ឧត្តមសេនីយ៍ឯក ហ៊ុន ម៉ានិត ប្រាប់កងទ័ពនៅព្រំដែនបង្កើនកិច្ចសហការទប់ស្កាត់ឧក្រិដ្ឋកម្មឆ្លងដែន

ឧត្តមសេនីយ៍ឯក ហ៊ុន ម៉ានិត បានណែនាំឱ្យកងកម្លាំងប្រដាប់អាវុធ និងអាជ្ញាធរនៅតាមបណ្ដោយបន្ទាត់ព្រំដែន បង្កើនកិច្ចសហការជាមួយអាជ្ញាធរនៃប្រទេសជិតខាងក្នុងការទប់ស្កាត់ឧក្រិដ្ឋកម្មឆ្លងដែនគ្រប់ប្រភេទ ដើម្បីធានាដល់សន្តិសុខជាតិ និងអន្តរជាតិ។

ក្នុងឱកាសចុះជួបសំណេះសំណាលជាមួយកងទ័ព និងគ្រួសារកងទ័ព នៅទីបញ្ជាការវរសេនាតូចអន្តរាគមន៍លេខ២៨៣ នៃយោធភូមិភាគទី១ នៅក្នុងខេត្តស្ទឹងត្រែង នាថ្ងៃទី៦ ខែកុម្ភៈ ឆ្នាំ២០២៤ ឯកឧត្តម ឧត្តមសេនីយ៍ឯក ហ៊ុន ម៉ានិត អគ្គនាយកនៃអគ្គនាយកដ្ឋានស្រាវជ្រាវចារកិច្ច និងជាមេបញ្ជាការរងកងទ័ពជើងគោក បានណែនាំយ៉ាងដូច្នេះថា«កងកម្លាំងប្រដាប់អាវុធ និងអាជ្ញាធរគ្រប់ជាន់ថ្នាក់ ត្រូវបន្តសហការគ្នាជាមួយប្រទេសជាប់ព្រំដែនក្នុងការទប់ស្កាត់ឧក្រិដ្ឋកម្មឆ្លងដែន ការជួញដូរគ្រឿងញៀន ការជួញដូរមនុស្ស និងបទល្មើសផ្សេងៗទៀត ដែលអាចជះឥទ្ធិពលដល់សន្តិសុខក្នុងប្រទេស និងក្នុងតំបន់ ហើយជាមួយគ្នានេះ ត្រូវប្រែក្លាយតំបន់ព្រំដែន ជាតំបន់សន្តិភាព និងការអភិវឌ្ឍ»។

ឯកឧត្តម ឧត្តមសេនីយ៍ឯក ហ៊ុន ម៉ានិត ក៏បានជំរុញដល់កងកម្លាំងប្រដាប់អាវុធគ្រប់ប្រភេទទាំងអស់ បន្តចូលរួមគាំទ្រ និងអនុវត្ត ប្រកបដោយឆន្ទៈ និងភាពស្មោះត្រង់ ទៅលើគោលនយោបាយរបស់រាជរដ្ឋាភិបាល ក្រោមការដឹកនាំរបស់សម្ដេចធិបតី ហ៊ុន ម៉ាណែត ជានាយករដ្ឋមន្ត្រីនៃកម្ពុជា និងគាំទ្រកំណែទម្រង់លើវិស័យយោធា ការធ្វើទំនើបកម្មយោធា ជាពិសេសប្តេជ្ញាថែរក្សាការពារសុខសន្តិភាពឱ្យខានតែបាន៕