ព័ត៌មានជាតិ

រដ្ឋមន្ត្រីអប់រំ ចុះពិនិត្យការរៀន និងបង្រៀន នៅគ្រឹស្ថានសិក្សា ក្នុងខេត្តកំពង់ធំ

បានផុស

២ years មុន

នៅ

ថ្ងៃពុធ ២១ កុម្ភៈ ២០២៤

ដោយ

នៅថ្ងៃទី២០ ខែកុម្ភៈ ឆ្នាំ២០២៤ នេះ បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានដឹកនាំក្រុមការងារទស្សនកិច្ច ពិនិត្យការងាររៀន និងបង្រៀននៅគ្រឹស្ថានសិក្សា ក៏ដូចជាឈ្វេងយល់ពីមតិយោបល់ បញ្ហាប្រឈមផ្សេងៗ នៅស្ថានសិក្សា ចំនួន៣ ក្នុងខេត្តកំពង់ធំ គឺ វិទ្យាល័យហ៊ុនសែនស្រះបន្ទាយ អនុវិទ្យាល័យ ហ៊ុនសែនគ្រើលអណ្តូងពោធិ៍ ក្នុងស្រុកតាំងគោក និងសាលាបឋមសិក្សាបឹងត្បូង ក្នុងស្រុកបារាយណ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មានប្រសាសន៍ក្នុងឱកាសនេះ បណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណចំពោះគណៈគ្រប់គ្រងសាលា ក៏ដូចជាលោកគ្រូអ្នកគ្រូ ដែលខិតខំប្រឹងប្រែងយកអស់កម្លាំងកាយចិត្តបំពេញភារកិច្ច ដឹកនាំបង្ហាត់បង្រៀនសិស្សឱ្យទទួលបានលទ្ធផលល្អក្នុងការសិក្សា និងស្នើឱ្យបន្តរក្សាស្មារតីសហការគ្នាចូលរួមអនុវត្តកំណែទម្រង់វិស័យអប់រំនៅកម្ពុជាឱ្យកាន់តែរីកចម្រើនទៅមុខទៀត។

ជាមួយនេះដែរ ដើម្បីកែលម្អការបង្រៀនឱ្យកាន់តែប្រសើរ ឈានទៅលើកកម្ពស់លទ្ធផលសិក្សាសិស្សបន្ថែមទៀត បណ្ឌិតសភាចារ្យ ឧបនាយករដ្ឋមន្ត្រី បានណែនាំ ឱ្យរៀបចំរបៀបបង្រៀនថ្មីៗ ដោយផ្ដោតលើការពង្រឹងសមត្ថភាពរិះគិត វិភាគស៊ីជម្រៅ បង្រៀនឱ្យសិស្សមានភាពឆ្លាតវៃចេះបកស្រាយ រកអំណះអំណាង ស្វែងរកគោលគំនិតសំខាន់ៗតាមរយៈការអានឱ្យបានច្រើន និងផ្ដោតលើការពង្រឹងសមត្ថភាពដែលផ្សារភ្ជាប់នឹងការរស់នៅជាក់ស្ដែង អាចយកចំណេះដឹងមកប្រើប្រាស់ក្នុងជីវភាពប្រចាំថ្ងៃ ក៏ដូចជាការរៀបចំកម្មវិធីក្រៅម៉ោងសិក្សា បង្កើតជាគម្រោងផ្សេងៗ និងក្លឹបស្វ័យសិក្សាជាដើម បន្ថែមពីលើកម្មវិធីរៀនពេញមួយថ្ងៃ៕