សម្ដេចម៉ែប្រោសប្រទានព្រះរាជទ្រព្យ ៥ម៉ឺនដុល្លារដល់ស៊ីម៉ាក់

សម្ដេចព្រះមហាក្សត្រីព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គសព្វព្រះរាជ​ហឬទ័យ​ប្រោស​ប្រទានព្រះរាជទ្រព្យដ៏ថ្លៃថ្លាបំផុតចំនួន៥០.០០០ (ប្រាំម៉ឺន)ដុល្លារអាមេរិក ដល់មជ្ឈម​ណ្ឌលសកម្មភាព​កំចាត់មីនកម្ពុជា ដើម្បីប្រើប្រាស់ក្នុងបុព្វហេតុរបស់ខ្លួន។ 

ពិធីប្រោសប្រទានព្រះរាជទ្រព្យដ៏ថ្លៃថ្លានេះបានធ្វើឡើងកាលពីល្ងាចថ្ងៃទី២០​ ខែមករា​ ឆ្នាំ២០២៤​ នៅព្រះ​បរមរាជវាំងរាជធានីភ្នំពេញ។

បើតាមលោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់បានចាត់ទុកព្រះរាជអំណោយ​ដ៏ថ្លៃថ្លាបំផុតរបស់សម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុតនាពេលនេះ ក៏ដូចជាពេលកន្លងមក ទាំងព្រះរាជ​អំណាយ​​ជាថវិកានិងជាសម្ភារៈ បានចូលរួមចំណែកយ៉ាង​សំខាន់ក្នុងការកាត់​បន្ថយអត្រាគ្រោះថ្នាក់ដោយសារមីន រំដោះផ្ទៃដីសុវត្ថិភាពជូនប្រជាពលរដ្ឋសម្រាប់បង្កបង្កើនផល លើកកម្ពស់ជីវ​ភាពរស់នៅ និងគាំទ្រការ​អភិវឌ្ឍសហគមន៍​មូលដ្ឋាន ជាពិសេសបានបង្ហាញពីព្រះរាជហឬទ័យ​ទុកដាក់ខ្ពស់បំផុត​ដល់កងកម្លាំងដោះមីនទាំងអស់របស់អង្គភាពCMAC ដែលកំពុងបំពេញកិច្ចប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាម។

លោកអគ្គនាយកស៊ីម៉ាក់បានមានប្រសាសន៍ថា« ទូលព្រះបង្គំយើងខ្ញុំទាំងអស់គ្នា សូមលំឱនកាយលើកអញ្ជលីប្រណម​បួងសួងដល់គុណបុណ្យព្រះរតនត្រ័យកែវទាំងបី ទេវតាថែរក្សាព្រះមហាស្វេតច្ឆ័ត្រ និងព្រះបារមីនៃអតីតព្រះមហាក្សត្រ ព្រះមហាក្សត្រីយានីខ្មែរគ្រប់ព្រះអង្គ និងវត្ថុស័ក្ដិសិទ្ធិក្នុងលោក សូមជួយបីបាច់តាមថែរក្សា និងប្រោះព្រំព្រះ​សព្វសា​ធុការពរ បវរមហាប្រសើរថ្វាយ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត សូមព្រះ​អង្គទ្រង់មានព្រះកាយពលមាំមួន ព្រះរាជសុខភាពល្អបរិបូណ៍ ព្រះរាជបញ្ញាញាណវាងវៃ ព្រះជន្មាយុយឺន​យូរជាងរយ​ព្រះវស្សា ចាកផុតពីព្រះរោគាព្យាធិនានា ដើម្បីទ្រង់គង់ប្រថាប់ជាម្លប់ដ៏ត្រជាក់ត្រជុំរបស់ប្រជានុរាស្រ្ដខ្មែរជាកូនជាចៅ រស់នៅប្រកបដោយសុខសន្ដិភាព និងវឌ្ឍនភាពជានិរន្ដន៍តរៀងទៅ»៕

អត្ថបទ៖ សំអឿន