ព័ត៌មានជាតិ

ឯកឧត្ដម ហ៊ុន ម៉ានី ជឿជាក់ថា ការរៀបចំកិច្ចប្រជុំកំពូលហ្វ្រង់កូហ្វូនី ដែល កម្ពុជា ធ្វើជាម្ចាស់ផ្ទះ នឹងក្លាយជាវេទិកាថ្មីមួយទៀត សម្រាប់ពង្រឹងទំនាក់ទំនងកម្ពុជា-បារាំង ឲ្យស្អិតរមួត

បានផុស

២ years មុន

នៅ

ថ្ងៃអាទិត្យ ១៤ កក្កដា ២០២៤

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ ជឿជាក់ថា ដំណើរឆ្ពោះទៅការរៀបចំកិច្ចប្រជុំកំពូលហ្វ្រង់កូហ្វូនី លើកទី ២០ ឆ្នាំ ២០២៦ ដោយមាន កម្ពុជា ធ្វើជាម្ចាស់ផ្ទះ នឹងក្លាយជាវេទិកាថ្មីមួយបន្ថែមទៀត សម្រាប់ការបន្តពង្រឹងទំនាក់ទំនងរវាងប្រទេសកម្ពុជា-បារាំង កាន់តែស្អិតរមួត តាមរយៈការបំពេញការងាររួមគ្នា។

ការជឿជាក់នេះ ក្នុងឱកាស ឯកឧត្ដម ហ៊ុន ម៉ានី បានអញ្ជើញចូលរួម និងថ្លែងសុន្ទរកថា ក្នុងទិវាជាតិបារាំង ១៤ កក្កដា នៅស្ថានទូតបារាំងប្រចាំកម្ពុជា កាលពីថ្ងៃទី ១៣ ខែកក្កដា ឆ្នាំ ២០២៤ ម្សិលមិញ។

នាឱកាសនោះ ឯកឧត្ដម ហ៊ុន ម៉ានី មានប្រសាសន៍ថា តាងនាមរាជរដ្ឋាភិបាលកម្ពុជា ឯកឧត្ដម មានក្តីសោមនស្សរីករាយ និងសូមចូលរួមអបអរសាទរទិវាជាតិបារាំង ១៤ កក្កដា ដែលបានប្រព្រឹត្តិទៅនៅសួនច្បារដ៏ស្រស់បំព្រង ក្នុងបរិវេណស្ថានទូតបារាំង ប្រចាំនៅព្រះរាជាណាចក្រកម្ពុជា។

ឯកឧត្ដម ហ៊ុន ម៉ានី មានប្រសាសន៍បន្តថា ទំនាក់ទំនងរវាងប្រទេសកម្ពុជា និងបារាំង មានអាយុកាលយូរអង្វែងមកហើយ តាមរយៈកិច្ចសហប្រតិបត្តិការដ៏ស្អិតរមួត និងដែលកំពុងរីកលូតលាស់ជាបន្តបន្ទាប់។

ឯកឧត្ដម ហ៊ុន ម៉ានី មានប្រសាសន៍បន្តទៀតថា កម្ពុជា-បារាំង បាន និងកំពុងបោះជំហានដ៏រឹងមាំជាមួយគ្នា។ ទន្ទឹមនេះ យើងកំពុងសិក្សាលើដំណើរឆ្ពោះទៅការរៀបចំកិច្ចប្រជុំកំពូលហ្វ្រង់កូហ្វូនី លើកទី ២០ ឆ្នាំ ២០២៦ ដោយមាន កម្ពុជា ធ្វើជាម្ចាស់ផ្ទះ។

ផ្សារភ្ជាប់ប្រសាសន៍ខាងលើនេះដែរ ឯកឧត្ដម ហ៊ុន ម៉ានី ជឿជាក់ថា «ដំណើរឆ្ពោះទៅការរៀបចំកិច្ចប្រជុំកំពូលហ្វ្រង់កូហ្វូនី លើកទី ២០ ឆ្នាំ ២០២៦ ដោយមាន កម្ពុជា ធ្វើជាម្ចាស់ផ្ទះ នេះ នឹងក្លាយជាវេទិកាថ្មីមួយបន្ថែមទៀត សម្រាប់ការបន្តពង្រឹងទំនាក់ទំនងរវាងប្រទេស កម្ពុជា-បារាំង កាន់តែស្អិតរមួត តាមរយៈការបំពេញការងាររួមគ្នា ដើម្បីលើកស្ទួយសន្តិភាព ការអភិវឌ្ឍ ប្រកបដោយចីរភាព និងភាពចម្រុះផ្នែកវប្បធម៌»៕