អភិបាល​ខេត្ត​រតនគិរី ហាមមិនឲ្យសមត្ថកិច្ច​​ទារ​លុយពីពលរដ្ឋដឹកផ្លែសំរង

លោក ញ៉ែម សំអឿន អភិបាលខេត្តរតនគិរី និងជាប្រធានគណៈបញ្ជាការឯកភាពខេត្តបានដាក់បទបញ្ជាយ៉ាងម៉ឹងម៉ាត់ ដល់កម្លាំងទាំង ៣ ចាប់ពីថ្នាក់ខេត្ត និងស្រុកតាវែង ស្រុកវើនសៃ ស្រុកអណ្តូងមាស និងក្រុងបានលុង ពិនិត្យមើលនិងណែនាំដល់កម្លាំងហាមទារលុយពីប្រជាពលរដ្ឋ រើសនិងដឹកសំរងជាដាច់ខាត និងត្រូវតាមចាប់ជនណាដែលយកឈ្មោះកម្លាំងប្រើប្រាស់ដើម្បីជំរិតទារលុយ។

លោកអភិបាលខេត្ត បានចាត់ទុកការយកលុយពីប្រជាពលរដ្ឋដែលដឹកផ្លែសំរង និងរើសសំរងជាអំពើចាប់ជំរិត។ ចំណែកប្រជាពលរដ្ឋមិនត្រូវជូនប្រាក់ដល់អ្នកណាឡើយ ហើយបើមានជនណាទារលុយ អាចរាយការណ៍មកលោកផ្ទាល់នូវឈ្មោះជននោះ មុខងារនិងទីតាំងដែលជំរិត។

លោកអភិបាលខេត្ត ក៏បានផ្តាំផ្ញើដល់បងប្អូនប្រជាពលរដ្ឋដែលទៅរើសផ្លែសំរង សូមថែរក្សា​សុខភាព និងប្រយ័ត្នប្រយ៉ែង សូមកុំកាប់ដើមសំរង៕

អត្ថបទ៖​ វុទ្ធឦសាន