គយ ថា ពន្ធនាំចូលទូរសព្ទ Nokia ចុចពិល បង់មិនដល់១ដុល្លារផង មិនមែន៩៣ដុល្លារទេ

អគ្គនាយកដ្ឋានគយ និងរដ្ឋាករកម្ពុជា បានចេញមកបភ្លឺថា ពន្ធ និងអាករនាំចូលលើទូរសព្ទប្រភេទ Nokia ចុចពិល ដែលត្រូវបង់ គឺ០,៧៧៥ដុល្លារប៉ុណ្ណោះ មិនមែន ៩៣ដុល្លារទេ។

សេចក្តីបំភ្លឺបន្ថែម ស្តីពីកាតព្វកិច្ចពន្ធ និងអាករនាំចូលលើមុខទំនិញទូរសព្ទ នៅថ្ងៃទី១ ខែមិថុនា ឆ្នាំ២០២៤នេះ អគ្គនាយកដ្ឋានគយនិងរដ្ឋាករកម្ពុជា បានបំភ្លឺដូច្នេះថា៖ «មុខទំនិញ ទូរសព្ទមានពន្ធនិងអាករនាំចូល១៥,៥% ហើយកន្លងមក ការប្រកាសនាំចូលដោយក្រុមហ៊ុន PUNLEU AKLANGKA CO., LTD. មានតម្លៃ ៥USD/គ្រឿង។ ហេតុដូច្នេះ ពន្ធនិងអាករដែលត្រូវបង់គឺ ៥x ១៥,៥% = ០,៧៧៥USD/គ្រឿង តែប៉ុណ្ណោះ មិនមែន ៩៣ ដុល្លារអាម៉េរិកដូចមានការលើកឡើងមួយចំនួនឡើយ»។

ការបំភ្លឺខាងលើនេះ ដោយហេតុថា មានមតិយោបល់ចម្រុះរបស់សាធារណជនលើករណីការចុះចាប់ និងដកហូតទូរសព្ទគ្មានពន្ធនាំចូលពីទីតាំងអាជីវកម្មមួយចំនួនដែលស្ថិតនៅក្នុងស្រុកមេមត់ ខេត្តត្បូងឃ្មុំ តែជាការកត់សម្គាល់មានចម្ងល់របស់សាធារណជនពាក់ព័ន្ធកាតព្វកិច្ចពន្ធ និងអាករនាំចូលលើទូរសព្ទប្រភេទ “Nokia ចុចពិល” ដោយមានការលើកឡើងថាទំនិញនេះត្រូវបង់ពន្ធនិងអាករនាំចូលដល់ទៅ ៩៣ ដុល្លារអាមេរិកក្នុងមួយគ្រឿង៕