ព័ត៌មានជាតិ

គ្រំចំពុះទាពង្រីកទីផ្សារផ្គត់ផ្គង់ក្នុងស្រុក ខណៈកន្លងទៅពឹងផ្អែកលើទីផ្សារប្រទេសជិតខាងទាំងស្រុង

បានផុស

១១ ខែ មុន

នៅ

ថ្ងៃពុធ ១៧ កក្កដា ២០២៤

ដោយ

គ្រំចំពុះទា ជាអាហារសមុទ្រដែលមានការចិញ្ចឹមតាមបែបធម្មជាតិ កំពុងយកចិត្តទុកដាក់ពង្រឹងគុណភាពស្តង់ដារអនាម័យ។ បច្ចុប្បន្នសហគមន៍ចិញ្ចឹមគ្រំចំពុះទានៅឃុំពាមក្រសោប ក្នុងខេត្តកោះកុង បានកែច្នៃផលិតផលអាហារសមុទ្រមួយនេះប្រកបដោយស្តង់ដាអនាម័យខ្ពស់ ដោយមានការទទួលស្គាល់និងវាយតម្លៃពីស្ថាប័នជំនាញផ្នែកសុវត្ថិភាពចំណីអាហារ រហូតអាចនាំទៅលក់នៅទីផ្សារទំនើបៗក្នុងស្រុកដោយផ្ទាល់ថែមទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វង្ស តារា ម្ចាស់សិប្បកម្មកែច្នៃគ្រំចំពុះទា និងបង្គាក្រៀមក្នុងឃុំពាមក្រសោប ស្រុកមណ្ឌលសីមា ខេត្តកោះកុងបានឲ្យដឹងថា ក្រោយមានការជួយជ្រោមជ្រែងទាំងសម្ភារៈនិងបច្ចេកទេសពីអង្គការ UNIDO តាមរយៈគម្រោងកម្មវិធី Capfish Capture សិប្បកម្មរបស់លោកបានកែច្នៃគ្រំចំពុះទា ដោយអាចផ្គត់ផ្គង់ទីផ្សារក្នុងស្រុក ពិសេសអាចនាំទៅលក់ដោយផ្ទាល់នៅផ្សារទំនើបលំដាប់ខ្ពស់ក្នុងស្រុកដូចជាផ្សារម៉ាក្រូជាដើម។

មុនអាចពង្រីកក្លាយជាសិប្បកម្ម ដែលមានការកែច្នៃផលិតផលជលផលគ្រឿងសមុទ្រដ៏លេចធ្លោក្នុងខេត្តកោះកុង លោក វង្ស តារា បានរំលេចពីប្រវត្តិការចាប់ផ្ដើមការចិញ្ចឹមគ្រុំចំពុះទាដំបូងកាលពីឆ្នាំ ១៩៩៤ ក្នុងរូបភាពជាលក្ខណៈគ្រួសារ។យ៉ាងណាមិញ វិបត្តិជំងឺកូវីដក្នុងឆ្នាំ ២០២១ ប៉ះពាល់ដល់ការនាំចេញទៅលក់នៅប្រទេសជិតខាងជាពិសេសប្រទេសថៃ ដែលនាំឲ្យលោកងាកមកកែច្នៃដើម្បីផ្គត់ផ្គង់ទីផ្សារក្នុងស្រុក ខណៈតម្រូវការក្នុងស្រុកក៏មានកើនឡើងខ្ពស់។

លោក វង្ស តារា បានរំលឹកថា នៅឆ្នាំ ២០២១ ដោយសារការចាប់ផ្ដើមនៅក្មេងខ្ចី ដំបូងមានឈ្មួយកណ្ដាលបាននាំចែកចាយលក់លើទីផ្សារ។ ប៉ុន្តែបច្ចុប្បន្នសិប្បកម្មអាចនាំចេញដោយផ្ទាល់បោះលក់តាមផ្សារទំនើបៗដូចជាផ្សារម៉ាក្រូ ដោយមានការវិចខ្ចប់តាមបច្ចេកទេសត្រឹមត្រូវ និងប្រកបដោយស្តង់ដារអនាម័យខ្ពស់។

នៅសហគមន៍ពាមក្រសោបដែលជាតំបន់អភិរក្សព្រៃកោងកាង អំណោយផលសម្រាប់ការចិញ្ចឹមគ្រំចំពុះទា។ ខណៈការចិញ្ចឹមគ្រំចំពុះទាក្នុងមួយឆ្នាំប្រមូលផលបានតែម្តង ហើយគិតតែក្នុងសហគមន៍ពាមក្រសោប ដែលជាតំបន់ចិញ្ចឹមគ្រំចំពុះទាធំបំផុតមួយក្នុងប្រទេសកម្ពុជា នៅក្នុងមួយរដូវកាលអាចប្រមូលផលសរុបបានពី ២ ពាន់តោន ទៅ ៣ ពាន់តោន។

ក្នុងសហគមន៍ពាមក្រសោបដែលមានពលរដ្ឋជាង ៣០០ គ្រួសារ ហើយជាង ៥០ ភាគរយ ប្រកបរបរចិញ្ចឹមគ្រំចំពុះទា ខណៈបច្ចុប្បន្នការផលិតលើសពីតម្រូវការផ្គត់ផ្គង់ក្នុងស្រុក។

លោក វង្ស តារា បានឲ្យដឹងថា ក្នុងមួយថ្ងៃសហគ្រាសរបស់លោក អាចកែច្នៃផ្គត់ផ្គង់ទីផ្សារបានជាង ១ តោន។ ដោយសារការផលិតតាមស្តង់ដារបច្ចេកទេសមានទំនុកចិត្តពីអតិថិជន ដែលនាំឲ្យការបញ្ជាទិញមានការកើនឡើង។ បច្ចុប្បន្នសិប្បកម្មរបស់លោកអាចផ្គត់ផ្គង់ទីផ្សារក្នុងស្រុកកើនឡើងពី ៥ ភាគរយដល់ ២០ ភាគរយ។

ក្រោយមានការជួយគាំទ្រទាំងបច្ចេកទេស និងសម្ភារបរិក្ខាពីគម្រោងគាំទ្រសហគ្រាសធុនតូចនិងមធ្យមពីអង្គការ UNIDO សិប្បកម្មកែច្នៃគ្រំចំពុះទារបស់លោក វង្ស តារា បានដំណើរការល្អប្រសើរជាងមុន ហើយការលក់ក៏កើនច្រើនជាងមុន។

ដោយឆ្លងកាត់វគ្គបណ្ដុះបណ្ដាល និងមានការស្វែងយល់បានច្រើនជាងមុន លោក វង្ស តារា បានអះអាងថា ដើម្បីចិញ្ចឹមគ្រំចំពុះទាឲ្យបានទិន្នផលល្អត្រូវសិក្សាពីចរន្តទឹកហូរ និងត្រូវអនុវត្តតាមបច្ចេកទេសឲ្យបានត្រឹមត្រូវទើបទទួលបានផល។

ជាសហគ្រាសដែលទទួលបានវិញ្ញាបនបត្របញ្ជាក់ពីសុវត្ថិភាពចំណីអាហារ CQS លោក វង្ស តារា ចង់ពង្រីកសមត្ថភាពផលិតកម្ម ដើម្បីអាចឈាននាំទៅលក់ដល់ទីផ្សារក្រៅប្រទេស។ យ៉ាងណាមិញដើម្បីសម្រេចគោលដៅនេះ លោកវង្ស តារា បានអះអាងថា ត្រូវការការគាំទ្របន្ថែមពីដៃគូពាក់ព័ន្ធទាំងបច្ចេកទេស មធ្យោបាយរួមទាំងការគាំទ្រផ្នែកហិរញ្ញវត្ថុ។

លោក Bryan Fornari ប្រធានកិច្ចសហប្រតិបត្តិការនៃប្រតិភូសហភាពអឺរ៉ុប ដែលផ្តល់ថវិកាគាំទ្រគម្រោងអភិវឌ្ឍជលផលក្រោយប្រមូលផលតាមរយៈអង្គការ UNIDO បានបញ្ជាក់ថា ការជួយគាំទាំងផ្នែកបច្ចេកទេស និងការវិនិយោគលើសម្ភារបរិក្ខារបានជួយបន្ថែមតម្លៃលើផលិតផលជលផលរបស់កម្ពុជា។

ដូចសិប្បកម្មលោក វង្ស តារា ដែលចិញ្ចឹមគ្រំចំពុះទាអស់រយៈពេលជាច្រើនឆ្នាំនេះ ដោយសារមានការជួយគាំទ្រទាំងបច្ចេកទេស និងសម្ភារៈផ្សេងទៀត ជួយឲ្យអាជីវកម្មរីកលូតលាស់ បង្កើនប្រាក់ចំណូល និងបង្កើតការងារសម្រាប់សហគមន៍តាមមូលដ្ឋានបន្ថែមទៀត។

លោកបន្តថា ក្នុងដំណើរទស្សនកិច្ចសិក្សានេះ មានការលើកឡើងច្រើនពាក់ព័ន្ធស្តង់ដារគុណភាព និយាយរួមអំពីគុណភាពផលិតផល។ ការលើកឡើងរបស់សហគ្រាសលោក វង្ស ដារ៉ា បានគិតគូរយ៉ាងយកចិត្តទុកដាក់ធ្វើយ៉ាងណាឲ្យផលិតផលមានគុណភាពនិងសុវត្ថិភាព តាមរយៈការបំពាក់បច្ចេកវិទ្យា សម្ភារៈបរិក្ខារទំនើប ការអនុវត្តតាមស្តង់ដារ ដែលកត្តាទាំងនេះនាំឲ្យអាជីវកម្មរីកចម្រើន។

ក្នុងនាមសហភាពអឺរ៉ុប លោក លោក Bryan Fornari រីករាយក្នុងការបន្តគាំទ្រនិងសហការ ក្នុងការការជួយលើកកម្ពស់ការងារកែច្នៃ និងការគាំទ្រទៅលើផ្នែកផ្សេងទៀត បូកទាំងបច្ចេកទេស ការកែច្នៃ និងការបន្ថែមតម្លៃលើផលិតផលសម្រាប់សហគ្រាសជលផកកម្ពុជា សម្រាប់បន្តរីកចម្រើនទៅមុខទៀត។

លោកថា ការគាំទ្រកន្លងមកបង្ហាញជោគជ័យ ដោយលោកលើកឡើងពីការនាំចេញម្រេច និងស្វាយចន្ទីទៅទីផ្សារប្រទេសនៅសហភាពអឺរ៉ុប។ សម្រាប់ការនាំផលិតផលជលផលកម្ពុជាទៅប្រទេសនៅសហភាពអឺរ៉ុប លោកលើកឡើងថា ត្រូវការពេលយូរបន្តិចទៀត តែលោកសង្ឃឹមដោយសុទិដ្ឋនិយមថាតាមរយៈការប្រឹងប្រែងទាំងអស់នេះនឹងនាំផលជាវិជ្ជមាននៅពេលឆាប់ៗខាងមុខ៕