អ្នកនាំពាក្យ៖ ការចាត់តាំងមន្ត្រីក្រសួងមហាផ្ទៃ ចុះស្រាវជ្រាវនៅរដ្ឋបាលខេត្តបន្ទាយមានជ័យ ក៏ជាប់ពាក់ព័ន្ធបណ្ដឹងពលរដ្ឋជាង ១០០គ្រួសារដែរ

ក្រសួងមហាផ្ទៃ កាលពីថ្ងៃទី២០ ខែធ្នូ ឆ្នាំ២០២៣នេះ បានចេញលិខិតបង្គាប់ការចាត់តាំងថ្នាក់ដឹកនាំក្រសួង និងមន្ដ្រីរាជការចំនួន១០រូបរបស់ក្រសួង ឲ្យចុះស្រាវជ្រាវ ពិនិត្យ និងវាយតម្លៃការអនុវត្តតួនាទី និងភារកិច្ចរបស់រដ្ឋបាលខេត្តបន្ទាយមានជ័យ ដោយប្រើរយៈពេល៣ថ្ងៃ គឺចាប់ពីថ្ងៃទី២២ ដល់ថ្ងៃទី២៤ ខែធ្នូ ឆ្នាំ២០២៣។

លោក ទូច សុខៈ អ្នកនាំពាក្យរងក្រសួងមហាផ្ទៃ បានឲ្យដឹងនៅព្រឹកថ្ងៃទី២១ ខែធ្នូនេះថា ការចាត់តាំងថ្នាក់ដឹកនាំក្រសួង និងមន្ដ្រីរាជការចំនួន១០រូបរបស់ក្រសួងឲ្យចុះស្រាវជ្រាវ ពិនិត្យ និងវាយតម្លៃការអនុវត្តតួនាទី និងភារកិច្ចរបស់រដ្ឋបាលខេត្តបន្ទាយមានជ័យនេះ គឺជាការចុះពិនិត្យអង្កេតស្រាវជ្រាវអំពីការបំពេញតួនាទីភារៈកិច្ច របស់រដ្ឋបាលខេត្តបន្ទាយមានជ័យ ដោយត្រូវជួបសម្ភាសន៍ជាមួយក្រុមប្រឹក្សាខេត្ត និងរដ្ឋបាលខេត្ត ដោយបានជ្រើសរើសតួអង្គរួចជាស្រេច ថាតើការបំពេញតួនាទីភារកិច្ចតាមច្បាប់គិតិយុទ្ធ និងតាមការណែនាំរបស់ក្រសួងមហាផ្ទៃ ដែរឬអត់។

លោក ទូច សុខៈ បានបន្ថែមថា ក្រុមការងារដែលចាត់តាំងទៅនេះ ក៏នឹងសិក្សាស្រាវជ្រាវជុំបញ្ហាដែលប្រជាពលរដ្ឋ លើកឡើងតាមបណ្ដឹងស្នើសុំផ្លាស់ប្ដូរលោក អ៊ុំ រាត្រី អភិបាលខេត្ត និងលោក ង៉ោ ម៉េងជ្រួញ អភិបាលរងខេត្តបន្ទាយមានជ័យនេះដែរ ជាពិសេសនឹងពិនិត្យទៅលើតួនាទីភារកិច្ច និងឆន្ទៈក្នុងការសម្របសម្រួលដោះស្រាយបញ្ហាដីធ្លី ដែលប្រជាពល​រដ្ឋចង់ឲ្យរដ្ឋបាលខេត្ត រៀបចំផ្ដល់ប័ណ្ណកម្មសិទ្ធិដីធ្លីទាំងជាង១០០គ្រួសារនេះផងដែរ។ តែចំពោះលទ្ធផលយ៉ាងណានោះ លោក ទូច សុខៈ នៅមិនទាន់អាចវាយតម្លៃបាននៅឡើយទេ ដោយត្រូវរង់ចាំលទ្ធផលដែលក្រុមការងារចុះស្រាវជ្រាវ​សិន។

គួររំលឹកថា កាលពីថ្ងៃទី២៩ ខែវិច្ឆិកា ឆ្នាំ២០២៣កន្លងទៅនេះ ប្រជាពលរដ្ឋជាង១០០គ្រួសារ រស់នៅភូមិចាន់គិរី និងភូមិទួលប្រាសាទ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានសរសេរលិខិតគោរពជូនលោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស្នើសុំផ្លាស់ប្ដូរលោក អ៊ុំ រាត្រី អភិបាលខេត្តបន្ទាយមានជ័យ និងលោក ង៉ោ ម៉េងជ្រួញ អភិបាលរងខេត្តចេញ។ ពួកគាត់លើកឡើងថា លោកអភិបាលខេត្ត និងអភិបាលរងខេត្តបន្ទាយមានជ័យ អសមត្ថភាពក្នុងការដោះស្រាយបញ្ហាជូនប្រជាពលរដ្ឋ និងឃុបឃិតគ្នាជាប្រព័ន្ធធ្វើទុក្ខបុកម្នេញប្រជាពលរដ្ឋជាដើម។

ពាក់ព័ន្ធសំណុំរឿងនេះ ក៏ត្រូវបានអគ្គាធិការដ្ឋានក្រសួងមហាផ្ទៃ និងអង្គភាពពាក់ព័ន្ធ ស្រាវជ្រាវរួចរាល់ហើយដែរ។ នេះបើតាមការបញ្ជាក់ពីលោក ទូច សុខៈ អ្នកនាំពាក្យរងក្រសួងមហាផ្ទៃ កាលពីចុងសប្ដាហ៍កន្លងទៅនេះ៕

អត្ថបទ៖ សុខុម