ករណី Camcar និងអ្នកឧកញ៉ា៖ សមាគមឧកញ៉ាសាទរការបញ្ចប់វិវាទ តែឱ្យពលរដ្ឋបញ្ចេញមតិដោយសីលធម៌

សមាគមឧកញ៉ាកម្ពុជា ចេញសាទរការបញ្ចប់វិវាទរវាងអ្នកឧកញ៉ា លី សុភ័ក្ត និងម្ចាស់ Camcar Collection ដែលត្រូវបានដោះស្រាយបញ្ចប់ដោយសន្តិវិធី ក្រោយម្ចាស់ Camcar Collection បានទទួលស្គាល់នូវកំហុស ខណៈអ្នកឧកញ៉ា លី សុភ័ក្ត ក៏បានដកពាក្យបណ្តឹង។ ប៉ុន្តែសមាគមឧកញ៉ា បានឆ្លៀតប្រាប់ទៅកាន់ពលរដ្ឋឱ្យបញ្ចេញមតិដោយក្រមសីលធម៌។

សមាគមឧកញ៉ាកម្ពុជា បានបញ្ជាក់ថា ខ្លួនបានតាមដានយ៉ាងយកចិត្តទុកដាក់ចំពោះការផ្សព្វផ្សាយ និងការចែករំលែកបន្ត ព្រមទាំងការបញ្ចេញមតិយោបល់នានានៅតាមបណ្តាញសង្គមមួយចំនួន ចាប់តាំងពីថ្ងៃទី៩ ខែកក្កដា ឆ្នាំ២០២៤ ក្នុងនោះក៏មានគណនីហ្វេសប៊ុក និងតិកតុកឈ្មោះ Camcar Collection ផងដែរលើករណីវិវាទរវាងអ្នកឧកញ៉ា លី សុភ័ក្ត ជាសមាជិកសមាគមឧកញ៉ាកម្ពុជា និងលោក ឡយ ភាល័យ ជាអ្នកផ្តល់សេវាកែច្នៃ និងដំឡើងរថយន្ត។

ជាការកត់សម្គាល់របស់សមាគមឧកញ៉ា តាមរយៈសំណេរ និងការផ្សព្វផ្សាយ ព្រមទាំងការបញ្ចេញមតិយោបល់ទាំងនោះហាក់មិនបានឆ្លុះបញ្ចាំងពីទិដ្ឋភាពទាំងស្រុងនៃវិវាទ ដែលធ្វើឱ្យមានការភាន់ច្រឡំ និងយល់ខុសចំពោះគូភាគី ដែលធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស កេរ្តិ៍ឈ្មោះ សេចក្តីថ្លៃថ្នូរបុគ្គល។ ប៉ុន្តែយ៉ាងក៏ដោយ វិវាទនេះត្រូវបានដោះស្រាយបញ្ចប់ដោយសន្តិវិធី ពោលគឺលោក ឡយ ភាល័យ បានទទួលស្គាល់នូវចំណុចខ្វះខាតរបស់ខ្លួនក្នុងការផ្តល់សេវាកែច្នៃ និងដំឡើងរថយន្តជូនអ្នកឧកញ៉ា លី សុភ័ក្ត តាមការព្រមព្រៀងគ្នា និងបានសុំទោសជាសាធារណៈដោយទទួលស្គាល់នូវកំហុសចំពោះការផ្សព្វផ្សាយព័ត៌មានតែមួយជ្រុងតាមបណ្តាញសង្គមរបស់ខ្លួន ខណៈអ្នកឧកញ៉ា លី សុភ័ក្ត ក៏បានដកពាក្យបណ្តឹងឈប់ប្តឹងលោក ឡយ ភាល័យ ផងដែរ។ នេះបើតាមសេចក្ដីប្រកាសរបស់សមាគមឧកញ៉ា នាថ្ងៃទី១១ ខែកក្កដា ឆ្នាំ២០២៤ ទើបចេញផ្សាយជាសាធារណៈនៅរសៀលថ្ងៃទី១២នេះ។

សមាគមឧកញ៉ាកម្ពុជា បានសម្ដែងការស្វាគមន៍ និងសាទរចំពោះការបញ្ចប់វិវាទដោយសន្តិវិធីនេះ និងបានបញ្ជាក់ពីការគោរពសិទ្ធិក្នុងការបញ្ចេញមតិរបស់ប្រជាពលរដ្ឋ ប៉ុន្តែសមាគមឧកញ៉ាកម្ពុជា បញ្ជាក់ថា ការបញ្ចេញមតិទាំងនេះគួរតែស្ថិតក្នុងក្រមសីលធម៌ ឈរលើសុចរិតភាព និងស្មារតីទទួលខុសត្រូវ។

អ្នកឧកញ៉ា លី សុភ័ក្តិ បានចេញមកបញ្ជាក់ដូច្នេះថា៖ «ក្រោយការជួបគ្នាដោះស្រាយវិវាទរវាងប្អូនប្រុស ឡយ ភាឡ័យ និងរូបខ្ញុំបាទកាលពីម្សិលមិញ ដោយមានមេធាវី និងសហការីខ្ញុំ។ ពួកយើងបានបញ្ចប់វិវាទដោយប្អូន ឡយ ភាល័យ បានទទួលស្គាល់កំហុស និងបានសុំទោសជាសាធារណៈ និងបានបញ្ចប់ដោយឈរលើស្មារតីយោគយល់គ្នាទៅវិញទៅមក»។ អ្នកឧកញ៉ា លី សុភ័ក្ត ក៏បានជូនពរឱ្យលោក ឡយ ភាល័យ ទទួលបានជោគជ័យ និងមានការគាំទ្រកាន់តែច្រើនថែមទៀតផងដែរ៕