​សហគមន៍កសិកម្មទំនើបស្រូវនាងអំ នៅខេត្តសៀមរាប​ ទទួលបានថវិកាកម្ចី ១០ ម៉ឺនដុល្លារ

សហគមន៍កសិកម្មទំនើបស្រូវនាងអំ​ទទួលបានថវិកាកម្ចី ១០ ម៉ឺនដុល្លារពីធនាគារវីង ​កាលពីពេលថ្មីៗនេះ ដែលមានអត្រាការប្រាក់ទាប។

​លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យនៃក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៦ ខែមីនា ឆ្នាំ២០២៤ បានដឹកនាំក្រុមការងារ និងដៃគូអភិវឌ្ឍន៍ ទៅទស្សន​កិច្ចសហគមន៍កសិកម្មទំនើបស្រូវនាងអំនៅភូមិ​សែនជ័យ ឃុំកន្ទួត ស្រុកស្វាយលើ ខេត្តសៀមរាប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំនោះ លោក ឃឹម ហ្វីណង់ បានណែនាំទៅតំណាងសហគមន៍កសិកម្មទំនើបស្រូវ​នាងអំ ស្ថិតនៅភូមិសែនជ័យ ខេត្តសៀមរាប ដែលទើបនឹងទទួលបានកម្ចីពីធនាគារវីងចំនួន១០​ម៉ឺនដុល្លារ កាលពីថ្ងៃទី២២ ខែមីនា ឆ្នាំ២០២៤ ដោយធានាគារគិតអត្រាការប្រាក់ទាប ដើម្បីងាយ​ស្រួល​ឱ្យសហគមន៍កសិកម្មទំនើបស្រូវនាងអំ យកទៅចំណាយផ្សេងៗលើការដាំដុះស្រូវនាងអំ។

លោក ឃឹម ហ្វីណង់ ​មានប្រសាសន៍ថា ប្រជាសហគមន៍កសិកម្មទំនើបស្រូវនាងអំ ដែលទើបនឹង​ទទួលបានថវិកាពីធនាគារវីង ត្រូវធ្វើចាត់ចែងចំណាយថវិកានោះឱ្យមានប្រយោជន៍ក្នុងការភ្ជួរដី កែលម្អដី សម្រាប់ដាំស្រូវ នាងអំដើម្បីកុំឱ្យ​ខាត។ បន្ថែមពីនេះ លោកលើកទឹកចិត្តដល់ប្រជា​សហគមន៍ត្រូវជ្រើសរើសពូជសុទ្ធមានស្តង់ដារតែមួយ ដើម្បីឱ្យស្រូវដែល​ផលិតបានលក់បានតម្លៃ​ខ្ពស់នៅលើទីផ្សារ។

មន្ត្រីនាំពាក្យក្រសួងកសិកម្មរូបនេះ បញ្ជាក់ថា ក្រុមការងារក្រសួងកសិកម្មក៏បានចាត់ចែងមន្ត្រីជំនាញបច្ចេកទេសឱ្យនៅកៀកកិតប្រជាសហគមន៍កសិកម្មទំនើបជាប្រចាំ ដើម្បីជួយដល់ប្រជាសហគមន៍ឱ្យដាំស្រូវទទួលបានទិន្នផលខ្ពស់ ដោយសារ​សហគមន៍​កសិកម្មទំនើបនេះត្រូវផ្សារភ្ជាប់ទៅរកទីផ្សារមុននឹងធ្វើការផលិត។

លោក ឃឹម ហ្វីណង់ អះអាងថា ក្រសួងកសិកម្មនឹងធ្វើការកៀគរដៃគូអភិវឌ្ឍន៍នានា ជាពិសេសក្រុមហ៊ុនធំៗឱ្យមកចុះ​MOU ដើម្បីទទួលទិញស្រូវនាងអំពីប្រជាសហគមន៍កសិកម្មទំនើប ដើម្បីឱ្យប្រជាសហគមន៍លក់បានតម្លៃខ្ពស់នៅលើទីផ្សារ និងទទួលបានផលចំណេញច្រើន​ស្របតាម​ផែនការដែលបានរំពឹងទុក៕