លោក ស សុខា ដេញអធិការរងនគរបាលក្រុងកំពតចេញពីក្របខណ្ឌ ព្រោះល្មើសវិន័យកងកម្លាំង

ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបណ្ដេញអធិការរងនគរបាលក្រុងកំពតចេញពីក្របខណ្ឌនគរបាលជាតិ ព្រោះតែល្មើសវិន័យកងកម្លាំង។ នេះបើតាមប្រកាសស្ដីពីការបណ្ដេញចេញពីក្របខ័ណ្ឌនគរបាលចុះថ្ងៃទី០២ ខែកុម្ភៈ តែទើបនឹងផ្សព្វផ្សាយនាថ្ងៃទី៦ ខែកុម្ភៈ។

តាមប្រកាសនោះ លោក ស សុខា បានអនុវត្តន៍វិន័យចំពោះអនុសេនីយ៍ឯក មាស ពិសិដ្ឋ អធិការរងនគរបាលក្រុងកំពត នៃស្នងការដ្ឋាននគរបាលក្រុងកំពត ក្រោមរូបភាពដកហូតមុខតំណែង ឋានន្តរស័ក្ដិ និងបណ្ដេញចេញពីក្របខ័ណ្ឌមន្ត្រីនគរបាលជាតិ។

ក្រោយរដ្ឋមន្ត្រីមហាផ្ទៃសម្រេចដេញអធិការក្រុងកំពតចេញពីក្របខ័ណ្ឌ ស្នងការនគរបាលខេត្តកំពត លោក ម៉ៅ ច័ន្ទមធុរិទ្ធ បានសរសេរនៅលើគណនីហ្វេសប៊ុកផ្ទាល់ខ្លួនថា អធិការរងនគរបាលក្រុងកំពតរូបនេះ គឺមានជាប់ពាក់ព័ន្ធនឹងការប្រើប្រាស់គ្រឿងញៀន។ សម្រាប់លោក ម៉ៅ ច័ន្ទមធុរិទ្ធ ទង្វើរបស់អធិការរងក្រុងកំពត គឺប៉ះពាល់ដល់កិត្តិយសកម្លាំងកិត្តិយសរបស់កងកំលាំងនគរបាលជាតិ។ ស្នងការខេត្តកំពត ក៏បានចាត់ការទុកការដេញចេញពីក្របខ័ណ្ឌនេះ ជាសារសម្រាប់ដាស់តឿនដល់កំលាំងដ៏ទៃទៀតត្រូវជៀសឱ្យឆ្ងាយពីគ្រឿងញៀន និងធ្វើជានគរបាលល្អសម្រាប់បំរើប្រជាពលរដ្ឋក្នុងមូលដ្ឋាន។

បើតាមប្រកាសរបស់ក្រសួងមហាផ្ទៃ ចាប់ពីខែឧសភា ឆ្នាំ២០២៤ តទៅ ប្រាក់បៀវត្ស និងប្រាក់ឧបត្ថម្ភផ្សេងៗរបស់ លោក មាស ពិសិដ្ឋ និងត្រូវបានលុបចេញពីក្របខ័ណ្ឌនគរបាលជាតិ៕