​មន្ត្រីកសិកម្មឃុំ​ ចាប់ផ្ដើមចូលរៀន ​វគ្គបណ្ដុះបណ្ដាល​ដំបូងនៅខែក្រោយ​

ការបណ្ដុះបណ្ដាលមន្ត្រីកសិកម្មឃុំ ចំនួន ២៥០ នាក់ ​ដែលទើបជាប់ជាមន្ត្រីក្នុង​ការប្រឡងកាល​ពី​ពេល​ថ្មីៗនេះ ​នឹងចាប់ផ្ដើមនៅខែកុម្ភៈ ឆ្នាំ ២០២៤ ខាងមុខ ដែលមានរយៈពេល ១ ខែ ជាការបណ្ដុះបណ្ដាលវគ្គដំបូង។​

​លោក យ៉ង សាំងកុមារ រដ្ឋលេខាធិការ ​ក្រសួងកសិកម្ម រុក្ខាប្រមាញ់ និងនេសាទ ​បានឱ្យដឹង​នៅថ្ងៃទី ០៣ ខែមករា ឆ្នាំ ២០២៤ នេះថា ការបណ្ដុះបណ្ដាលមន្ត្រីកសិកម្មឃុំដំបូង ចាប់ផ្ដើមនៅខែក្រោយ ដែលទី១ បណ្ដុះបណ្ដាលពីប្រព័ន្ធរដ្ឋបាលទូរទៅរបស់ក្រសួងកសិកម្ម ទី២ ផ្ដោតលើវិធីសាស្ត្រផ្សព្វផ្សាយកសិកម្ម វិធីសាស្ត្រធ្វើការជាមួយកសិករ ទី៣ ផ្ដោតទៅលើបច្ចេកទេស​កសិកម្ម ​ទាក់ទងនឹងដំណាំស្រូវ។

​លោកបញ្ជាក់ថា បន្ទាប់ពីវគ្គបណ្ដុះបណ្ដាលដំបូង ​នឹងមានការ​បណ្ដុះបណ្ដាលបន្ថែម រយៈពេល ១ ខែម្ដង និង ៣ ខែម្ដង ដែលវគ្គ ៣ ខែម្ដង មានលក្ខណៈស៊ីជម្រៅ ដែលមានជំនាញបច្ចេកទេស​ផ្សេងៗ ដូចជា ផលិតកម្ម ដំណាំទូរទៅ ផលិត​កម្មសត្វ វារីវប្បកម្មជាដើម។​

​បើតាម​រដ្ឋលេខាធិការរូបនេះ ​ក្រសួងកសិកម្មកំពុងរៀបឱ្យមានក្រុមពហុជំនាញ​ ដែលមកពីអង្គភាព​ជំនាញរបស់ក្រសួង ​ដើម្បីធ្វើជាគ្រូត្រៀមបណ្ដុះបណ្ដាលមន្ត្រីកសិកម្មឃុំ និងគាំទ្រការងារបច្ចេក​ទេស​បន្ថែម។​

​លោកបញ្ជាក់ថា ​សម្រាប់ឃុំ ២៥០ ដំបូងផ្ដោតទៅលើឃុំដែលសម្បូរដំណាំស្រូវ ប៉ុន្តែក៏មានកសិករ​ចិញ្ចឹមសត្វ ដាំបន្លែចិញ្ចឹមត្រី ដែលការបណ្ដុះបណ្ដាលទៅតាមតម្រូវការជាក់ស្ដែងផងដែរ។

ក្រសួងមុខងារសាធារណៈ ប្រកាសលទ្ធផលសម្រាប់ការប្រឡងប្រជែង ជ្រើសរើសមន្រ្តីកសិកម្មឃុំ ឆ្នាំ២០២៣ ឲ្យចូលបម្រើការងារក្នុងក្របខណ្ឌក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ២២ ខែធ្នូ ឆ្នាំ ២០២៣នេះ។​  ក្នុងនោះ បេក្ខជនដែលប្រឡងជាប់មានចំនួន ២៥០នាក់ ហើយមានស្ត្រីចំនួន ៩៤នាក់។

ការប្រឡងប្រជែងជ្រើសរើសមន្រ្តីកសិកម្មឃុំ ឆ្នាំ២០២៣ បានធ្វើឡើងកាលពីថ្ងៃទី ១៧ ខែធ្នូ ឆ្នាំ ២០២៣កន្លងទៅនេះ នាមណ្ឌលប្រឡង ស្ថិតក្នុងសាកលវិទ្យាល័យភូមិន្ទភ្នំពេញ។

ការប្រឡងប្រជែងនេះ មានបេក្ខជនចូលរួមប្រឡងចំនួនសរុប ៣,៣៨១នាក់ ហើយជ្រើសរើសចំនួន ២៥០នាក់ ក្នុងឆ្នាំ ២០២៣នេះ។

បន្ទាប់ប្រឡងជាប់ហើយ បេក្ខជនទាំង ២៥០នាក់ នឹងត្រូវចូលរួមវគ្គបណ្ដុះបណ្ដាលរយៈពេល ១ឆ្នាំ ឲ្យស្របទៅតាមជំនាញជាក់ស្ដែង ទើបអាចចាប់ផ្ដើមបំពេញការងារជាមន្ត្រីកសិកម្មឃុំបាន៕

អត្ថបទ៖ ឡេង ដេត

​​