លោក ដូណាល់ ត្រាំ គំរាមកាណាដាជាលើកទីពីរ ជុំវិញបញ្ហាផ្សែងភ្លើងឆេះព្រៃ

ប្រធានាធិបតី​អាមេរិក លោក ដូណាល់ ត្រាំ បានប្រកាសកាលពី​ថ្ងៃ​អាទិត្យ​ថា លោកបានជួបសន្ទនាជាមួយនាយករដ្ឋមន្ត្រីកាណាដា លោក ម៉ាក ខានី (Mark Carney) អំឡុងពេលចូលរួមទស្សនាការប្រកួតវគ្គផ្តាច់ព្រ័ត្រនៃព្រឹត្តិការណ៍បាល់ទាត់ពិភពលោក FIFA World Cup នៅរដ្ឋ New Jersey។ នេះ​បើយោងតាម​​ទីភ្នាក់ងារ​ព័ត៌មានរ៉យទ័រ ចុះផ្សាយ​នៅ​ថ្ងៃ​ចន្ទ ទី​២០ ខែ​កក្កដា ឆ្នាំ​២០២៦។

នៅក្នុងជំនួបនោះ លោក ត្រាំ បានសម្តែងការមិនពេញចិត្តយ៉ាងខ្លាំងចំពោះកាណាដា ដោយទាមទារឱ្យប្រទេសនេះមានវិធានការប្រសើរជាងមុន ក្នុងការគ្រប់គ្រងភ្លើងឆេះព្រៃនៅក្នុងខេត្ត Ontario ដែលផ្សែងរបស់វាបានជះឥទ្ធិពលអាក្រក់មកលើរដ្ឋជាច្រើនរបស់អាមេរិក។

លោក ត្រាំ បានលើកឡើងថា សហរដ្ឋអាមេរិកគួរតែទទួលបានសំណង ចំពោះការខូចខាតទាំងនេះ ឬកាណាដាត្រូវប្រឈមនឹងការដាក់ពន្ធបន្ថែមលើទំនិញនាំចូល។ នេះគឺជាការគំរាមកំហែងជាលើកទីពីររបស់លោក បន្ទាប់ពីការប្រកាសកាលពីថ្ងៃសៅរ៍អំពីលទ្ធភាពនៃការដាក់ពន្ធ ដើម្បីដាក់ទណ្ឌកម្មលើប្រទេសកាណាដា។

ទាក់ទិន​នឹង​ការរិះគន់នេះ ការិយាល័យរបស់លោក ម៉ាក ខានី មិនទាន់បានចេញសេចក្តីថ្លែងការណ៍ណាមួយនៅឡើយទេ។ យ៉ាងណាមិញ កាលពីថ្ងៃសៅរ៍ លោក ម៉ាក ខានី បានបង្ហោះសារ​មួយ​នៅលើបណ្តាញសង្គម X ដោយបញ្ជាក់ថា កាណាដាបានដាក់ពង្រាយកម្លាំងពន្លត់អគ្គិភ័យជាង ៥ ៣០០នាក់ ព្រមទាំងប្រើប្រាស់បច្ចេកវិទ្យាថតកម្ដៅកម្រិតខ្ពស់ ដើម្បីតាមដាន និងទប់ស្កាត់ភ្លើងឆេះព្រៃទាំងនោះក្នុងពេលវេលាជាក់ស្តែង។

គួរបញ្ជាក់ថា ក្នុងរដូវកាលភ្លើងឆេះព្រៃឆ្នាំនេះ ផ្ទៃដីប្រមាណ ២,៤លានហិចតា នៅក្នុងប្រទេសកាណាដាត្រូវបានឆេះបំផ្លាញ។ ក្រុមអ្នកជំនាញផ្នែកអាកាសធាតុ បានពន្យល់ថា ការកើនឡើងនៃសីតុណ្ហភាពសកល គឺជាកត្តាចម្បងដែលជំរុញឱ្យភ្លើងឆេះព្រៃកើតឡើងញឹកញាប់ និងមានកម្លាំងខ្លាំងក្លាជាងមុននៅទូទាំងពិភពលោក។ ចាប់តាំងពីថ្ងៃព្រហស្បតិ៍មក ផ្សែងយ៉ាងក្រាស់ពីភ្លើងឆេះព្រៃនេះ បានគ្របដណ្តប់តំបន់ជាច្រើននៃសហរដ្ឋអាមេរិក ចាប់ពីតំបន់ Midwest រហូតដល់តំបន់ Northeast និង Mid-Atlantic ដែលបង្ខំឱ្យអាជ្ញាធរអាមេរិកចេញសេចក្តីព្រមានឱ្យប្រជាពលរដ្ឋស្នាក់នៅក្នុងផ្ទះជាបន្តបន្ទាប់៕

ប្រែសម្រួល៖ ឈាង