ខេត្តកំពង់ចាម គ្រោងនឹងសាងសង់កំពង់ផែទេសចរណ៍មួយតាមបណ្តោយមាត់ទន្លេក្នុងក្រុង

ខេត្តកំពង់ចាម គ្រោងនឹងកសាងកំពង់ផែទេសចរណ៍មួយ ខណៈបច្ចុប្បន្នកំពុងចុះសិក្សា និងវាយតម្លៃទីតាំងផ្ទាល់ ដេីម្បីបម្រើលេីវិស័យទេសចរណ៍នៅក្នុងខេត្តឲ្យកាន់តែមានភាពទាក់ទាញបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅព្រឹកថ្ងៃទី ២៦ ខែមីនា ឆ្នាំ២០២៤ លោក គឹម សាន់ អនុរដ្ឋលេខាធិការ ក្រសួងសាធារណការ និងដឹកជញ្ជូន អមដំណេីរ ដោយ លោក ហេង វណ្ណនី អភិបាលរងខេត្តកំពង់ចាម តំណាង លោក អ៊ុន ចាន់ដា អភិបាលខេត្តកំពង់ចាម រួមនឹងអាជ្ញាធរមូលដ្ឋានបានធ្វេីការចុះសិក្សាគម្រោងសាងសង់កំពង់ផែទេសចរណ៍ក្នុងក្រុងកំពង់ចាម ខេត្តកំពង់ចាម ។

លោក គឹម សាន់ អនុរដ្ឋលេខាធិការ ក្រសួងសាធារណការ និងដឹកជញ្ជូន បានបញ្ជាក់ប្រាប់ ថា បច្ចុប្បន្ន មន្ត្រី ជំនាញរួមនឹងមន្ត្រីបច្ចេកទេសក្រសួងបានធ្វេីការចុះមកសិក្សា និងវាយតម្លៃរកទីតាំងមួយសមស្របដោយជាកន្លែងទាក់ទាញមួយ នៅបណ្តោយមាត់ទន្លេក្នុងក្រុងកំពង់ចាម ដេីម្បីរៀបចំផែនការសិក្សាផលប៉ះពាល់ និងលេីកផែនការកសាងកំពង់ផែទេសចរណ៍មួយដ៏ទាក់ទាញ  និងអាចឲ្យនាវាទេសចរណ៍សំចតបានត្រឹមត្រូវ មានសណ្តាប់ធ្នាប់ល្អ។ លោកបន្ថែមទៀតថា  គម្រោងសិក្សាកំពង់ផែនេះ  នឹងធ្វេីការសាង់សងដោយអាចសំចតនាវាទេសចរណ៍បានពី៤ទៅ៥គ្រឿង  និងមានកន្លែងសម្រាប់សម្រាកអង្គុយរង់ចាំមានផាសុភាពល្អ។ កន្លងមកនាវាទេសចរណ៍គឺសំចកគ្មានកន្លែងត្រឹមត្រូវនិងច្បាស់លាស់ឡេីយ  ។

លោក គឹម សាន់ អនុរដ្ឋលេខាធិការ ក្រសួងសាធារណការ និងដឹកជញ្ជូន បន្ថែមទៀតថា ជាលទ្ធផល ក្រោយចុះពិនិត្យតាមដងទន្លេ និងកំណត់ជម្រៅទឹកទីតាំងច្បាស់លាស់រួចមក ក្រុមការងារ នឹងធ្វេីសំណេីរដាក់ទៅរដ្ឋមន្ត្រីក្រសួងសាធារណការ និងដឹកជញ្ជូន ដេីម្បីធ្វេីការសម្រេចនិងផ្តល់អនុសាសន៍វិលត្រឡប់វិញ៕

អត្ថបទ៖ ឡេក ចាន់ពេជ្រ