ភ្លើងឆេះព្រៃ ទប់ស្កាត់មិនបាន រាលឆេះដល់ផ្ទះពលរដ្ឋ

លំនៅដ្ឋានរបស់ប្រជាពលរដ្ឋមួយខ្នង ត្រូវបានអគ្គិភ័យលេបត្របាក់ទាំងស្រុង ដែលបញ្ហានេះបណ្ដាលមកពីភ្លើងឆេះព្រៃហើយទប់ស្កាត់មិនទាន់ទើបរាលដល់ផ្ទះពលរដ្ឋបែបនេះ។

ហេតុការណ៍នេះ​ បានកើតឡើងកាលពីថ្ងៃទី២៦ ខែមេសា ឆ្នាំ២០២៤ វេលាម៉ោង ៣រសៀល គឺមានករណីភ្លើងឆេះផ្ទះចំនួនមួយលើក នៅចំណុចភូមិស្ពានទំនាប ឃុំបួរ ស្រុកភ្នំព្រឹក ខេត្តបាត់ដំបង។

បើតាមការរៀបរាប់ពីម្ចាស់ផ្ទះ​ឈ្មោះ ង៉ែត សុីម ភេទប្រុស អាយុ៥១ឆ្នាំ និងប្រពន្ធឈ្មោះ ពៅ ពេជ្រ ភេទ ស្រី អាយុ៥៣ ឆ្នាំ បានបញ្ជាក់ថា នៅមុនពេលកើតហេតុ មានភ្លើងឆេះព្រៃរបស់ក្បែរភូមិ ប៉ុន្តែដោយសារតែពុំមានវិធានការណាមួយទប់ស្កាត់ឲ្យបានទាន់ពេលទើបភ្លើងនោះបានរាលមកដល់ផ្ទះរបស់ខ្លួនតែម្ដង រហូតដល់ឆេះទាំងស្រុង។ ផ្ទះនេះ សាងសង់ អំពីឈើ ដំបូលប្រក់សង្ក័សី មានទំហំ ៦មx៨ម ឆេះអស់ទាំងស្រុង។

ដោយឡែក សមត្ថកិច្ចមូលដ្ឋាន ក៏បានបញ្ជាក់អំពីមូលហេតុដែរថា ដោយសារភ្លើងឆេះព្រៃ បណ្តាលឱ្យរាលឆេះដល់ផ្ទះនេះ ហើយក៏ចេញរថយន្តពន្លត់អគ្គិភ័យមិនទាន់ដែរ ព្រោះការឆាបឆេះនេះវាមានសន្ទុះលឿនខ្លាំងពេក៕

អត្ថបទ៖ សោ និយមរ័ត្ន