ព័ត៌មានជាតិ

មន្ត្រីជាន់ខ្ពស់ការងារ លើកដំណោះស្រាយ ៣ ចំណុច ដល់អតីតបុគ្គលិកណាហ្គាវើលដ៏ ពិចារណា ដើម្បីបញ្ឈប់ការតវ៉ា

បានផុស

២ years មុន

នៅ

ថ្ងៃចន្ទ ១៣ ឧសភា ២០២៤

ដោយ

មន្ត្រីជាន់ខ្ពស់ នៃក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងនូវដំណោះស្រាយចំនួន ៣ ចំណុច ដល់អតីតបុគ្គលិកណាហ្គាវើលដ៏(NagaWorld) ធ្វើការពិចារណាដើម្បីបញ្ឈប់ការតវ៉ា និងងាកមករកការងារធ្វើមានប្រាក់ចំណូល ឬប្រាក់ខែសម្រាប់ទ្រទ្រង់ជីវភាពគ្រួសារ។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានសរសេរសារបង្ហោះនៅក្នុងបណ្ដាញសង្គមចុះនៅថ្ងៃទី ១៣ ឧសភា នេះថា ដំណោះស្រាយ ៣ ចំណុចរួមមាន ៖

១.អតីតបុគ្គលិកណាហ្គាវើលដ៏ គួរមានជម្រើសធ្វើការងារដើម្បីមានប្រាក់ចំណូល ឬប្រាក់ខែសម្រាប់ទ្រទ្រង់ជីវភាពគ្រួសារ។ ទីភ្នាក់ងារជាតិមុខរបរ និងការងារ នៃក្រសួងការងារ (NEA) ជួយសម្របសម្រួលស្វែងរកការងារថ្មីជូនពួកគាត់។ សព្វថ្ងៃនេះមានការងាររាប់ម៉ឺនកន្លែងកំពុងត្រូវការបុគ្គលិកធ្វើការដូចជា ធនាគារ ក្រុមហ៊ុន រោងចក្រ សហគ្រាស ។ល។

២.កូដករណាហ្គាវើលដ៏ ត្រូវបង្ហាញនូវឆន្ទៈរបស់ខ្លួនក្នុងការដោះស្រាយបញ្ចប់វិវាទការងារនេះ ដើម្បីផលប្រយោជន៍ពិតប្រាកដរបស់កូដករ ជៀសជាងការធ្វើកូដកម្មក្នុងរបៀបវារៈផ្សេង និងតាមការរៀបចំដោយក្រុមណាមួយ ដែលយកកូដករជាឧបករណ៍របស់គេ។

៣.ក្រសួងការងារ, ក្រុមប្រឹក្សាអាជ្ញាកណ្ដាល, និងគណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅក្រុមមុខសញ្ញា (គ.ក.ប) បានបំពេញតួនាទីតាមសមត្ថកិច្ចរបស់ខ្លួនត្រឹមត្រូវតាមច្បាប់។ យោងតាមនីតិវិធីច្បាប់ ប្រសិនបើវិវាទការងារនេះមិនអាចស្វែងរកដំណោះស្រាយបានដោយការផ្សះផ្សា នីតិវិធីបន្ទាប់គឺ ភាគីណាមួយអាចប្តឹងទៅតុលាការដើម្បីរកដំណោះស្រាយចុងក្រោយ។

លោកបានសរសេរបន្តថា ករណីអតីតបុគ្គលិក ណាហ្គាវើលដ៏ (NagaWorld) ក្រសួងការងារ និងបណ្ដុះបណ្ដាលវិជ្ជាជីវៈ បានប្រឹងប្រែងសម្របសម្រួលដោះស្រាយករណីកូដករណាហ្គាវើលដ៏នេះតាមសមត្ថកិច្ច និងតួនាទី ដូចមានចែងក្នុងច្បាប់ការងារ ដោយប្រើប្រាស់យន្តការដោះស្រាយវិវាទការងារតាមការសម្របសម្រួលផ្សះផ្សាចំនួន ២ លើក ប៉ុន្តែភាគីវិវាទមិនសះជា។ ក្រសួង បានបញ្ជូនករណីនេះទៅដោះស្រាយតាមយន្តការក្រុមប្រឹក្សាអាជ្ញាកណ្ដាល។ ក្រុមប្រឹក្សាអាជ្ញាកណ្ដាល បានចេញសេចក្ដីសម្រេចរួចហើយផងដែរ។

ចំណែកក្រុមហ៊ុនណាហ្គាវើលដ៏ ក៏បានផ្ទេរប្រាក់បំណាច់ និងសំណងបញ្ចប់កិច្ចសន្យាការងារចូលគណនីធនាគាររបស់អតីតបុគ្គលិកទាំងនោះរួចរាល់ជាយូរមកហើយ។ គណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅក្រុមមុខសញ្ញា (គ.ក.ប) បានសម្របសម្រួលដោះស្រាយករណីនេះចំនួន ២៧ លើក តែភាគីទាំងពីរមិនមានដំណោះស្រាយបញ្ចប់វិវាទនោះទេ។

លោក កត្តា អ៊ន បានរំលឹកថា គិតត្រឹមថ្ងៃទី ១៣ ខែឧសភា ឆ្នាំ ២០២៤ នេះ ក្នុងចំណោមអតីតបុគ្គលិកទាំង ៣៧៣ នាក់នោះ មានអតីតបុគ្គលិកចំនួន ២៩៣ នាក់ បានយល់ព្រមទទួលយកការទូទាត់នូវប្រាក់បំណាច់ និងសំណងបញ្ចប់កិច្ចសន្យាការងារជាមួយក្រុមហ៊ុន ដែលធ្វើឱ្យអតីតបុគ្គលិកដែលមិនព្រមទទួលយកសំណងនៅសល់ត្រឹម ៨០ នាក់ប៉ុណ្ណោះ ហើយក្នុងចំណោមបុគ្គលិក ៨០ នាក់នេះ សព្វថ្ងៃមួយចំនួនបានមានការងារថ្មីធ្វើ ឯអ្នកដែលជាកូដករកំពុងបន្តការតវ៉ាសព្វថ្ងៃមានប្រហែលជាង ២០ នាក់ប៉ុណ្ណោះ៕

អត្ថបទ ៖ សំអឿន

Related Topics:ណាហ្គាវើលដ៏