ក្រសួងសាធារណការ ហាមដឹកទំនិញលើសទម្ងន់តាមផ្លូវជាតិ ៤៨ នារដូវវស្សា

អ្នកនាំពាក្យក្រសួងសាធារណការ និងដឹកជញ្ចូន បានបញ្ចេញសារដាស់តឿនដល់អ្នកប្រើប្រាស់ផ្លូវជាតិលេខ៤៨គ្រប់ប្រភេទ ដោយហាមប្រាមមិនឱ្យដឹកទំនិញលើសកំណត់អំឡុងពេលរដូវវស្សា។

ការក្រើនរម្លឹករបស់លោក ផន រឹម អ្នកនាំពាក្យក្រសួងសាធារណការ និងដឹកជញ្ចូន យ៉ាងដូច្នេះដោយសារតែបច្ចុប្បន្នខេត្តកោះកុងមានភ្លៀងធ្លាក់ច្រើនដែលធ្វើកំណាត់ផ្លូវដែលកំពុងស្ថាបនាមានស្ថានភាពរអិលកន្លែងទួល ឬចំណោទដែលងាយបង្កគ្រោះថ្នាក់ផ្សេងៗ។

មន្រ្តីជាន់ខ្ពស់ក្រសួងសាធារណការ ដដែលអះអាងនៅថ្ងៃទី៣១ ខែឧសភា ឆ្នាំ២០២៤ថា បច្ចុប្បន្ននេះ ផ្លូវជាតិលេខ៤៨ កំពុងស្តារ និងលើកកម្រិតគុណភាព ហើយការដ្ឋានកំពុងមមាញឹកខ្លាំង ដូចនេះស្ថានភាពនៅមិនទាន់មានភាពល្អប្រសើរនៅឡើយទេ។

ម្យ៉ាងវិញទៀត រថយន្តឈ្នួល(TAXI) និងអ្នកធ្វើដំណើរផ្សេងទៀត ក៏ត្រូវបើកបរក្នុងល្បឿនមួយអាចគ្រប់គ្រងបាន ធានាសុវត្ថិភាពខ្លួនឯង និងអ្នកដទៃ។
ក្រុមការងារការដ្ឋាន ព្យាយាមបង្កើនបង្គោលសុវត្ថិភាព ស្លាកសញ្ញាចរាចរណ៍បន្ថែមទៀត ដើម្បីញ្ចៀសហានិភ័យផ្សេងៗអាចកើតឡើងជាយថាហេតុ។

គួរបញ្ជាក់ថា បច្ចុប្បន្ននេះ គម្រោងលើកកម្រិតគុណភាពផ្លូវជាតិលេខ៤៨(ស្រែអំបិល-កោះកុង) កំពុងដំណើរការយ៉ាងរលូន និងមមាញឹកខ្លាំង ដោយសម្រេចលទ្ធផល៦០.០៥%ហើយ គិតត្រឹមបំណាច់ខែឧសភា ឆ្នាំ២០២៤នេះ។

គួរជម្រាបថា ការដ្ឋានចាប់ផ្តើមពីបំបែកផ្លូវជាតិលេខ៤ រហូតដល់ក្រុងខេមរភូមិន្ទ ខេត្តកោះកុង មានប្រវែងសរុប ១៤៨គីឡូម៉ែត្រ កំពុងមមាញឹកលើការងារអ៊ុត AC។

ក្រុមការងារបានធ្វើ Base Course ជាអតិប្បរមា និងការងារ Structure ត្រូវអ៊ុត AC បញ្ចប់នៅរដូវប្រាំង ឆ្នាំ២០២៥ខាងមុខនេះហើយ៕

អត្តបទៈ សិរីវឌ្ឍនៈ