ព័ត៌មានជាតិ

មន្ត្រីជាន់ខ្ពស់ ប.ស.ស ៖ ធនធានមនុស្ស ជាឆ្អឹងខ្នងរបស់អង្គភាពក្នុងការផ្ដល់សេវាប្រកបដោយគុណភាព និងប្រសិទ្ធភាព

បានផុស

២ years មុន

នៅ

ថ្ងៃព្រហស្បតិ៍ ២៩ កុម្ភៈ ២០២៤

ដោយ

មន្ត្រីជាន់ខ្ពស់ បេឡាជាតិរបបសន្តិសុខសង្គម(ប.ស.ស) បានចាត់ទុកធនធានមនុស្ស គឺជាឆ្អឹងខ្នងរបស់អង្គភាពក្នុងការផ្តល់សេវាជូនសមាជិក ប.ស.ស ប្រកបដោយគុណភាព ប្រសិទ្ធភាព និងទទួលបានលទ្ធផលខ្ពស់ជូនអង្គភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំត្រួតពិនិត្យលទ្ធផលការងារសម្រេចបានប្រចាំខែរបស់នាយកដ្ឋានរដ្ឋបាល និងគ្រប់គ្រងធនធានមនុស្ស កាលពីថ្ងៃទី ២៨ កុម្ភៈ លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស បានឱ្យដឹងថា ធនធានមនុស្ស គឺជាឆ្អឹងខ្នងរបស់អង្គភាពនៅក្នុងការផ្តល់សេវាប្រកបដោយគុណភាព ប្រសិទ្ធភាព និងទាន់ពេលវេលា ក្នុងការបម្រើសេវាជូនសមាជិក ប.ស.ស ក៏ដូចជាប្រជាពលរដ្ឋ ដូច្នេះនាយកដ្ឋានរដ្ឋបាល និងគ្រប់គ្រងធនធានមនុស្ស មានភារកិច្ចសំខាន់ណាស់ក្នុងការរៀបចំវគ្គបណ្ដុះបណ្ដាលផ្សេងៗ ការអនុវត្តបទបញ្ជាផ្ទៃក្នុង ការគ្រប់គ្រងលើពេលវេលាធ្វើការ ជាពិសេសត្រូវត្រួតពិនិត្យ និងរក្សាសណ្ដាប់ធ្នាប់ការចេញ-ចូលរបស់បុគ្គលិក ប.ស.ស និងភ្ញៀវ តាមរយៈការផ្ដល់ និងត្រួតពិនិត្យប័ណ្ណសម្គាល់ខ្លួន។

ក្នុងឱកាសនោះដែរ លោកបណ្ឌិតអគ្គនាយករង បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងពុះពាររាល់ការលំបាកក្នុងការបំពេញការងារបម្រើស្ថាប័នរហូតស្តែងឡើងនូវផ្លែផ្កាគួរឱ្យកត់សម្គាល់នាពេលកន្លងមកនេះ។

ជាមួយគ្នានេះ លោកបណ្ឌិតអគ្គនាយករង ក៏បានលើកទឹកចិត្តដល់មន្ត្រីបុគ្គលិកទាំងអស់ផងដែរ ឱ្យបន្តប្រពៃណីក្នុងការប្រកាន់ខ្ជាប់នូវក្រមសីលធម៌ដ៏ល្អរបស់ខ្លួនកាន់តែប្រសើរឡើងថែមទៀត ដោយធ្វើយ៉ាងណាសំដៅបំពេញកិច្ចការដែលត្រូវអនុវត្តកាន់តែមានប្រសិទ្ធភាព ទទួលបាននូវលទ្ធផលកាន់តែខ្ពស់ និងប្រសើរឡើងជាលំដាប់៕

អត្ថបទ ៖ សំអឿន