ប្រមុខការទូតកម្ពុជា នឹងបំពេញទស្សនកិច្ចផ្លូវការនៅប្រទេសប្រេស៊ីល​

ឧបនាយករដ្ឋមន្ត្រី រដ្ឋមន្ត្រីក្រសួងការបរទេសកម្ពុជា នឹងបំពេញទស្សនកិច្ចផ្លូវនៅប្រទេសប្រេស៊ីល នៅឆ្នាំ២០២៤ នេះ ស្របពេលដែលទំនាក់ទំនាក់ការទូតនៃប្រទេសកម្ពុជា និងប្រទេសប្រេស៊ីល មានអាយុកាល៣០ឆ្នាំ។ នេះបើតាមសេចក្ដីប្រកាសព័ត៌មានស្ដីពីជំនួបរវាង លោក  ជុំ សុន្ទរី រដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ និងលោក  Eduardo Paes Saboia អនុរដ្ឋមន្រ្តី ទទួលបន្ទុកកិច្ចការអាស៊ី និងប៉ាស៊ីហ្វិក នៃក្រសួងការបរទេសប្រេស៊ីល ដែលចេញនៅថ្ងៃទី០៥ ខែមិថុនា នេះ។

ប៉ុន្តែ នៅក្នុងសេចក្ដីប្រកាសព័ត៌មានដដែល មិនបានបញ្ជាក់ថា លោក សុខ ចិន្ដាសោភា ប្រមុខការទូតកម្ពុជា នឹងបំពេញទស្សនកិច្ចផ្លូវការនៅប្រទេសប្រេស៊ីល ក្នុងកាលបរិច្ឆេទជាក់លាក់ណាមួយឡើយ។

គួរឱ្យដឹងថា កាលពីថ្ងៃទី ៣ ខែមិថុនា ឆ្នាំ២០២៤ លោក  ជុំ សុន្ទរី រដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ និងលោក Eduardo Paes Saboia អនុរដ្ឋមន្រ្តី ទទួលបន្ទុកកិច្ចការអាស៊ី និងប៉ាស៊ីហ្វិក នៃក្រសួងការបរទេសប្រេស៊ីល បានពិភាក្សាគ្នាអំពីកិច្ចសហប្រតិបត្តិការបច្ចុប្បន្នរវាងកម្ពុជា និងប្រេស៊ីល នៅក្នុងជំនួបនៅទីក្រុងប្រាស៊ីលីយ៉ា ប្រទេសប្រេស៊ីល។

តាមរយៈជំនួបនោះ លោក  ជុំ សុន្ទរី និង លោក  អេឌូអាដូ ប៉ែស សាប៊យ បានជូនព័ត៌មានគ្នាអំពីការវិវឌ្ឍនៃដំណើរការបង្កើតស្ថានទូតរៀងៗខ្លួន នៅក្នុងរាជធានី – រដ្ឋធានី នៃប្រទេសទាំងពីរ ដើម្បីឆ្លើយតបទៅនឹងសម្ទុះរីកចម្រើននៃទំនាក់ទំនងរវាងប្រជាជាតិទាំងពីរ។ លោក ទាំងពីរ ក៏បានពិគ្រោះគ្នាអំពីមធ្យោបាយពង្រឹងកិច្ចសហប្រតិបត្តិការបន្ថែមទៀតលើវិស័យពាណិជ្ជកម្ម កសិកម្ម អប់រំ ទេសចរណ៍ និងការរឹតចំណងទំនាក់ទំនងរវាងប្រជាជននិងប្រជាជន ព្រមទាំងលទ្ធភាពក្នុងការរៀបចំកិច្ចពិគ្រោះយោបល់ទ្វេភាគីលើកទី២ រវាងក្រសួងការបរទេសទាំងពីរនៅកម្ពុជា នាឆ្នាំក្រោយ។

អនុរដ្ឋមន្ត្រីការបរទេសទាំងពីរ ក៏បានជជែកអំពីទំនាក់ទំនងអាស៊ាន-ប្រេស៊ីល ដោយ លោក  អេឌូអាដូ ប៉ែស សាប៊យ បានសម្តែងជាថ្មីនូវអំណរគុណរបស់រដ្ឋាភិបាលប្រេស៊ីល ចំពោះការគាំទ្ររបស់កម្ពុជាសម្រាប់ប្រេស៊ីលក្លាយជាដៃគូសន្ទនាតាមវិស័យរបស់អាស៊ាននៅឆ្នាំ២០២២ ក្នុងអំឡុងពេលដែលកម្ពុជាធ្វើជាប្រធានអាស៊ាន។ លោក  ជុំ សុន្ទរី បានលើកទឹកចិត្តប្រេស៊ីល ក្នុងនាមជាសមាជិកដ៏សំខាន់មួយរបស់ប្លុកដោះដូរពាណិជ្ជកម្មអាមេរិកខាងត្បូង MERCOSUR ឱ្យជួយជំរុញដំណើរការនានាសំដៅឈានទៅបង្កើតកិច្ចព្រមព្រៀងពាណិជ្ជកម្មសេរីអាស៊ាន-MERCOSUR ដើម្បីផលប្រយោជន៍នៃតំបន់ទាំងពីរ៕