អ្នករាយការណ៍ពិសេស UN វាយតម្លៃថា ស្ថានភាពសិទ្ធិមនុស្សនៅកម្ពុជា មានការវិវត្តល្អ

លោក Vitit Muntarbhorn អ្នករាយការណ៍ពិសេសរបស់អង្គការសហប្រជាជាតិទទួលបន្ទុកស្ថានភាពសិទ្ធិមនុស្សកម្ពុជា បានជួបជាមួយ លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា ពិភាក្សាពាក់ព័ន្ធនឹងបញ្ហាសិទ្ធិមនុស្សនៅកម្ពុជា នៅព្រឹកថ្ងៃទី៥ ខែធ្នូនេះ។ លោក Vitit Muntarbhorn បានវាយតម្លៃថា សិទ្ធិមនុស្សនៅកម្ពុជា មានការវិវត្តល្អ។ នេះបើតាមការឱ្យដឹងពីលោក ប៉ា ប៉ុណ្ណារ៉ាដា អ្នកនាំពាក្យគណៈកម្មាធិការសិទ្ធិមនុស្សកម្ពុជា។

នៅក្នុងជំនួបនៅព្រឹកថ្ងៃទី៥ ខែធ្នូ ឆ្នាំ២០២៣នេះ មានគោលបំណងពិភាក្សាពីវឌ្ឍនភាពនៃស្ថានភាពសិទ្ធិមនុស្សនៅកម្ពុជា និងការបង្កើតស្ថាប័នសិទ្ធិមនុស្សជាតិនៅកម្ពុជា។ ក្នុងជំនួបនេះ លោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា លើកឡើងថា កម្ពុជាប្តេជ្ញាបន្តថែរក្សាសន្តិភាព ដែលជាមូលដ្ឋានគ្រឹះក្នុងការធានាសិទ្ធិមនុស្ស ជាពិសេស គឺសិទ្ធិរស់រានមានជីវិត។ បន្ថែមពីនេះ លោក កែវ រ៉េមី ក៏បានលើកឡើងពីចំណុចវិជ្ជមាននៅកម្ពុជាចំពោះអ្នកស្រឡាញ់​ភេទដូចគ្នា ដោយកម្ពុជាមិនបានរឹតត្បិត ឬដាក់ទោសចំពោះអ្នកស្រឡាញ់ភេទដូចគ្នាឡើយ។ មិនតែប៉ុណ្ណោះ លោកថា សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ក៏ធ្លាប់មានប្រសាសន៍មិនឱ្យមានការរើសអើងចំពោះអ្នកស្រឡាញ់​ភេទដូចគ្នានេះដែរ។

អ្នកនាំពាក្យគណៈកម្មាធិការសិទ្ធិមនុស្សកម្ពុជា បានបញ្ជាក់ថា លោក Vitit Muntarbhorn បានវាយតម្លៃថា ស្ថានភាពសិទ្ធិមនុស្សនៅកម្ពុជាមានការវិវត្តល្អប្រសើរ តាមរយៈវឌ្ឍនភាពជាវិជ្ជមានលើវិស័យសិទ្ធិមនុស្ស ជាពិសេស ការរៀបចំសេចក្តីព្រាងច្បាប់ស្តីពីការបង្កើតស្ថាប័នសិទ្ធិមនុស្សជាតិដែលមានធាតុចូលច្រើនពីអង្គការសង្គមស៊ីវិល ព្រឹទ្ធសភា និងរដ្ឋសភា និងអង្គការថ្នាក់តំបន់ជាដើម។

ចេញពីបញ្ហានេះ លោក Vitit Muntarbhorn និងលោក កែវ រ៉េមី ក៏បានពិភាក្សាពីស្ថានភាពពន្ធនាគារនៅក្នុងប្រទេសកម្ពុជាផងដែរ។ គណៈកម្មាធិការសិទ្ធិមនុស្សកម្ពុជា បានវាយតម្លៃថា នៅក្នុងពន្ធនាគារ គឺពិតជាមានការគោរពសិទ្ធិមនុស្សល្អ និងត្រឹមត្រូវ ព្រោះអ្នកជាប់ពន្ធនាគារនៅទីនោះ ទទួលបានអាហារគ្រប់គ្រាន់ ទទួលបានការបណ្តុះបណ្តាល ទទួលបានការថែទាំសុខភាព និងសិទ្ធិក្នុងការគោរពសាសនាផ្សេងៗ។ នេះបើតាមការបញ្ជាក់របស់អ្នកនាំពាក្យគណៈកម្មាធិការសិទ្ធិមនុស្សកម្ពុជា។

សូមបញ្ជាក់ថា ការជួបពិភាក្សានេះ គឺជាការពិភាក្សាប្រមូលព័ត៌មានផ្សេងៗរបស់លោក Vitit Muntarbhorn ដើម្បីធ្វើជារបាយការណ៍បញ្ជូនទៅអង្គការសហប្រជាជាតិ។ ដោយឡែក នេះ គឺជាដំណើរទស្សនកិច្ចលើកទី២របស់លោក Vitit Muntarbhorn មកកាន់ប្រទេសកម្ពុជា ដោយកាលពីខែសីហា ឆ្នាំ២០២២ លោក Vitit Muntarbhorn ធ្លាប់ធ្វើទស្សនកិច្ចនៅកម្ពុជារយៈពេល ១១ថ្ងៃ និងបានជួបជាមួយសម្តេចតេជោ ហ៊ុន សែន ផងដែរនាពេលនោះ៕