ក្រសួងអប់រំដាក់បញ្ចូលកម្មវិធីសិក្សាថ្មីបែបទំនើបរបស់ជប៉ុននៅកម្រិតបឋមសិក្សា

ក្រសួងអប់រំយុវជន និងកីឡា និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុនបានដាក់ឲ្យដំណើរការកម្មវិធិសិក្សាថ្មីបែបទំនើបរបស់ប្រទេសជប៉ុននៅតាមសាលាបឋមសិក្សារដ្ឋមួយចំនួន ដើម្បីឲ្យសិស្សអាចចេះគិតបែបគណិតវិទ្យា ចេះត្រិះរិះពិចារណានិងចេះដោះស្រាយបញ្ហាផ្សេងៗពិសេសធ្វើឲ្យកុមារមានភាពវ័យឆ្លាត។

ថ្លែងនៅក្នុងពិធីសម្ពោធជាផ្លូវការនូវ កម្មវិធីសិក្សា Think!Think! នៅថ្ងៃទី១០ខែកុម្ភៈនេះនៅមជ្ឍមណ្ឌលសហប្រតិបត្តិការកម្ពុជា-ជប៉ុនលោកស្រី ហារ៊ុកុ កាមីអិ ប្រធានតំណាងការិយាល័យ JICA ប្រចាំប្រទេសកម្ពុជា បានមានប្រសាសន៍ ថាThink!Think! គឺជាកម្មវិធីសិក្សាលេខ១របស់ប្រទេសជប៉ុនដែលផ្តល់នូវឱកាសដ៏ល្អបំផុតមួយសម្រាប់សិស្សានុសិស្សក្នុងការអភិវឌ្ឍន៍នូវជំនាញនៃការគិតបែបស៊ីជម្រៅ ជំនាញនៃការទំនាក់ទំនងក្នុងសង្គម គំនិតច្នៃប្រឌិត ការលើកទឹកចិត្ត ភាពជឿជាក់និងការមានទំនុកចិត្តលើខ្លួនឯង។

លោកស្រីបានឲ្យដឹងទៀតថា ជាជំហានដំបូងនៃគម្រោងនេះកម្មវិធីនេះនឹងដាក់បញ្ចូលទៅក្នុងកម្មវិធីសិក្សាកុំព្យូទ័ររបស់សាលារដ្ឋចំនួ ន៨នៅក្នុងចំណោម៦ខេត្តរហូតដល់ឆ្នាំ២០២២ សម្រាប់សិស្សា នុសិស្សចំនួន៣០០០នាក់។

លោកស្រីបានបន្តថាបន្ទាប់ពីនោះយើងក៏រំពឹងផងដែរថាអាចនឹងធ្វើការពង្រីកនូវវិសាលភាពរបស់ខ្លួនអោយក្លាយទៅជាកម្មវិធីសិក្សាថ្នាក់ជាតិសម្រាប់ជំហានបន្ទាប់។

លោក បណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡាបានទទួលស្គាល់ថា Think!Think! គឺជាកម្មវិធីអប់រំដ៏អស្ចារ្យបំផុតមួយដែលជួយដល់ការអភិវឌ្ឍនូវជំនាញនៃការគិតបែបស៊ីជម្រៅ និងជំនាញទន់ផងដែរ។វាអាចជួយអោយសិស្សានុសិស្សបានរៀននូវជំនាញថ្មីៗដែលជាតម្រូវការចាំបាច់នាពេលអនាគត។

លោក រដ្ឋមន្ត្រីសង្ឃឹមថានឹងមានសិស្សានុសិស្សជាច្រើននាក់ផ្សេងទៀតនឹងមានឱកាសបានរៀនកម្មវិធីសិក្សានេះនាពេលអនាគត។

គួរបញ្ជាក់ថាទាក់ទងជាមួយនឹងគម្រោងនេះ JICA ក៏បាននឹងកំពុងបើកដំណើរការនូវថ្នាក់រៀនមួយនៅឯមជ្ឍមណ្ឌលសហប្រតិបត្តិការកម្ពុជា-ជប៉ុនដែលហៅថាCJCC ដែលកុមារគ្រប់គ្នាអាចចូលរៀនកម្មវិធីនេះបាន៕

សំអឿន