លោក នេត សាវឿន ណែនាំកងកម្លាំងចម្រុះ រួមគ្នាការពារសន្តិសុខក្នុងព្រះរាជពិធីបុណ្យអុំទូកឱ្យបានល្អប្រសើរ

ក្នុងឱកាសដឹកនាំកិច្ចប្រជុំផែនការការពារសន្តិសុខក្នុងព្រះរាជពិធីបុណ្យអុំទូក លោកឧបនាយករដ្ឋមន្ត្រី នេត សាវឿន ណែនាំកងកម្លាំងប្រដាប់អាវុធ និងអាជ្ញាធរពាក់ព័ន្ធទាំងអស់ ត្រូវរួមដៃគ្នាការពារសន្ដិសុខ សណ្ដាប់ធ្នាប់ និងសុវត្ថិភាពក្នុងព្រះរាជពិធីបុណ្យអុំទូកនេះឱ្យខាងតែបាន ខណៈកម្លាំងចម្រុះជាង១ម៉ឺននាក់ នឹងត្រូវដាក់ពង្រាយ។

ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលរៀបចំឡើងនៅតាមដងទន្លេចតុមុខ នារាជធានីភ្នំពេញ នឹងប្រព្រឹត្តទៅរយៈពេល៣ថ្ងៃ ចាប់ពីថ្ងៃទី២៦ ដល់ថ្ងៃទី២៨ ខែវិច្ឆិកា ឆ្នាំ២០២៣ ខាងមុខនេះ។ បើតាមលោកឧបនាយករដ្ឋមន្ត្រី នេត សាវឿន ថ្លែងក្នុងកិច្ចប្រជុំ នារសៀលថ្ងៃទី២២ ខែវិច្ឆិកា ឆ្នាំ២០២៣ ព្រះរាជពិធីបុណ្យអុំទូក នាឆ្នាំនេះ គឺជាបុណ្យជាតិដ៏សំខាន់ក្នុងការស្វាគមន៍រាជរដ្ឋាភិបាល នីតិកាលថ្មី ហើយរាជរដ្ឋាភិបាល ក៏បានត្រៀមរៀបចំព្រះរាជពិធីបុណ្យអុំទូកនេះឱ្យអធិកអធមជាងឆ្នាំមុនៗ។

លោក នេត សាវឿន បញ្ជាក់ថា បន្ទាប់ពីខកខានរៀបចំអស់រយៈប៉ុន្មានឆ្នាំ ដោយសារវិបត្តិជំងឺកូវីដ១៩ រាជរដ្ឋាភិបាលកម្ពុជា នីតិកាលទី៧ ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ដ្រីកម្ពុជា ដែលទើបបង្កើតបានរយៈពេល៩០ថ្ងៃនេះ បានអនុញ្ញាតឱ្យរៀបចំព្រះរាជពិធីបុណ្យអុំទូកឡើងវិញ ដើម្បីបង្កបរិយាកាសឱ្យប្រជាពលរដ្ឋបានដើរលេងកម្សាន្ដដោយក្ដីសប្បាយរីករាយ។ ជាមួយនឹងការកម្សាន្ដសប្បាយរបស់ពលរដ្ឋក្នុងពិធីបុណ្យជាតិដ៏សំខាន់នេះ លោកឧបនាយករដ្ឋមន្ដ្រី បានចាត់ទុកថា កាតព្វកិច្ចការពារសន្ដិសុខ សណ្ដាប់ធ្នាប់ និងសុវត្ថិភាពជូនថ្នាក់ដឹកនាំ ភ្ញៀវជាតិ និងអន្ដរជាតិ ដែលមកពីគ្រប់ទិសទីទាំងអស់ជារឿងសំខាន់ និងត្រូវយកចិត្តទុកដាក់ខ្លាំងបំផុតមិនអាចធ្វេសប្រហែសបានឡើយ។

តាមរយៈបទពិសោធធ្លាប់ជាអគ្គស្នងការនគរបាលជាតិ លោក នេត សាវឿន បានចែករំលែកនូវអ្វីដែលជាបញ្ហាប្រឈម និងតម្រូវការចាំបាច់មួយចំនួន ដល់ថ្នាក់ដឹកនាំកងកម្លាំងប្រដាប់អាវុធទាំងអស់ ដែលបានចូលរួមក្នុងកិច្ចប្រជុំនេះ ដើម្បីជាមូលដ្ឋានគ្រឹះបន្ថែមក្នុងការពង្រឹងសមត្ថភាពដល់កងកម្លាំងសមត្ថកិច្ច ដែលមានកាតព្វកិច្ចក្នុងការការពារសន្ដិសុខ សណ្ដាប់ធ្នាប់ និងសុវត្ថិភាព ព្រមទាំងក្រុមគ្រូពេទ្យ។

ដើម្បីធានាឱ្យបានដាច់ខាតនូវសន្ដិសុខ សណ្ដាប់ធ្នាប់ ក្នុងព្រះរាជពិធីបុណ្យអុំទូក នាឆ្នាំនេះ ប្រព្រឹត្តទៅរលូនល្អប្រសើរ លោកឧបនាយករដ្ឋមន្ដ្រី ក៏បានផ្ដល់ការណែនាំនូវការងារមួយចំនួន ដោយពង្រឹងយន្ដការរួម យន្ដការតាមតំបន់ យន្ដការបញ្ជាការស្រាល ពោល គឺត្រូវមានបញ្ជាការ មានអ្នកទទួលខុសត្រូវពិតប្រាកដច្បាស់លាស់។ ទន្ទឹមនេះ គប្បីជំរុញការផ្សព្វផ្សាយដល់កងកម្លាំងសមត្ថកិច្ចទាំងអស់ ដែលមានភារកិច្ចការពារសន្ដិសុខ សណ្ដាប់ធ្នាប់ ក្នុងព្រះរាជពិធីបុណ្យអុំទូក ឱ្យបានយល់ច្បាស់អំពីតួនាទីភារកិច្ចរបស់ខ្លួន និងទាមទារឱ្យកម្លាំងទាំងអស់ស្វាហាប់ ទន់ភ្លន់ ម៉ឺងម៉ាត់ ខណៈប្រធានអង្គភាពនីមួយៗ ត្រូវមានការលើកទឹកចិត្តដល់មន្ដ្រីក្រោមឱវាទរបស់ខ្លួន។

លោក នេត សាវឿន ក៏បានណែនាំឱ្យមានការត្រៀមកម្លាំងអន្ដរាគមន៍នៅនឹងកន្លែង ត្រូវមានការចាត់តាំងប្ដូរវេនកម្លាំងដែលប្រចាំការការពារច្បាស់លាស់ ត្រូវមានការរៀបចំគ្រូពេទ្យសង្គ្រោះទាំងចល័ត និងមានទីតាំងសម្រាប់សង្គ្រោះបឋម ដើម្បីងាយស្រួលនៅពេលមានហេតុការណ៍ណាមួយកើតឡើង ពង្រឹងមធ្យោបាយទំនាក់ទំនងសម្រាប់កងកម្លាំង ដើម្បីងាយស្រួលទំនាក់ទំនងគ្នា និងជាពិសេស ត្រូវពង្រឹងសន្ដិសុខ សណ្ដាប់ធ្នាប់ ចាប់ពីពេលនេះតទៅនៅទូទាំងប្រទេស៕