វិស័យកាត់ដេរ ផលិតស្បែកជើង និងផលិតផលធ្វើដំណើរបង្កើតប្រាក់ឈ្នួល​ប្រចាំឆ្នាំជិត ៣ពាន់លានដុល្លារ

គិតត្រឹមឆ្នាំ២០២៣នេះកម្ពុជាមានរោងចក្របម្រើលើវិស័យវាយនភណ្ឌ កាត់ដេរ ផលិតស្បែកជើង ផលិតផលធ្វើដំណើរ និងកាបូប ចំនួន ១៦៨០រោងចក្រ និងមានកម្មករនិយោជិតជាង ៩១ម៉ឺននាក់ ដោយបានប្រាក់ឈ្នួលប្រចាំឆ្នាំប្រមាណ ២,៩ពាន់លានដុល្លារ។ នេះបើតាមការបញ្ជាក់របស់លោក ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ។

បើតាមលោករដ្ឋមន្រ្តី ប្រាក់ឈ្នួលអប្បបរមារបស់កម្មករនិយោជិតបានកើនពី ៤០ដុល្លារ នៅឆ្នាំ១៩៩៧ ដល់ ២០៤ដុល្លារ នៅឆ្នាំ២០២៤ធ្វើឱ្យជីវភាពរស់នៅកម្មករនិយោជិតបានត្រូវបាន លើកម្ពស់កាន់តែប្រសើរឡើង។

នៅក្នុងកម្មវិធីដាក់ឱ្យប្រើប្រាស់ជាផ្លូវការស្ពានសម្តេចតេជោ ហ៊ុន សែន កោះយ៉ និងជួបសំណេះសំណាល​ជាមួយ​កម្មករនិយោជិតចំនួនជាង ១ម៉ឺននាក់ នៅភូមិនាងកុក ឃុំប៉ាក់ខ្លង ស្រុកមណ្ឌលសីមា ខេត្តកោះកុង កាលពីថ្ងៃទី ៨មករានេះ លោក ហេង​ សួរ បានបន្តថា គិតចាប់ពីឆ្នាំ១៩៩៧ រហូតត្រឹមបំណាច់ឆ្នាំ២០២៣ កម្ពុជា​ទទួល​បាន​គម្រោង​វិនិយោគ​ក្នុង​ការ​បង្កើត​រោងចក្រ សហគ្រាសសរុបចំនួន ៤០៨៤០រោងចក្រ សហគ្រាស និងមានកម្មករ​និយោជិត​សរុប​ប្រមាណ ១,៧លាននាក់។

លោករដ្ឋមន្រ្តី លើកឡើងថា សមិទ្ធផលទាំងនេះ ដំណើរការទៅបានដោយសារ​ប្រទេស​កម្ពុជា​សម្រេច និងរក្សាបាននូវ​ចីរភាព​នៃសុខសន្តិភាពពេញលេញ ស្ថិរភាពនយោបាយ និង​ការអភិវឌ្ឍលើគ្រប់វិស័យ បានទាក់ទាញ​អ្នក​វិនិយោគ​ជា​ច្រើន​ឱ្យ​មក​បណ្តាក់​ទុន​ក្នុង​ស្រុក ព្រមទាំងផ្តល់ឱកាសការងារជាច្រើនកន្លែងផងដែរ ជូនដល់ប្រជាពលរដ្ឋក្នុងស្រុក។

ជាងនេះទៀតតាមរយៈការកសាងផ្លូវគមនាគមន៍ ស្ពាន និងហេដ្ឋា​រចនា​សម្ព័ន្ធ​ជា​បន្តបន្ទាប់ រោងចក្រ សហគ្រាស​ក៏ត្រូវបានបង្កើត បង្កើន និងពង្រីកទៅ​តាមបណ្តា​ខេត្ត​នានា​។

នាឱកាសនោះដែរ សម្តេច ហ៊ុន ម៉ាណែត នាយករដ្ឋមន្រ្តីកម្ពុជា បានគូសបញ្ជាក់ថា បើសិនជារាជរដ្ឋាភិបាល មិនខំប្រឹងប្រែងចេញទៅក្រៅប្រទេស ដើម្បីចរចាជាមួយកូរ៉េ ចិន អាមេរិក ជប៉ុន ឱ្យមកបើករោងចក្រនៅកម្ពុជានោះទេ ក៏គ្មានរោងចក្រនៅទីនេះដែរ។ លើសពីនេះទៀត បើគោលនយោបាយរដ្ឋាភិបាល មិនមានការខិតខំដំឡើងប្រាក់​បៀវត្សរ៍ដល់កម្មករ មិនមែនបៀវត្សរ៍អប្បរមាឡើងពី ៤០ដុល្លារ នៅឆ្នាំ ១៩៩៧ មកដល់ជាង ២០០ដុល្លារ ដូចពេល​នេះទេ។

សម្តេចបានសង្កត់ធ្ងន់ថា រដ្ឋាភិបាល បានធ្វើឱ្យប្រទេសបញ្ចប់សង្រ្គាម បង្កើតបានបរិស្ថានល្អ និងដាក់គោលនយោបាយ​ឱ្យចំនូវអ្វីដែលប្រជាពលរដ្ឋចង់បាន៕

អត្ថបទ៖ សំអឿន