ស្ពានសម្តេចតេជោ ហ៊ុន សែន កោះយ៉ តម្លៃជាង ១,៣លានដុល្លារ ដាក់ឱ្យដំណើរការថ្ងៃនេះ

ស្ពានបេតុងឈ្មោះថា «ស្ពានសម្តេចតេជោ ហ៊ុន សែន កោះយ៉» បានបើកសម្ពោធដាក់ឱ្យប្រើប្រាស់ថ្ងៃនេះ ក្រោមអធិបតីភាពសម្តេច ហ៊ុន ម៉ាណែត នាយករដ្ឋមន្រ្តីកម្ពុជា។ ស្ពាននេះជាសមិទ្ធផលថ្មីមួយទៀត សម្រាប់ប្រជាពលរដ្ឋរស់នៅឃុំប៉ាក់ខ្លង ស្រុកមណ្ឌលសីមា ខេត្តកោះ​កុង ដែលជាអំណោយរបស់សម្តេចតេជោ ហ៊ុន សែន តាមរយ:អ្នកឧកញ៉ា លី យ៉ុងផាត់ សមាជិកព្រឹទ្ធសភា និងភរិយា។ ស្ពានសម្តេចតេជោ ហ៊ុន សែន កោះយ៉មានប្រវែង១២០ម៉ែត្រ ទទឹង១១ម៉ែត្រ ចំណាយថវិកាសាងសង់ ១,៣៨៧,០០០ដុល្លារ។

ស្ពាននេះសាងសង់ឡើងដើម្បីសម្រួលចរាចរណ៍ប្រជាពលរដ្ឋ ក៏ដូចជាភ្ញៀវទេសចរបានធ្វើដំណើរ បន្ទាប់ពីស្ពានបេឡេ ដែលឆ្លងកាត់ព្រែកកោះយ៉មានសភាពចាស់ទ្រុឌទ្រោម។ ស្ពានកោះយ៉ថ្មីនេះ ចាប់ផ្តើមសាងសង់កាលពីខែមិថុនា ឆ្នាំ២០២២។

ជាមួយគ្នានេះ សម្តេច ហ៊ុន ម៉ាណែត ក៏នឹងជួបសំណេះសំណាល ជាមួយមានកម្មករ និយោជិតចូលរួមចំនួន ១១,០០០នាក់ មានស្រ្តី មានផ្ទៃពោះចំនួន ៥៥១នាក់ មកពីរោងចក្រ សហគ្រាសចំនួន៥ផងដែរ។ ក្នុងនោះមាន​រោងចក្រកាត់ដេរ​សម្លៀកបំពាក់ចំនួន១, បង្គុំខ្សែរភ្លើងចំនួន១, ប៉ាក់លើសម្លៀកបំពាក់ចំនួន១, បរិក្ខាអេឡិចត្រូនិក​ចំនួន១,ដំឡើងរថយន្ត និងបង្គុំខ្សែភ្លើងចំនួន១៕