ប្រមុខរាជរដ្ឋាភិបាល៖ ធានាគុណភាពមន្ត្រី ជាការធានានូវគុណភាពក្នុងវិស័យសុខាភិបាលទាំងមូល

ប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត បានថ្លែងថា ការពង្រឹងទៅលើគុណភាពធនធានមនុស្សក្នុងវិស័យសុខាភិបាល គឺជាកត្តាដ៏សំខាន់ដើម្បីធានាបានថា គុណភាពនៃវិស័យសុខាភិបាលរបស់កម្ពុជានឹងកាន់តែមានប្រសិទ្ធភាព និងរីកចម្រើនថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចធិបតី ថ្លែងបែបនេះ ក្នុងឱកាសអញ្ជើញជាអធិបតីភាពក្នុងពិធីបិទសន្និបាតសុខាភិបាល លើកទី៤៣ នារសៀលថ្ងៃទី១៩ ខែមីនា ឆ្នាំ២០២៤នេះ នៅសណ្ឋាគារសូហ្វីតែលភ្នំពេញ។ សម្ដេចធិបតី ហ៊ុន ម៉ាណែត បានថ្លែងថា ឆ្លើយតបនឹងការពង្រឹងគុណភាពធនធានមនុស្សក្នុងវិស័យសុខាភិបាល គឺត្រូវផ្ដោតលើការបណ្ដុះបណ្ដាល ការរើសមន្ត្រីចូលបម្រើការងារ ទាំងមន្ត្រីសុខាភិបាលថ្មី និងទាំងមន្ត្រីដែលមានស្រាប់ ដែលអាចទាញពីប្រភពខាងក្រៅ។

សម្ដេចធិបតី បានបញ្ជាក់ដូច្នេះថា៖ «ធានាគុណភាពមន្ត្រីសុខាភិបាល គឺធានាគុណភាពដល់វិស័យសុខាភិបាល យើងនិយាយអំពីរឿងសម្ភារៈ គ្រឿងបំពាក់ ឧបករណ៍ នេះជាកត្តាសំខាន់ តែបើគ្មានមនុស្សទេ យើងទៅមិនរួចទេ»។

សម្ដេចនាយករដ្ឋមន្ត្រី បន្តថា មនុស្សនេះហើយ ជាកត្តាយ៉ាងសំខាន់ ហើយនៅក្នុងអាណត្តិនេះ រាជរដ្ឋាភិបាល បាននិងកំពុងរៀបចំរូបមន្តយ៉ាងណាឱ្យមានភាពបត់បែន និងធានានូវប្រសិទ្ធភាពតែម្ដងក្នុងវិស័យសុខាភិបាល។ សម្ដេច​ សង្កត់ធ្ងន់ថា ការបណ្ដុះបណ្ដាលធនធានមនុស្ស ត្រូវតែបន្តជំរុញ និងបន្តយកចិត្តទុកដាក់ខ្ពស់ក្នុងការធានាគុណភាពវិស័យសុខាភិបាល៕