ទំនិញកម្ពុជា នាំចេញទៅវៀតណាម កើនឡើង ៣៧% ស្មើជិត ៣ពាន់លានដុល្លារ

ទំហំពាណិជ្ជកម្មរវាងកម្ពុជា និងវៀតណាម កើនឡើង ៧,៣% រយៈពេល ១២ខែ ឆ្នាំ ២០២៣ គិតជាទឹកប្រាក់​ប្រមាណជាង ៦,៥ពាន់លានដុល្លារ។ ក្នុងនោះការនាំចេញរបស់កម្ពុជា ទៅទីផ្សារវៀតណាមសម្រេចបានកំណើនជាង ៣៧% ស្មើនឹងទឹកប្រាក់ជិត ៣ពាន់លានដុល្លារ ខណៈការនាំចូលមកវិញមានចំនួនជាង ៣,៦ពាន់លានដុល្លារ ថយចុះជិត ១០%។ នេះបើយោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា។

វៀតណាម គឺជាប្រទេសដែលបានដោះដូរពាណិជ្ជកម្មធំលំដាប់ទី៣ជាមួយកម្ពុជា​ បន្ទាប់ពីចិន និងអាមេរិក។ ទំនិញដែល​កម្ពុជា នាំចេញសំខាន់ៗ ទៅវៀតណាម ភាគច្រើនជាផលិតផលកសិកម្ម មានដូចជា ស្រូវ ដំឡូងមី ស្វាយចន្ទី កៅស៊ូ ខណៈ​ការនាំចូលមកវិញមានដូចជា ដែកថែប ប្រេងឥន្ធនៈ និងផលិតផលវាយនភណ្ឌ ជាដើម។

ពាក់ព័ន្ធនឹងទំហំពាណិជ្ជកម្មនេះ ថ្នាក់ដឹកនាំ​កម្ពុជា-វៀតណាម ​បានសម្រេច​ឯកភាពគ្នា​ដាក់ទិសដៅ​ជំរុញ​ពាណិជ្ជកម្ម​ទ្វេភាគីរវាង​ប្រទេសទាំង២​ ឱ្យបានឈានដល់​កម្រិត ២០​ពាន់លានដុល្លារ ​ក្នុងពេលដ៏ខ្លី​ខាងមុខ​។ ការកំណត់​គោល​ដៅនេះ បានធ្វើឡើង​អំឡុងពេលនាយក​រដ្ឋមន្ត្រីកម្ពុជា​សម្តេច ហ៊ុន​ ម៉ាណែត ​ទៅបំពេញ​ទស្សនកិច្ច​ផ្លូវការ​កាល​ពីខែធ្នូ ឆ្នាំ ២០២៣ នៅប្រទេស​វៀតណាម។

ចំពោះការជំរុញទំហំពាណិជ្ជកម្មនេះ ស្របពេលការនាំចេញនាំចូលរវាងប្រទេសទាំង២ បានរីកធំឡើងទ្វេដងបើធៀប​ឆ្នាំ២០២០ ជាមួយឆ្នាំ២០២២ កន្លងទៅ។

នាឱកាសនោះ សម្តេចនាយករដ្ឋមន្ត្រី ហ៊ុន ម៉ាណែត បានថ្លែងដូច្នេះថា «ជាមួយនឹងទំនុកចិត្តនយោបាយខ្ពស់​រវាងភាគីទាំង២ (កម្ពុជា-វៀតណាម) យើងនឹងបន្តរួមគ្នាអនុវត្តន៍ឱ្យបានជោគជ័យ នូវរាល់កិច្ចព្រមព្រៀង និង​អនុស្សារណៈនៃការយោគយល់គ្នា និងទិសដៅដែលបានដាក់បន្ថែមទៀត ដើម្បីជំរុញការអភិវឌ្ឍសេដ្ឋកិច្ចសង្គម និងវិបុលភាពសម្រាប់ប្រទេសជាតិទាំង២។ កម្ពុជា និងវៀតណាម មិនត្រឹមតែបានសម្រេចនូវគោលដៅពាណិជ្ជកម្ម ៥ប៊ីលានដុល្លារអាមេរិកក្នុងឆ្នាំ២០២០ ប៉ុណ្ណោះទេ ហើយនិន្នាការនេះថែមទាំងបានកើនឡើង ២ដងឈានដល់ជិត​១១ប៊ីលានដុល្លារក្នុងឆ្នាំ២០២២»។

ឈរលើកំណើននេះ សម្តេច ហ៊ុន ម៉ាណែត និងលោក ផាម មិញជិញ នា​យក​រដ្ឋ​មន្ត្រី​វៀតណាម ​បានដាក់គោល​ដៅរួមគ្នាជំរុញឱ្យពាណិជ្ជកម្មទ្វេភាគី សម្រេចឱ្យបាន ២០ពាន់លានដុល្លារក្នុងពេល​ដ៏ខ្លីខាងមុខ៕