ព័ត៌មានជាតិ

បណ្ឌិតសភាចារ្យ ភឿង សកុណា ជំរុញបន្តយកចិត្តទុកដាក់ អនុវត្ត យុទ្ធសាស្ត្របញ្ចកោណ

បានផុស

៥ ខែ មុន

នៅ

ថ្ងៃពុធ ១០ មករា ២០២៤

ដោយ

បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្ប: និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀង បានជំរុញមន្ត្រី សមាជិកពាក់ព័ន្ធបន្តការយកចិត្តទុកដាក់ អនុវត្តនយោបាយ និងយុទ្ធសាស្រ្តបញ្ចកោណ ដំណាក់កាលទី១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញនេះ ធ្វើឡើងក្នុងឱកាស បណ្ឌិតសុភាចារ្យ អញ្ជេីញចូលរួមជាអធិបតីក្នុង ពិធីបិទសន្និបាតបូកសរុបលទ្ធផលការងារឆ្នាំ២០២៣ និងលេីកទិសដៅការងារឆ្នាំ២០២៤ របស់រដ្ឋបាលខេត្តស្វាយរៀង និងប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀង នាថ្ងៃទី៩ ខែមករា ឆ្នាំ២០២៤ នៅសាលាខេត្តស្វាយរៀង។

បណ្ឌិតសភាចារ្យ បានគូសបញ្ជាក់ថា ឆ្នាំនេះ ជាឆ្នាំទី១ នៃការអនុវត្តន៍កម្មវិធីនយោបាយ និងយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល ដែលជានយោបាយដ៏សំខាន់សម្រាប់អភិវឌ្ឍប្រទេសជាតិប្រកបដោយទស្សនវិស័យច្បាស់លាស់ និងវែងឆ្ងាយ ហេតុនេះ រដ្ឋបាលខេត្តត្រូវបន្តយកចិត្តទុកដាក់អនុវត្តគោលការណ៍ណែនាំនូវគោលការណ៍ជាអាទិភាពសំខាន់ៗមួយចំនួនបន្ថែមទៀតដេីម្បីបន្តគាំទ្រដល់ការអនុវត្តកម្មវិធីនយោបាយ និងយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល។

បណ្ឌិតសភាចារ្យរដ្ឋមន្រ្តី បានពាំនាំនូវការផ្ដាំផ្ញេីសាកសួរសុខទុក្ខពីសំណាក់ សម្តេចកិត្តិសង្គហបណ្ឌិត ម៉ែន សំអន សមាជិកឧត្ដមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា អតីតប្រធានក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀង និងបានថ្លែងកោតសរសេីរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់រដ្ឋបាលខេត្តស្វាយរៀង ដែល បានបំពេញភារកិច្ចក្នុង ឆ្នាំ២០២៣ កន្លងមកប្រកបដោយប្រសិទ្ធភាព និងប្រសិទ្ធផលគួរជាទីមោទកៈ ដែលឆ្លុះបញ្ចាំងឱ្យឃើញពីការខិតខំប្រឹងប្រែងចូលរួមអនុវត្តនូវគោលនយោបាយ និងយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល នីតិកាលទី៦ នៃរដ្ឋសភា និងជាការចាប់ផ្ដេីមអនុវត្តកម្មវិធីនយោបាយ និងយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា។

ក្នុងពិធីនោះ បណ្ឌិតសភាចារ្យរដ្ឋមន្រ្តី បានផ្ដល់កិត្តិយស បំពាក់គ្រឿងឥស្សរិយយស ជូនថ្នាក់ដឹកនាំ មន្រ្តីរាជការរដ្ឋបាលខេត្តដែលមានស្នាដៃក្នុងការបំពេញការងារកន្លងមកផងដែរ។ អញ្ជើញចូលរួមក្នុងពិធីនេះរួមមាន អនុប្រធាន សមាជិក សមាជិកា ក្រុមការងារ អនុប្រធាន សមាជិក សមាជិកា ក្រុមប្រឹក្សាខេត្ត មន្រ្តីរាជការសាលាខេត្ត មន្រ្តីរាជការមន្ទីរជំនាញ អង្គភាពពាក់ព័ន្ធជុំវិញខេត្តសរុបប្រមាណ ៥២០នាក់៕