សមាគមស្វាយចន្ទី ​ប្រកាសឱ្យកសិករ ហាលគ្រាប់ចន្ទីទុក ចំពេលតម្លៃកំពុងធ្លាក់ចុះ

សមាគមស្វាយចន្ទីកម្ពុជា (សសក) ​បានអំពាវនាវឱ្យសមាជិករបស់ខ្លួន ​ផ្អាកលក់គ្រាប់ចន្ទីជា​បណ្ដោះ​អាសន្នស្របពេលដែលតម្លៃកំពុងធ្លាក់ចុះ ​ខណៈបាតុភូតអែលនីណូ បានបង្ករជាផលប៉ះ​ពាល់​យ៉ាងខ្លាំងលើផលិតកម្មស្វាយចន្ទីក្នុងប្រទេសកម្ពុជា។

​លោក អួន ស៊ីឡុត ​ប្រធានសមាគមស្វាយចន្ទីកម្ពុជា ​បានឱ្យដឹងនៅថ្ងៃទី ០៥ ខែមីនា ឆ្នាំ ២០២៤ នេះថា ​តម្លៃគ្រាប់ស្វាយចន្ទីបច្ចុប្បន្នធ្លាក់មកនៅត្រឹម ៤.៣០០ រៀល ក្នុង១គីឡូ ដែល​សមាគម​ចាត់ទុកថាជាតម្លៃទាប។​

លោក អួន ស៊ីឡុត បានបញ្ជាក់ថា ​ដោយសារការអូសបន្លាយកម្តៅជាង ៤០អង្សា ធ្វើឱ្យស្វាយចន្ទីគាំង​ផ្កាមិន​ចេញក្តឹប និងផ្កាក្រៀមខូចជាបណ្តើរៗ។

សមាគមស្វាយចន្ទីកម្ពុជា បានព្យាករណ៍កាលពីដើមខែមករា ២០២៤ ថាទិន្នផលស្វាយចន្ទី នាឆ្នាំ ២០២៤នេះ នឹងថយចុះចន្លោះពី ១០% ទៅ ៣០% បើធៀបនឹងឆ្នាំ ២០២៣។ បើទោះបីជាទិន្នផល កំពុងធ្លាក់ចុះក្តី តម្លៃគ្រាប់ស្វាយចន្ទីឆៅបែរជាធ្លាក់ចុះយ៉ាងគំហុក ដែលមិនសមទាល់តែសោះ។

សមាគមស្វាយចន្ទីកម្ពុជា បាននឹងកំពុងណែរនាំ សមាជិករបស់ខ្លួនឱ្យ​ហាលគ្រាប់ទុក​រងចាំតម្លៃប្រសើឡើងនៅខែកក្កដា ឬខែកញ្ញា។ 

លោក អួន ស៊ីឡុតថ្លែងថា៖ «ហាលគ្រាប់ទុកបើមានលទ្ធភាព កុំឲ្យឈ្មួញបរទេសបានចិត្ត ចន្ទីខូច​ច្រើនណាស់ឆ្នាំនេះ មិនគួរធ្លាក់ថ្លៃទេ! អ្នកមានលទ្ធភាពគួរហាលទុក កុំលក់ប្រជែងជាមួយ​កសិករតូចតាច រើសក្រុមហ៊ុនល្អ សម្រាំងគុណភាពគ្រាប់»។

ទិន្នន័យខែមករា ២០២៤ នេះបញ្ជាក់ថា កម្ពុជាបាននាំគ្រាប់ចន្ទីឆៅទៅវៀតណាម កើនឡើង៥០% បើធៀបនឹងរយៈពេលដូចគ្នាក្នុងឆ្នាំ ២០២៣។

លោកអួន ស៊ីឡុត បញ្ជាក់ថា ការកើនឡើងការនាំចេញគ្រាប់ស្វាយចន្ទីទៅវៀតណាមនេះ មិនមែនជាគ្រាប់ចន្ទីក្នុងឆ្នាំ ២០២៤នោះទេ ដ្បិតរដូវប្រមូលផលចន្ទីនៅកម្ពុជាគឺពាក់កណ្តាលខែកុម្ភៈ។ ការធ្លាក់ទិន្នផលស្វាយចន្ទីនៅកម្ពុជា អាចបង្កើនតម្លៃគ្រាប់កែច្នៃលើទីផ្សារអន្តរជាតិនាឆ្នាំ២០២៤នេះ។

ដើម្បីរក្សាតម្លៃស្វាយចន្ទីឱ្យមានស្ថេរភាព សមាគមស្វាយចន្ទីកម្ពុជាបានបញ្ចុះបញ្ចូលសមាជិករបស់ខ្លួន និងកសិករដទៃឱ្យបន្ថយ និងរក្សារចម្ការត្រឹម ៥០០ ០០០ហិកតា សម្រាប់តែផ្គត់ផ្គង់ការកែច្នៃក្នុងស្រុក ដែលអាចត្រូវការ ៣០ រោងចក្របន្ថែមទៀត បច្ចុប្បន្នកម្ពុជា​មាន រោងចក្រធុនមធ្យមចំនួន ៧។

សមាគមស្វាយចន្ទីកម្ពុជា នឹងធ្វើទស្សនកិច្ចផ្លូវការនៅអាហ្វ្រិកខាងលិចនាពាក់កណ្តាលខែមីនានេះ ដើម្បីចូលរួមជាមួយបណ្តារប្រទេសផលិតគ្រាប់ចន្ទីឆៅ។

​សម្ព័ន្ធភាពអ្នកដាំចន្ទីអាហ្វ្រិក នៅទីក្រុង​អាក្រា ប្រទេសហ្កាណា ស្វាគមន៍ចំពោះទស្សនកិច្ចនេះ​ និង​រីករាយចំពោះសហប្រតិបត្តិការ​លើ​ជំនួញ​ស្វាយចន្ទី។ ប្រធានបទមួយចំនួននឹងត្រូវលើកឡើង ក្នុង​ជំនួបក្រៅផ្លូវការ ស្តីពីការ​ប្រែប្រួល​អាកាសធាតុ និងការថយចុះផលិតកម្មស្វាយចន្ទី៕