាជរដ្ឋាភិបាល នីតិកាលទី៧ នៃរដ្ឋសភា ក្រសួងកសិកម្ម រុក្ខប្រមាញ់ និងនេសាទ ក៏បានត្រៀមរៀបចំសហគមន៍កសិកម្មទំនើប សម្រាប់ដំណាំយុទ្ធសាស្ត្រចំនួន ៤ ដែលរួមមាន បន្លែ ស្រូវ ស្វាយចន្ទី និងម្រេច ផងដែរ៕