លោក ស៊្រុន ពៅ៖ ជ្រូកចាប់ផ្តើមឡើងថ្លៃ តែមិនទាន់ដល់ថ្លៃដើមផលិតដែលអ្នកចិញ្ចឹមអាចចំណេញ

ទីផ្សារជ្រូកនៅកម្ពុជា ចាប់ផ្តើមឡើងថ្លៃវិញបន្តិច តែប្រធានសមាគមយល់ឃើញថា នៅតែមិនទាន់ដល់ថ្លៃដើមនៃការផលិត បើទោះបីជា​មានតម្រូវខ្ពស់នៅថ្ងៃបុណ្យចូលឆ្នាំចិន នាពេលខាងមុខនេះក៏ដោយ។

លោក ស៊្រុន ពៅ ប្រធានសមាគមអ្នកចិញ្ចឹមសត្វនៅកម្ពុជា បានប្រាប់កម្ពុជាថ្មីថា គិតមកដល់ពេលនេះ ជ្រូករស់នៅកម្ពុជា មានតម្លៃជាង ៧ពាន់រៀល ក្នុងមួយគីឡូក្រាម ដោយតម្លៃនេះមានការឡើងថ្លៃបន្តិច បើធៀបនឹងមួយរយៈពេលកន្លងទៅ ប៉ុន្តែមិនទាន់ដល់ថ្លៃដើមផលិតរបស់អ្នកចិញ្ចឹមនៅឡើយ ពោលគឺថ្លៃដើមផលិតជាង ៩ពាន់រៀល។

ប្រធានសមាគម បានបន្តទៀតថា អ្នកចិញ្ចឹមជ្រូកខាតអស់រយៈពេលជាងមួយឆ្នាំមកហើយ ខណៈដែលមកដល់ពេលនេះ មិនទាន់រកប្រាក់ចំណេញឃើញនៅឡើយ។ លោក បានឱ្យដឹងដូច្នេះថា«កសិករយើង បានដួលរលំសឹងថា ៨០-៩០%ទៅហើយ ដោយសព្វថ្ងៃនេះ មានតែកសិដ្ឋានចិញ្ចឹមធំៗប៉ុណ្ណោះនៅរឹងមាំ, ចំណែកកសិក បានទិញកូនជ្រូកពីកសិដ្ឋានយកទៅចិញ្ចឹម ដោយខាតជាបន្តបន្ទាប់ ក៏ផ្អាកការទិញ ដូច្នេះកសិដ្ឋានខ្លួនឯងត្រូវបង្ខំចិត្តពង្រីកទ្រុង ដើម្បីចិញ្ចឹមបន្ថែម»។

បើតាមលោក ស៊្រុន ពៅ មើលឃើញថា តម្លៃដែលកសិករ អាចទទួលយកបានពីការចិញ្ចឹមនេះ គឺចាប់ពី ១ម៉ឺនរៀល ក្នុងមួយគីឡូក្រាមឡើងទៅ ទើបមានពន្លឺនៃការការចំណេញបានខ្លះ តែបើតម្លៃនៅត្រឹម ៧ពាន់ ឬ៨ពាន់រៀល ក្នុងមួយគីឡូ កសិករ ឬកសិដ្ឋានប្រឈមនឹងការក្ស័យធនហើយ។

ប្រធានសមាគមអ្នកចិញ្ចឹមជ្រូក បានគូសបញ្ជាក់ទៀតថា បច្ចុប្បន្ននេះ កម្ពុជា មានតម្រូវការជ្រូកប្រមាណ ៧ពាន់ទៅ ៨ពាន់ក្បាលក្នុងមួយថ្ងៃ ខណៈដែលការផលិតបានរហូតដល់ជាងមួយម៉ឺនក្បាល ក្នុងមួយថ្ងៃ។ ដូច្នេះលោក ស៊្រុន ពៅ ធានាថា នៅរដូវកាលចូលឆ្នាំចិននេះ មិនមានការខ្វះខាតជ្រូកសម្រាប់ផ្គង់ផ្គង់ទីផ្សារឡើយ។

ស្របពេលដែលការផលិតជ្រូករបស់កម្ពុជា លើសតម្រូវការ អ្នកចិញ្ចឹមជ្រូកដែលជាសមាជិករបស់សមាគម បាននាំចេញជ្រូកទៅទីផ្សារប្រទេសវៀតណាមបានជាង២០ម៉ឺនក្បាល នៅរយៈពេលប៉ុន្មានខែកន្លងមកនេះ។ នេះបើតាមការបន្ថែមរបស់លោក ស៊្រុន ពៅ៕