មន្ត្រីជាន់ខ្ពស់ណែនាំមន្ត្រី ប ស ស ត្រូវបង្កើនការយកចិត្តទុកដាក់ផ្តល់សេវាជូនសមាជិកឲ្យកាន់តែមានប្រសិទ្ធភាពខ្ពស់

មន្ត្រីជាន់ខ្ពស់បេឡាជាតិសន្ដិសុខសង្គម(ប.ស.ស.)បានធ្វើការណែនាំឱ្យមន្ត្រី ប.ស.ស.ត្រូវបង្កើនការយកចិត្តទុកដាក់ក្នុងការបម្រើសេវាសាធារណៈជូនសមាជិកឱ្យកាន់តែមានប្រសិទ្ធភាព និងទទួលបានលទ្ធផលខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំផ្ទៃក្នុងប្រចាំខែ ដើម្បីដោះស្រាយបញ្ហាប្រឈមសំខាន់ៗរបស់អង្គភាពក្រោមឱវាទបេឡាជាតិសន្ដិសុខសង្គមកាលពីថ្ងៃទី១៧មិថុនា លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយក ប.ស.ស. នៃក្រសួងការងារនិងបណ្ដុះបណ្ដាលវិជ្ជាជីវៈ បានមានប្រសាសន៍ថា កិច្ចប្រជុំផ្ទៃក្នុងរបស់បេឡាជាតិសន្ដិសុខសង្គមនាពេលនេះ
ដើម្បីត្រួតពិនិត្យលទ្ធផលការងារសម្រេចបាន និងទិសដៅអនុវត្តបន្តព្រមទាំងពិនិត្យតាមដានវឌ្ឍនភាព នៃការអនុវត្តផែនការសកម្មភាពសម្រាប់ឆ្នាំ២០២៤ ដែលមាននៅក្នុងផែនការយុទ្ធសាស្រ្តអភិវឌ្ឍន៍វិស័យការងារ សន្ដិសុខសង្គម
និងបណ្ដុះបណ្ដាលវិជ្ជាជីវៈ ឆ្នាំ២០២៤-២០២៨។

ក្នុងឱកាសនេះ លោកប្រតិភូរាជរដ្ឋាភិបាលបានជំរុញដល់ថ្នាក់ដឹកនាំអង្គភាពក្រោមឱវាទទាំងអស់ត្រូវបង្កើនកិច្ចសហការរវាង​គ្នា​ ដោយមានភាពយោគយល់អធ្យាស្រ័យគ្នា​ពិសេសត្រូវមានសាមគ្គីភាពផ្ទៃក្នុង ដើម្បីជាធ្លុងមួយអាចដើរលើផ្លូវរួមគ្នាក្នុងការអនុវត្តការងារឱ្យបានល្អប្រសើរ និងដោះស្រាយបញ្ហាប្រឈមឱ្យបានឆាប់រហ័សជាពិសេសការពង្រឹងគោរពវិន័យក្នុងអង្គភាពឱ្យហ្មត់ចត់ តឹងរ៉ឹង និងខិតខំអនុវត្តនូវទិសដៅការងារ រៀបចំផែនការសកម្មភាពការងារបន្ត និងដោះស្រាយការងារក្នុងដែនសមត្ថកិច្ចរបស់ខ្លួន ប្រកបដោយការទំនួលខុសត្រូវ និងយកចិត្តទុកដាក់ខ្ពស់ ជាមួយនឹងភាពទន់ភ្លន់ ម៉ឺងមាត់ដើម្បីជំរុញយន្តការបម្រើសេវាសាធារណៈជូនសមាជិក ឱ្យកាន់តែមានប្រសិទ្ធភាព និងទទួលបានលទ្ធផលខ្ពស់៕

អត្ថបទ៖ សំអឿន