នាយករដ្ឋមន្ត្រី ប្រាប់ទៅអាជ្ញាធរឱ្យរឹតបន្តឹងការផ្សាយគ្រឿងស្រវឹងលើផ្ទាំងប៉ាណូតាមទីសាធារណៈ

សម្ដេចនាយករដ្ឋមន្ត្រី ប្រាប់ទៅអាជ្ញាធរពាក់ព័ន្ធឱ្យរឹតបន្ដឹងការផ្សាយគ្រឿងស្រវឹងនៅលើផ្ទាំងប៉ាណូតាមទីសាធារណៈទូទាំងប្រទេស ខណៈសម្ដេចនាយករដ្ឋមន្ត្រី បានណែនាំក្រសួងពាក់ព័ន្ធរៀបចំបង្កើតក្រមប្រតិបត្តិមួយ ដើម្បីអនុវត្តចំពោះការផ្សព្វផ្សាយពាណិជ្ជកម្មគ្រឿងស្រវឹងនេះ។

ការណែនាំរបស់សម្ដេចធិបតីបែបនេះ ខណៈមានការសម្គាល់ឃើញថា ការផ្សព្វផ្សាយពាណិជ្ជកម្មគ្រឿងស្រវឹងកំពុងវាយ លុកយ៉ាងខ្លាំង និងយ៉ាងទូលំទូលាយ ជាពិសេសនៅតាមប្រព័ន្ធផ្សព្វផ្សាយ ក៏ដូចជាតាមរយៈនៅលើផ្ទាំងប៉ាណូនៅតាម ទីសាធារណៈនានាទូទាំងប្រទេសកម្ពុជា។

ដើម្បីកាត់បន្ថយការផ្សព្វផ្សាយនេះ ក្នុងឱកាសដឹកនាំកិច្ចប្រជុំពេញអង្គគណៈរដ្ឋមន្ត្រី នាព្រឹកថ្ងៃទី២ ខែកុម្ភៈ ឆ្នាំ២០២៤ នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំឱ្យអាជ្ញាធរពាក់ព័ន្ធនានាពិនិត្យមើលឡើងវិញអំពីការផ្សព្វផ្សាយពាណិជ្ជកម្មគ្រឿងស្រវឹង ជាពិសេសការផ្សព្វផ្សាយគ្រឿងស្រវឹងលើផ្ទាំងប៉ាណូតាមទីសាធារណៈ ដោយត្រូវកម្រិតឱ្យបានសមរម្យក្នុងការដាក់ផ្សាយ។ ទន្ទឹមនេះ សម្តេចធិបតី ក៏បានណែនាំឱ្យក្រសួងព័ត៌មាន សហការជាមួយក្រសួងសុខាភិបាល និងក្រសួងពាណិជ្ជកម្ម ដឹកនាំរៀបចំបង្កើតនូវក្រមប្រតិបត្តិមួយជាក់លាក់ ដើម្បីអនុវត្តចំពោះការផ្សព្វផ្សាយពាណិជ្ជកម្មគ្រឿងស្រវឹង។

បើតាមការគូសបញ្ជាក់ពីសម្ដេចធិបតី ការរឹតបន្តឹងលើការផ្សព្វផ្សាយពាណិជ្ជកម្មគ្រឿងស្រវឹងពេលនេះ គឺដើម្បីរួមចំណែកក្នុងការកាត់បន្ថយគ្រោះថ្នាក់ចរាចរណ៍ ដែលបង្កឡើងដោយសារការបើកបរក្រោមឥទ្ធិពលគ្រឿងស្រវឹង។

ជាការកត់សម្គាល់ ការណែនាំរបស់សម្ដេចនាយករដ្ឋមន្ត្រីនាពេលនេះ ស្របពេលដែលកម្លាំងសមត្ថកិច្ច បាននិងកំពុងអនុវត្តយុទ្ធនាការអនុវត្តរឹតបន្តឹងច្បាប់ចរាចរណ៍ផ្លូវគោក ជាពិសេសការត្រួតពិនិត្យលើអ្នកបើកបរស្ថិតក្រោមឥទ្ធិពលនៃគ្រឿងស្រវឹងនៅរាជធានីភ្នំពេញ៕