លោក សៅ សុខា៖ មន្ត្រី PM បង្កគ្រោះថ្នាក់ស្លាប់ដោយខ្លួនឯងក្នុងភាពស្រវឹង មិនទទួលបានថវិកាឧបត្ថម្ភឡើយ  

នាយឧត្តមសេនីយ៍ សៅ សុខា បានប្រកាសព្រមានដល់មន្ត្រីកងរាជអាវុធហត្ថណា ដែលបង្កគ្រោះថ្នាក់ចរាចរណ៍រហូតបាត់បង់អាយុជីវិតខ្លួនឯង ដោយស្ថិតក្នុងស្ថានភាពស្រវឹង គឺនឹងមិនទទួលបានថវិកាឧបត្ថម្ភពីមូលនិធិកងរាជអាវុធហត្ថឡើយ។ នេះបើតាមការឱ្យដឹងពីឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស នារសៀលថ្ងៃទី៩ ខែមករា ឆ្នាំ២០២៤នេះ។

តាមរយៈសំណេរនៅលើបណ្ដាញសង្គមហ្វេសប៊ុកផ្លូវការរបស់លោកឧត្តសេនីយ៍ត្រី អេង ហ៊ី បានឱ្យដូច្នេះថា៖ «លោកនាយឧត្តមសេនីយ៍ សៅ សុខា បានចេញបទបញ្ជាយ៉ាងម៉ឺងម៉ាត់ក្នុងគោលបំណងពង្រឹងវិន័យកងទ័ព និងអប់រំឱ្យយោ ធិននៃកងរាជអាវុធហត្ថទាំងអស់គោរពច្បាប់ចរាចរណ៍ ដើម្បីកាត់បន្ថយគ្រោះថ្នាក់ចរាចរណ៍ថែមទៀត»។ បើតាមលោកឧត្តមសេនីយ៍ត្រី អេង ហ៊ី គឺលោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស បានព្រមានថា «យោធិននៃកងរាជអាវុធហត្ថរូបណាដែលបង្កគ្រោះថ្នាក់ស្លាប់ដោយខ្លួនឯង មិនទទួលបានការឧបត្ថម្ភថវិកា គោលនយោបាយពីមូលនិធិមហាគ្រួសារកងរាជអាវុធហត្ថឡើយ។ ជាឧទាហរណ៍ ការបង្កស្លាប់ដោយខ្លួនឯងក្នុងករណីចេញក្រៅទីតាំងបន្ទាយ ឬសាលា ដោយមិនមានការអនុញ្ញាត ទៅផឹកស៊ីស្រវឹង ហើយបើកបរបង្កគ្រោះថ្នាក់ដល់អាយុជីវិតខ្លួនឯង ជាដើម»។

លោកឧត្តមសេនីយ៍ត្រី អ្នកនាំពាក្យ បានលើកឡើងថា កងរាជអាវុធហត្ថ ក្រោមការដឹកនាំ និងគ្រប់គ្រងរបស់លោកនាយឧត្តមសេនីយ៍ សៅ សុខា បានយកចិត្តទុកដាក់ខ្ពស់លើជីវភាពរស់នៅ និងសុខភាពរបស់យោធិនជាប្រចាំ។ លោក ថា កន្លងទៅ លោកនាយឧត្តមសេនីយ៍ សៅ សុខា បានផ្តួចផ្តើមគំនិតបង្កើតមូលនិធិមហាគ្រួសារកងរាជអាវុធហត្ថ ខណៈយោធិននៃកងរាជអាវុធហត្ថគ្រប់រូបបានគាំទ្រយ៉ាងពេញទំហឹង និងស្ម័គ្រចិត្តចូលបុណ្យតាមរយៈមូលនិធិនេះ ដើម្បីយកទៅឧបត្ថម្ភដល់គ្រួសារយោធិននៃកងរាជអាវុធហត្ថ ដែលបានពលីមរណៈក្នុងបុព្វហេតុបម្រើជាតិ។

បើតាមអ្នកនាំពាក្យរូបនេះ គឺកងរាជអាវុធហត្ថ បានអប់រំផ្សព្វផ្សាយដល់នាយទាហាន នាយទាហានរង និងពលទាហាននៃកងរាជអាវុធហត្ថគ្រប់រូប គ្រប់បណ្ដាអង្គភាពឱ្យចូលរួមការអនុវត្តច្បាប់ និងត្រូវធ្វើខ្លួនឯងម្នាក់ៗជាគំរូក្នុងការគោរពច្បាប់នានា ជាពិសេសពេលនេះ នៅគ្រប់អង្គភាពកងរាជអាវុធហត្ថ បាននិងកំពុងអប់រំផ្សព្វផ្សាយនូវបទបញ្ជាថ្មីរបស់នាយឧត្តមសេនីយ៍ មេបញ្ជាការកងរាជអាវុធហត្ថផ្ទៃប្រទេស។

លោក​ឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានអះអាងថា កន្លងទៅ កងរាជអាវុធហត្ថ បានលុបឈ្មោះចេញពីក្របខណ្ឌចំពោះយោធិននៃកងរាជអាវុធហត្ថ ដែលប្រើប្រាស់គ្រឿងញៀន ហើយខ្លះទៀតកសាងសំណុំរឿងបញ្ជូនទៅតុលាការចំពោះបុគ្គលណាដែលប្រព្រឹត្តបទល្មើស ដែលនេះ ជាការចូលរួមចំណែកក្នុងការទប់ស្កាត់និងប្រយុទ្ធប្រឆាំងនឹងគ្រឿងញៀនខុសច្បាប់ ក៏ដូចជាអំពើល្មើសច្បាប់ចរាចរណ៍ ជាដើម៕