ស្ថានទូតរុស្ស៊ីប្រចាំកម្ពុជា រៀបចំពិធីគោរពវិញ្ញាណក្ខន្ធទាហានរបស់ខ្លួនក្នុងសង្គ្រាមលោកលើកទី២

នៅព្រឹកថ្ងៃទី៨ ខែឧសភា ឆ្នាំ២០២៤នេះ ស្ថានទូតរុស្ស៊ីប្រចាំនៅក្នុងរាជធានីភ្នំពេញ បានរៀបចំពិធីគោរពវិញ្ញាណក្ខន្ធដល់ទាហានរបស់រុស្ស៊ី កាលពីក្នុងសម័យសង្គ្រាមលោកលើកទី២​ (១៩៤១-១៩៤៥)។

ពិធីនាព្រឹកថ្ងៃនេះ បានធ្វើឡើងនៅក្នងបរិវេណនៃស្ថានទូតរុស្ស៊ី ដែលមានការចូលរួមពីលោក អាណាតូលី បូរ៉ូវីក ឯកអគ្គរដ្ឋទូតរុស្ស៊ីប្រចាំកម្ពុជា និងភរិយា​ ព្រមទាំងប្រជាជនរុស្ស៊ីដែលកំពុងរស់នៅក្នុងប្រទេសកម្ពុជាជាច្រើននាក់។

បើតាមលោក អាណាតូលី បូរ៉ូវីក ឯកអគ្គរដ្ឋទូតរុស្ស៊ីប្រចាំកម្ពុជា កងវរសេនាធំអមតៈ គឺជាគំនិតផ្តួចផ្តើម ដែលត្រូវបានធ្វើឡើងជាលើកដំបូងនៅក្នុងឆ្នាំ២០១២ នៅទីក្រុងស៊ីបេរីមួយ គឺទីក្រុងTomsk។ លោក ថា នាពេលថ្មីៗនេះ ប្រជាពលរដ្ឋកាន់តែច្រើនឡើងៗ បានចាប់ផ្តើមចូលរួមក្នុងកងវរសេនាធំអមតៈ ហើយសព្វថ្ងៃនេះ សកម្មភាពនេះត្រូវបានរៀបចំទូទាំងប្រទេសរុស្ស៊ី។

សម្រាប់នៅកម្ពុជា ត្រូវបានលោកឯកអគ្គរដ្ឋទូត បញ្ជាក់ថា ជាប្រពៃណីដែលធ្វើកងវរសេនាធំអមតៈនៅក្នុង​បរិវេណនៃស្ថានទូតរុស្ស៊ី ដោយជនជាតិរុស្ស៊ី បានប្រមូលផ្តុំ និងរៀបចំក្បួនដង្ហែ ដើម្បីគោរពវិញ្ញាណក្ខន្ធទាហាននៃមហាសង្គ្រាមស្នេហាជាតិ។

លោក អាណាតូលី បូរ៉ូវីក បានរម្លឹកឱ្យដឹងថា នៅយប់ថ្ងៃទី៨ និងថ្ងៃទី៩ ខែឧសភា ឆ្នាំ១៩៤៥ ឯកសារស្តីពីការចុះចាញ់របស់អាឡឺម៉ង់ ត្រង់មុខកងកម្លាំងប្រឆាំងហ៊ីត្លែរ ត្រូវបានចុះហត្ថលេខា ដែលនោះហើយជាសញ្ញានៃចុងបញ្ចប់សង្រ្គាមដែលត្រូវបានចាប់ផ្តើម ដោយពួកណាស៊ីនិយមនៅអឺរ៉ុប។ លោក ថា កាលពី៧៩ឆ្នាំមុន ថ្ងៃទី៩ ខែឧសភា បានក្លាយទៅជាទិវាបុណ្យដ៏ធំមួយ ហើយចាប់តាំងពីពេលនោះមក មានពិធីរម្លឹកដូចជា ការដាក់កម្រងផ្កា មួយនាទីនៃភាពស្ងៀមស្ងាត់ និងនៅទីក្រុងធំៗមានព្យុហយាត្រា និងការបាញ់កាំជ្រួច ជាដើម។

លោកទូត បានគូសបញ្ជាក់ពីផលប៉ះពាល់ដ៏ធ្ងន់នៃសង្រ្គាមលោកលើកទីពីរ ដែលបានប៉ះពាល់ដល់ជោគវាសនារបស់មនុស្សរាប់លាននាក់ ហើយបង្កឱ្យមានការឈឺចាប់ និងការបាត់បង់ជីវិតជាច្រើន។ លោក បន្តថា ទំនួលខុសត្រូវចំពោះអតីតកាល និងអនាគតកាល គឺធ្វើអ្វីៗគ្រប់យ៉ាងដើម្បីកុំឱ្យសោកនាដកម្មដ៏គួរឱ្យភ័យខ្លាចដូចនោះកើតឡើងម្តងទៀត៕