សហគមន៍ទេសចរណ៍​​បង្កើត​ដោយ​ជនជាតិភាគតិច​មួយ​នៅ​​ខេត្ត​រតនគិរី ស្នើសប្បុរសជន​ជួយ​ផ្គត់ផ្គង់សម្ភារៈ

បន្ទាប់ពីទទួល​បាន​ព័ត៌មានពី​គ្រុបតេលេក្រាមដែលមាន​​អាខោនហ្វេសប៊ុក​ឈ្មោះ MlN បានអំពាវនាវ​ឲ្យសប្បុរសជន​ជួយសម្ភារៈ​​ដូចជា ចានបង្គន់ និងស៊ីម៉ង់ត៍ សម្រាប់​យកទៅ​អភិវឌ្ឍ​សហគមន៍ទេសចរណ៍​ណាំងក្លាងទឹកវិល ស្ថិតក្នុងភូមិរ៉ក់ ឃុំកុកឡាក់ ស្រុកវើនសៃ ខេត្តរតនគិរី លោក ញ៉ែម សំអឿន អភិបាលខេត្តរតនគិរីបានបញ្ជា​ឲ្យអាជ្ញាធរ​ចុះស្រាវជ្រាវ​ទីតាំងសហគមន៍ដើម្បី​ឆ្លើយតបការ​ស្នើសុំពី​សហគមន៍​ដែលកំពុង​ប្រឈម​ការ​ខ្វះខាតសម្ភារៈបម្រើ​ការអភិវឌ្ឍន៍​សហគមន៍ទេសចរណ៍​ក្នុង​មូលដ្ឋាន។

​អាខោនហ្វេសប៊ុក “ផេក” ឈ្មោះ MlN បានសរសេរសំណេរថា «សូមគោរពជូនទៅដល់សប្បុរសជនទាំងអស់ក្នុងស្រុក និង​ក្រៅស្រុកតំបន់ទេសចរណ៍មួយនេះ បង្តើតឡើងដោយក្រុមសហគមន៍បងប្អូនជនជាតិដើមភាគតិច។ ឥឡូវនេះកំពុង​រៀបចំ​បង្គន់អនាម័យ បន្ទប់ទឹក សម្រាប់ពុកម៉ែបងប្អូនដែលមកលេងកម្សាន្ត ដោយមានការខ្វះខាតខាងសហគមន៍ កំពុងត្រូវការជំនួយដូចជា ចានបង្គន់ និងស៊ីម៉ង់ត៍ ទីតាំងនៅត្រង់ចំណុចណាំងក្លាងទឹកវិល ស្ថិតក្នុងភូមិរ៉ក់ ឃុំកុកឡាក់ ស្រុកវើនសៃ ខេត្តរតនគិរី»។

លោក ញ៉ែម សំអឿន អភិបាលខេត្តបានសរសេរឆ្លើយតបជាមួយអ្នកសារព័ត៌មាននៅរសៀលថ្ងៃទី ១២ កុម្ភៈដោយ​បញ្ជាឲ្យលោក ហេង សាវឿន អភិបាលស្រុកវើនសៃឲ្យចុះពិនិត្យមើលទីតាំង​និងរាយការណ៍ជាមួយ​រូបភាពមកផងដែរ។

លោក ហេង សាវឿន អភិបាលស្រុកវើនសៃបានឆ្លើយតបទៅ​អភិបាលខេត្តតាមប្រព័ន្ធតេលេក្រាមនៅរសៀលថ្ងៃដដែលថា ទីតាំង​សហគមន៍​ទេសចរណ៍​ណាំងក្លាងទឹកវិល ​​ពិតជាមាននៅក្នុងឃុំកុកឡាក់ពិតប្រាកដមែន។

លោក ហេង សាវឿន អភិបាលស្រុកបន្តថា ពាក់ព័ន្ធបង្គន់អនាម័យកំពុង​រៀបចំ​នៅ​តាម​ភូមិក្នុង​​ឃុំកុកឡាក់អាចបញ្ចប់ក្នុងខែមិនានេះ។

​រដ្ឋបាលស្រុកវើនសៃជម្រាបជូនលោកអភិបាល នៃគណៈអភិបាលខេត្តរតនគិរីអំពីតំបន់ទេសចរណ៍តាមដងអូរឡាឡៃ ឃុំកុកឡាក់ ស្រុកវើនសៃ។

នៅក្នុងឃុំកុកឡាក់ មានកន្លែងកម្សាន្តធម្មជាតិជាច្រើនកន្លែងតាមដងអូរឡាឡៃ ហើយកន្លែងកម្សាន្តចំនួន ២ កន្លែង មាន​ជួរ​ទឹកណាំងង៉ាម និងណាំងក្លាងទឹកវិល ដែលកំពុងស្នើសុំបង្កើតគណៈកម្មការគ្រប់គ្រងសហគមន៍ដោយឈ្មោះ ម៉ូច ឌឹម ភេទប្រុស អាយុ ៤០ ឆ្នាំ ជនជាតិកាវ៉ែត មានទីលំនៅភូមិរ៉ក់ ឃុំកុកឡាក់ ស្រុកវើនសៃ ខេត្តរតនគិរី និងមានការចូលរួម​ពី​អាជ្ញាធរភូមិ ចាស់ទុំភូមិ និងក្រុមយុវជនភូមិនៃឃុំកុកឡាក់ និងកំពុងតែរៀបចំហេដ្ឋារចនាសម្ព័ន្ធផ្សេងៗដូចជាបង្គន់ អនាម័យ និងផ្លូវចូលចូលកន្លែងកម្សាន្ត ដែលមានការខ្វះខាតធនធានក្នុងការរៀបចំពិតប្រាកដមែន។

ណាំងក្លាងទឹកវិល ជាកន្លែងរមណីយដ្ឋានមួយនៅឆ្ងាយពីទីរួមស្រុក។ បើ​ក្រឡេកមើលទេសភាពដ៏ស្រស់បំព្រងមានបង់អង្គុយ​ដូចជាដើមឬស្សីនៅក្បែរមាត់ទឹក ព្រៃឈើដុះអមសងខាងទឹកអូរមានពណ៌ខៀវស្រងាត់ចង់មកគយគន់អង្គុយលេង ជាពិសេសអ្នកដែលមានគូសង្សារ មកទស្សនានិងដើរលេងនៅកន្លែងរមណីយដ្ឋានមួយនេះ៕

អត្ថបទ៖ វុទ្ធឦសាន