កីឡា ៦ប្រភេទ យកទៅប្រកួតដណ្តេីមពានរង្វាន់ ដេីម្បីអបអរសាទរថ្ងៃ៧មករា នៅខេត្តកំពង់ចាម

កីឡាចំនួន ៦ប្រភេទត្រូវបានចូលរួមប្រកួតដណ្តេីមពានរង្វាន់ជេីងឯកទូទាំងខេត្តកំពង់ចាម សម្រាប់ឆ្នាំ២០២៤ ដេីម្បីអបអរសាទរ ទិវាថ្ងៃជ័យជំនះ ៧មករា (ឆ្នាំ១៩៧៩-២០២៤) ។

លោក លី ម៉េងសាន ប្រធានមន្ទីរ អប់រំ យុវជន និងកីឡា ខេត្តកំពង់ចាម បានឲ្យដឹងថា ឆ្នាំនេះមានកីឡាចំនួន ៦ប្រភេទដែលបានដាក់ពាក្យប្រកួតកីឡាមហាជន ជ្រេីសរេីសដណ្តេីមពានរង្វាន់ជេីងឯកទូទាំងខេត្តកំពង់ចាម និងដេីម្បីអបអរសាទរទិវាថ្ងៃជ័យជំនះ ៧មករា។ លោកបញ្ជាក់ទៀត កីឡាទាំង៦ប្រភេទនោះមានដូចជា កីឡាបាល់ទាត់បុរស-នារី បាល់ទះបុរស-នារី វាយសី វាយកូនឃ្លី បាល់បោះ និងបេតង់ ដែលសរុបក្រុមទាំងអស់មាន ១៤១ក្រុម និងមានកីឡាករកីឡាការីសរុប ១១៦៤នាក់ ដែលត្រូវចូលរួមប្រកួតចាប់ថ្ងៃទី៤ ខែមករា ឆ្នាំ២០២៤ តទៅ។

ថ្លែងក្នុងពិធីបេីកការប្រកួតកីឡាមហាជនថ្នាក់ខេត្តនេះ លោក អ៊ុន ចាន់ដា អភិបាលខេត្តកំពង់ចាម បានលេីកឡេីងថា កីឡារស់នៅក្រោមសន្តិភាព ដូច្នេះ នេះជាការរំលឹក និងអបអរសាទរថ្ងៃ៧មករា ដែលជាថ្ងៃកំណើតទី២ ជាថ្ងៃដែលផ្តល់កំណើតឱ្យពួកយេីងមានថ្ងៃនេះ មានអ្វីៗដូចសព្វថ្ងៃ ហេីយជាការដឹងគុណស្ថានិបឯក សម្តេចតេជោ ដែលបានរំដោះប្រជាជនកម្ពុជាចេញពីរបបប្រល័យពូជសាសន៍ ដែលមានរយៈពេល ៣ឆ្នាំ ៨ខែ ២០ថ្ងៃ ព្រមទាំងបានសម្លាប់ជាតិសាសន៍ឯង យ៉ាងរង្គាលព្រៃផ្សៃបំផុត មិនធ្លាប់មានក្នុងប្រវត្តិសាស្រ្តពិភពលោក។

ទន្ទឹមនឹងនេះដែរ លោកបន្តថា បេីគ្មានថ្ងៃ៧មករា ពលរដ្ឋខ្មែរមិនអាចជួបជុំសប្បាយរីករាយដូចពេលនេះឡេីយ ហេីយពួកគេបានប្តេជ្ញាចិត្តបន្តរួមគ្នាថែរក្សាសុខសន្តិភាពដែលមានបច្ចប្បន្នរហូតដល់ថ្ងៃអនាគត ដេីម្បីឲ្យមានការអភិវឌ្ឍ រីកចម្រេីនជឿនលឿនជាបន្តបន្ទាប់ទៀត៕

អត្ថបទ៖ ឡេក ចាន់ពេជ្រ