ធនាគារជាតិ និងអង្គការ UNESCAP រៀបចំកម្មវិធីទស្សនកិច្ចសិក្សាស្តីពីបរិយាបន្នហិរញ្ញវត្ថុ

ធនាគារជាតិនៃកម្ពុជា សហការជាមួយអង្គការ UNESCAP រៀបចំកម្មវិធីទស្សនកិច្ចសិក្សាស្តីពីបរិយាបន្នហិរញ្ញវត្ថុនៅព្រឹកថ្ងៃទី២៩ ខែវិច្ឆិកា ឆ្នាំ២០២៣ នៅសណ្ឋាគារសុខាភ្នំពេញ ដោយមានប្រតិភូ និងសហការីមកពីប្រទេសកូឡុំប៊ី ហ្វីជី ម៉ាឡេស៊ី ប៊ូតង់ និងនេប៉ាល់។

ថ្លែងបើកកម្មវិធីទស្សនកិច្ចសិក្សាស្តីពីបរិយាបន្នហិរញ្ញវត្ថុ លោក យឹម លាត ទេសាភិបាលរងធនាគារជាតិនៃកម្ពុជាបានមានប្រសាសន៍ថា កម្មវិធីទស្សនកិច្ចសិក្សាអនុវត្តសហគមន៍លើកដំបូងរបស់អង្គការ UNESCAP ស្តីពីការដាក់បញ្ចូល​ហិរញ្ញវត្ថុនាពេលនេះ គឺជាឱកាស និងជាវេទិកាបណ្តាញដ៏ល្អសម្រាប់អ្នកជំនាញទាំងអស់នៅទូទាំងសហគមន៍ការដាក់បញ្ចូលហិរញ្ញវត្ថុសកលដើម្បីចែករំលែកទស្សនៈ និងបទពិសោធន៍ជាក់ស្តែង ដើម្បីកែលម្អបន្ថែមទៀតនូវការរួមបញ្ចូលផ្នែកហិរញ្ញវត្ថុ។ លោកបានបន្តថា ដំណើរទស្សនកិច្ចសិក្សានេះក៏ជាឱកាសមួយសម្រាប់បុគ្គលិកធនាគារជាតិដើម្បីស្វែងយល់ពីសហការីមកពីប្រទេសផ្សេងៗទៀតផងដែរ។

លោកបានបន្តទៀតថា «ការដាក់បញ្ចូលហិរញ្ញវត្ថុ គឺជាដំណើរមួយ ទោះបីជាយើងបានធ្វើច្រើនក៏ដោយ បើគ្មានកិច្ចសហការ និងការសម្របសម្រួលពីគ្រប់ភាគីពាក់ព័ន្ធ យើងនឹងមិនអាចសម្រេចបានច្រើននេះទេ។ ដូចសុភាសិតមួយពោលថា “បើយើងចង់ទៅឆ្ងាយ ត្រូវទៅជាមួយគ្នា”»។

លើសពីនេះទៀតការដាក់បញ្ចូលហិរញ្ញវត្ថុបាន និងកំពុងដើរតួនាទីយ៉ាងសំខាន់ក្នុងការទ្រទ្រង់កំណើនសេដ្ឋកិច្ច និងកាត់បន្ថយវិសមភាពប្រទេស និងភាពក្រីក្រនៅកម្ពុជា។ លោក ទេសាភិបាលរង ធនាគារជាតិបានថ្លែងអំណរគុណយ៉ាងជ្រាលជ្រៅល់ UNESCAP វាគ្មិនកិត្តិយស និងអ្នកចូលរួមដែលបានចំណាយពេលវេលាដ៏មានតម្លៃរបស់អ្នកដើម្បីចូលរួមទស្សនកិច្ចសិក្សានេះ។

លោកជឿជាក់ថា វាគ្មិនកិត្តិយស និងអ្នកចូលរួមទាំងអស់មានការពិភាក្សាយ៉ាងសកម្ម និងប្រកបដោយផ្លែផ្កា។ នៅក្នុងឱកាសនោះដែរ លោកបានលើកឡើងថា ធនាគារជាតិដោយមានកិច្ចសហប្រតិបត្តិការពីភាគីពាក់ព័ន្ធនានា បាននិងកំពុងអនុវត្តកម្មវិធីចំណេះដឹងផ្នែកហិរញ្ញវត្ថុ និងការដាក់បញ្ចូលហិរញ្ញវត្ថុជាច្រើន ដើម្បីលើកកម្ពស់ចំណេះដឹងផ្នែកហិរញ្ញវត្ថុ និងឌីជីថលនៅកម្ពុជា សំដៅដល់ការទ្រទ្រង់កំណើនសេដ្ឋកិច្ច និងកាត់បន្ថយវិសមភាពប្រទេស និងភាពក្រីក្រនៅកម្ពុជា។

លោកបានបញ្ជាក់ថា ធនាគារជាតិបានធ្វើទំនើបកម្ម និងហេដ្ឋារចនាសម្ព័ន្ធហិរញ្ញវត្ថុឌីជីថល ជាពិសេសប្រព័ន្ធទូទាត់ ដែលចាំបាច់សម្រាប់ជីវិតប្រចាំថ្ងៃរបស់ប្រជាជនកម្ពុជាដូចជា ប្រព័ន្ធទូទាត់ជាតិ ការទូទាត់រហ័ស ការទូទាត់លក់រាយ និងប្រព័ន្ធបាគង ជាដើម។ KHQR មិនត្រឹមតែត្រូវបានគេប្រើយ៉ាងទូលំទូលាយសម្រាប់ការទូទាត់នៅក្នុងប្រទេសកម្ពុជាប៉ុណ្ណោះទេ ប៉ុន្តែវាអនុញ្ញាតឱ្យធនាគារជាតិនៃកម្ពុជា បង្កើតប្រព័ន្ធទូទាត់ឆ្លងដែនក្នុងប្រទេសផ្សេងទៀត។ ការបង្កើតថ្មីនៃការទូទាត់ទាំងនេះបានរួមបញ្ចូលចំនួនប្រជាជន ដែលមិនទាន់បានបម្រើ និងមិនបានបម្រើដល់សេវាកម្មហិរញ្ញវត្ថុផ្លូវការ ដោយអនុញ្ញាតឱ្យពួកគេចូលប្រើសេវាកម្មទូទាត់ក្នុងតម្លៃទាបនៃប្រតិបត្តិការ ងាយស្រួល និងមានសុវត្ថិភាព និងទាក់ទាញ។

ជាមួយគ្នានេះ ក៏បានបន្តលើកកម្ពស់ការប្រកួតប្រជែងទីផ្សារដោយយុត្តិធម៌ និងតម្លាភាពក្នុងប្រព័ន្ធធនាគារ តាមរយៈការអនុវត្តការអនុលោមតាមបទប្បញ្ញត្តិ ការកែលម្អយន្តការដោះស្រាយបណ្តឹង ដំណើរការកសាងសមត្ថភាព និងការអនុវត្តគំនិតផ្តួចផ្តើមផ្សេងៗ។

គួរបញ្ជាក់ថា ធនាគារជាតិនៃកម្ពុជា បានបង្កើតឱ្យមានគំនិតផ្តួចផ្តើមជាច្រើនក្នុងការរៀបចំយន្តការគាំទ្រហិរញ្ញប្បទានប្រកបដោយចីរភាព ដែលក្នុងនោះរួមមាន ការរៀបចំឱ្យមានផែនទីចង្អុលផ្លូវសម្រាប់ការជំរុញហិរញ្ញប្បទានប្រកបដោយចីរភាព ការបង្កើតឱ្យមានវដ្តករសាស្ត្រសម្រាប់គាំទ្រលំហូរមូលធន ការដាក់ចេញនូវក្របខណ្ឌនៃការរាយការណ៍ និងការកសាងសមត្ថភាព ជាដើម៕

អត្ថបទ៖ សំអឿន