ខេត្តកំពង់ចាម ត្រៀមរៀបចំប្រកួតកីឡាបាល់ទាត់ពាន់រង្វាន់អភិបាលខេត្ត  

ខេត្តកំពង់ចាម ត្រៀមរៀបចំពិធីប្រកួតកីឡាបាល់ទាត់ពាន់រង្វាន់អភិបាលខេត្តកំពង់ចាម រដូវកាលទី២ ឆ្នាំ២០២៤ នៅថ្ងៃ ទី២៤ ដល់ថ្ងៃទី២៨ ខែមករា ឆ្នាំ២០២៤ ខាងមុខនេះ។ ការត្រៀមរៀបចំនេះ យោងតាមកិច្ចពិភាក្សារវាងគណៈកម្មការរៀបចំពាន់រង្វាន់បាល់ទាត់អភិបាលខេត្តកំពង់ចាម រដូវកាលទី២ នៅរសៀលថ្ងៃទី១៥ ខែមករា ឆ្នាំ២០២៤។

លោក សុះ សាក់រ៉ូនី ប្រធានគណៈកម្មការ បានដឹកនាំគណៈប្រតិភូកីឡាចូលជួបលោក អ៊ុន ចាន់ដា អភិបាលខេត្តកំពង់ចាម ដើម្បីជម្រាបពីការត្រៀមរៀបចំព្រឹត្តិការណ៍មួយនេះឡើង ដើម្បីបំផុសស្មារតីយុវជន និងប្រជាពលរដ្ឋឱ្យងាកមកលេងកីឡា ក្រោមដំបូលសន្តិភាព និងការអភិវឌ្ឍ។ បើតាមការបញ្ជាក់ពីលោក សុះ សាក់រ៉ូនី  ប្រធានគណៈកម្មការរៀបចំ ព្រឹត្តិការណ៍មួយនេះគ្រោងចំណាយថវិកាជាង ៨០លានរៀល ខណៈសម្រាប់ក្រុមកីឡាករដែលទទួលជ័យលាភីពីលេខ១ ដល់លេខ៤ គឺមានប្រាក់រង្វាន់យ៉ាងច្រើនសន្ធឹកសន្ធាប់។

លោក បានបន្ថែមថា ក្រុមកីឡា ដែលបានដាក់ពាក្យប្រកួតដណ្តើមពានរង្វាន់អភិបាលខេត្តកំពង់ចាមនេះ មាន ១៦ក្រុម ដែលមកពីតាមបណ្តាលខេត្តមួយចំនួន ដូចជា ខេត្តត្បូងឃ្មុំ ខេត្តក្រចេះ ខេត្តកំពង់ធំ និងខេត្តកំពង់ចាម ហើយព្រឹត្តិការណ៍នេះនឹងរៀបចំនៅដីឡូត៍ វីអាយអិនឌី ក្នុងស្រុកស្ទឹងត្រង់ ខេត្តកំពង់ចាម៕

អត្ថបទ និងរូបភាព ៖ ឡេក ចាន់ពេជ្រ