ព័ត៌មានជាតិ

ឯកឧត្ដម ហ៊ុន ម៉ានី ៖ មន្ត្រីមានឥរិយាបថការងារល្អ ប្រកបដោយក្រមសីលធម៌ គុណភាព គុណធម៌ នឹងធានាបានការឆ្លើយតបសេចក្ដីត្រូវការរបស់ប្រជាជន

បានផុស

២ years មុន

នៅ

ថ្ងៃអង្គារ ១៨ មិថុនា ២០២៤

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមប្រឹក្សាសាលាភូមិន្ទរដ្ឋបាល លើកឡើងថា «ការបណ្ដុះបណ្ដាលអភិវឌ្ឍន៍សមត្ថភាពវិជ្ជាជីវៈមានសារៈសំខាន់ តែមន្ត្រីដែលមានឥរិយាបថការងារល្អ ការបំពេញការងារប្រកបដោយក្រមសីលធម៌ វិន័យ គុណភាព និងគុណធម៌ នឹងធានាបាននូវការឆ្លើយតបទៅនឹងសេចក្ដីត្រូវការរបស់ប្រជាជន ទាំងក្នុងពេលបច្ចុប្បន្ន និងទៅអនាគត»។

ការលើកឡើងនេះ ក្នុងឱកាស ឯកឧត្ដម ហ៊ុន ម៉ានី បានអញ្ជើញជាអធិបតីភាពក្នុងពិធីបិទសិក្ខាសាលាវគ្គបណ្ដុះបណ្ដាលស្ដីពី«ភាពជាអ្នកដឹកនាំ និងនវានុវត្តន៍ ជំនាន់ទី ៦» នៅសាលាភូមិន្ទរដ្ឋបាល កាលពីរសៀលថ្ងៃទី ១៧ ខែមិថុនា ឆ្នាំ ២០២៤។

ឯកឧត្ដម ហ៊ុន ម៉ានី លើកឡើងបន្តថា អ្នកដឹកនាំ ត្រូវការកត្តាចំនួន ០៣ ដើម្បីជំរុញគុណភាព នៃភាពជាអ្នកដឹកនាំល្អ ក្នុងនោះរួមមាន ៖ ចក្ខុវិស័យ (Vision) ជំនាញ (Expertise) និងអត្តចរិតល្អ (Character)។ លើសពីនេះ អ្នកដឹកនាំ ក៏ត្រូវមានអត្តចរិតល្អ ពោលគឺត្រូវមានលក្ខណៈទន់ភ្លន់ ប៉ុន្តែហ្មត់ចត់ និងច្បាស់លាស់។

ឯកឧត្ដម ហ៊ុន ម៉ានី លើកឡើងបន្តទៀតថា វគ្គបណ្ដុះបណ្ដាលស្ដីពី«ភាពជាអ្នកដឹកនាំ និងនវានុវត្តន៍ ជំនាន់ទី ៦» នេះ ជាឱកាសសម្រាប់ថ្នាក់ដឹកនាំពីគ្រប់ក្រសួង-ស្ថាប័ន ធ្វើបច្ចុប្បន្នភាពចំណេះដឹង និងចំណេះធ្វើរបស់ខ្លួន ដើម្បីទទួលបាននូវពុទ្ធិថ្មីៗ បទពិសោធល្អៗ ដើម្បីដឹកនាំអង្គភាព និងក្រសួង ស្ថាប័នឲ្យកាន់តែមានប្រសិទ្ធភាព និងទទួលបានលទ្ធផលគាប់ប្រសើរជាងមុន។

ឯកឧត្ដម ហ៊ុន ម៉ានី លើកឡើងបន្ថែមថា វគ្គបណ្ដុះបណ្ដាលនេះ ត្រូវបានរៀបចំឡើងដើម្បីឆ្លើយតបនឹងអាទិភាពគន្លឹះទី ១ នៃយុទ្ធសាស្ត្របញ្ចកោណ ដំណាក់កាលទី ១ គឺ កត្តា«មនុស្ស» ហើយក៏ស្របនឹងអាទិភាពដែលមានចែងក្នុងមុំទី ១ និងមុំទី ២ នៃស្នូលរបស់យុទ្ធសាស្ត្របញ្ចកោណផងដែរ។ ស្នូលនោះ សំដៅដល់ការពង្រឹង និងការកែទម្រង់ស្ថាប័ន តាមរយៈការពង្រឹងសមត្ថភាព នៃភាពជាអ្នកដឹកនាំ និងការរៀបចំបណ្ដាញអ្នកដឹកនាំ ព្រមទាំងការលើកកម្ពស់សមត្ថភាពធនធានមនុស្ស ប្រកបដោយសមត្ថភាព ជំនាញ ឆន្ទៈម្ចាស់ការ និងក្រមសីលធម៌វិជ្ជាជីវៈ ស្របតាម តួនាទី និងការទទួលខុសត្រូវ។

គួរជម្រាបថា វគ្គបណ្ដុះបណ្ដាលស្ដីពី«ភាពជាអ្នកដឹកនាំ និងនវានុវត្តន៍» នៅសាលាភូមិន្ទរដ្ឋបាល ជាផ្នែកមួយ នៃការអនុវត្តវិធានការគន្លឹះទី ២ នៃការងារកែទម្រង់រដ្ឋបាលសាធារណៈ នោះគឺការពង្រឹងសមត្ថភាព និងសមិទ្ធកម្មស្ថាប័ន៕

អត្ថបទ ៖ ពិសី