ពិភពលោក វាយតម្លៃខ្ពស់ចំពោះកម្ពុជាជាប្រ​ទេ​ស​​គំរូមានវិស័យឯកជនចូលរួមសកម្មភាពមីន

ពិភពលោក បានទទួលស្គាល់ និងវាយតម្លៃខ្ពស់ចំពោះកម្ពុជា ជាប្រទេសគំរូមួយដែលមានវិស័យឯកជន ចូលរួមដល់កម្មវិធីសកម្មភាពមីនមនុស្សធម៌ ខណៈភាពជាដៃគូរបស់វិស័យឯកជនគឺជាដំណើរមួយឆ្ពោះទៅរកពិភពលោកមួយដែលគ្មានមីន។ នេះបើតាមសំណេររបស់អាជ្ញាធរមីននៅលើតេឡេក្រាម។

ការបង្ហោះសារនេះ ស្របពេលដែល ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បាននិងកំពុងដឹកនាំគណៈប្រតិភូកម្ពុជា ចូលរួមកិច្ចប្រជុំពាក់ព័ន្ធមួយចំនួននៃអនុសញ្ញាអូតាវ៉ា ចាប់ពីថ្ងៃទី១៥-២៨ ខែមិថុនា ឆ្នាំ២០២៤ នៅទីក្រុងហ្សឺណែវ សហព័ន្ធស្វីស និងទីក្រុងឡុងដ៍ ចក្រភពអង់គ្លេស ដើម្បីពិភាក្សាពីពិភពលោកមួយដែលគ្មានមីន និងស្វែងរកការគាំទ្របន្ថែមលើវិស័យសកម្មភាពមីននៅកម្ពុជា។

អាជ្ញាធរមីន បញ្ជាក់ថា៖«គោលបំណងនៃព្រឹត្តិការណ៍នេះគឺដើម្បីស្វែងយល់ពីតួនាទីរបស់វិស័យឯកជនក្នុងភាពជាដៃគូជាមួយកិច្ចខិតខំប្រឹងប្រែងដោះមីនមនុស្សធម៌ ដើម្បីពន្លឿនវឌ្ឍនភាពឆ្ពោះទៅរកពិភពលោកដែលគ្មានមីន»។
បន្ថែមពីនេះ ព្រឹត្តិការណ៍នេះកំពុងស្វែងរកពីសក្តានុពលសម្រាប់កិច្ចសហការប្រកបដោយវិជ្ជមាន ក្នុងការដោះស្រាយវិបត្តិមីនជាសាកល ដោយប្រើប្រាស់ធនធាន និងជំនាញរបស់វិស័យឯកជនជាមួយអង្គការមនុស្សធម៌។

ទេសរដ្ឋមន្រ្តី បានលើកឡើងថា ក្នុងនាមជាប្រធានអនុសញ្ញាក្នុងឆ្នាំ២០២៤ កម្ពុជាបានប្តេជ្ញាចិត្តបន្តសម្រេចឱ្យបាននូវគោលដៅរួមរបស់អនុសញ្ញាអូតាវ៉ា និងការកៀរគរ ប្រទេសមិនមែនជាភាគីអនុសញ្ញា ឱ្យចូលរួមគាំទ្រ និងចូលជារដ្ឋភាគីនៃអនុសញ្ញា ដើម្បីរួមគ្នាសម្រេចឱ្យបាននូវពិភពលោកមួយដែលគ្មានមីន និងមិនមានការរងគ្រោះដោយសារមីន និងសំណល់ជាតិផ្ទុះពីសង្គ្រាម។

គួរជម្រាបថា ដើម្បីទប់ស្កាត់ និងរួមចំណែកក្នុងការកាត់បន្ថយអត្រាគ្រោះថ្នាក់ឱ្យនៅកម្រិតអប្បបរមា រាជរដ្ឋាភិបាលកម្ពុជា តាមរយៈអាជ្ញាធរមីន រួមជាមួយប្រទេសជាមិត្ត ដៃគូអភិវឌ្ឍន៍ និងវិស័យឯកជន បានបន្តខិតខំប្រឹងប្រែងយ៉ាងយកចិត្តទុកដាក់ក្នុងការរំដោះផ្ទៃដី និងការផ្សព្វផ្សាយការអប់រំយល់ដឹងអំពីមីននិងគ្រាប់មិនទាន់ផ្ទុះនៅតាមសហគមន៍ ដើម្បី “ឆ្ពោះទៅរកកម្ពុជាមួយគ្មានផលប៉ះពាល់ដោយសារមីន និងសំណល់ជាតិផ្ទុះពីសង្រ្គាម” និងគ្មានទុកប្រជាពលរដ្ឋណាម្នាក់នៅបន្តរងគ្រោះទៀត៕

អត្ថបទ៖ ឡាយ សាមាន