ខេត្តមួយទៀត ទុកពេល១៥ថ្ងៃឱ្យរុះរើស្លាក​ផ្សាយ​ពាណិជ្ជកម្មគ្រឿងស្រវឹងនៅទីសាធារណៈ

ដើម្បីមានសណ្តាប់ធ្នាប់របៀបរៀបរយល្អ និងចូលរួមកាត់បន្ថយការសេពគ្រឿងស្រវឹង ការកាត់បន្ថយអំពើហិង្សាព្រមទាំងការកាត់បន្ថយគ្រោះថ្នាក់ផ្សេងៗបណ្តាលមកពីគ្រឿងស្រវឹង ជាពិសេសដើម្បីរួមចំណែកលើកកម្ពស់សេចក្ដីថ្លៃថ្នូរ និងរក្សាបានសោភណភាពក្នុងភូមិសាស្ត្រខេត្តក្រចេះ អាជ្ញាធរបានណែនាំឱ្យម្ចាស់អាជីវកម្មនានារុះរើស្លាកសញ្ញាផ្សាយពាណិជ្ជកម្មគ្រឿងស្រវឹងនៅតាមទីសាធារណៈ។

វិធានការនេះ ដោយសារកន្លងមកអាជ្ញាធរខេត្តក្រចេះ បានសង្កេតឃើញថា មានការដំឡើងផ្ទាំងប៉ាណូផ្សព្វផ្សាយពាណិជ្ជកម្មគ្រឿងស្រវឹងគ្រប់ប្រភេទតាមបណ្តោយផ្លូវ និងចិញ្ចើមផ្លូវសាធារណៈនានាដែលធ្វើឱ្យបាត់បង់នូវសោភណភាព របៀបរៀបរយ និងសណ្ដាប់ធ្នាប់សាធារណៈក្នុងភូមិសាស្ត្រនៅខេត្តនេះ។
នេះបើយោងតាមសេចក្តីជូនដំណឹងរបស់រដ្ឋបាលស្រុកសំបូរ រដ្ឋបាលស្រុកឆ្លូង និងរដ្ឋបាលក្រុងក្រចេះ នៃខេត្តក្រចេះ ដាច់ដោយឡែកពីគ្នា ប៉ុន្តែមានខ្លឹមសារស្រដៀងគ្នា។

ក្នុងសេចក្តីជូនដំណឹងរដ្ឋបាលក្រុងក្រចេះ ចុះថ្ងៃទី​ ១៦ ខែកក្កដា បានស្នើដល់ម្ចាស់អាជីវកម្ម ក្រុមហ៊ុនចែកចាយស្រាបៀរ និងគ្រឿងស្រវឹងទាំងអស់ដែលបានដាក់តាំងប៉ាណូផ្សព្វផ្សាយនៅតាមដងផ្លូវ និងលើចិញ្ចើមផ្លូវសាធារណៈ ត្រូវធ្វើការរុះរើចេញជាបន្ទាន់ក្នុងរយៈពេល ១៥ថ្ងៃ គិតចាប់ពីថ្ងៃជូនដំណឹងនេះ។ ប្រភពដែលបន្តថា ចំពោះក្រុមហ៊ុនស្រាបៀរ​គ្រប់ប្រភេទដែលមានលិខិតអនុញ្ញាតត្រូវរុះរើចេញពេលផុតសុពលភាព។

រដ្ឋបាលក្រុងនេះសង្កត់ធ្ងន់ថា៖«ក្នុងករណីផុតកាលបរិច្ឆេទកំណត់ខាងលើ គ្រប់ម្ចាស់អាជីវកម្មក្រុមហ៊ុនចែកចាយស្រាបៀរ និងគ្រឿងស្រវឹងទាំងអស់ពុំព្រមធ្វើការរុះរើ រដ្ឋបាលក្រុងក្រចេះនឹងចាត់វិធានការតាមនីតិវិធីរដ្ឋបាលធ្វើការរុះរើដោយមិនទទួលខុសត្រូវរាល់ការខូចខាត និងបាត់បង់សម្ភារទាំងនោះឡើយ។ រីឯការចំណាយផ្សេងៗជាបន្ទុករបស់ម្ចាស់អាជីវកម្ម ឬក្រុមហ៊ុន»។

ចំណែករដ្ឋបាលស្រុកសំបូរវិញ ក៏បានហាមឃាត់នូវការលក់គ្រឿងស្រវឹងគ្រប់ប្រភេទ ជូនអនីតិជនអាយុក្រោម ១៨ ឆ្នាំ និងមិនអនុញ្ញាតឱ្យអនីតិជនអាយុក្រោម ១៨ឆ្នាំ ទិញដូរ ស្រាបៀរគ្រឿងស្រវឹងគ្រប់រូបភាពក្នុងភូមិសាស្រ្តស្រុកឡើយ។

គួររំឭកថា នាយករដ្ឋមន្រ្តី សម្តេចធិបតី ហ៊ុន ម៉ាណែត កាលពីខែកុម្ភៈ ឆ្នាំ ២០២៤ បានបញ្ជាឱ្យអាជ្ញាធរ​ពាក់ព័ន្ធនានាពិនិត្យមើលឡើងវិញអំពីការផ្សព្វ​ផ្សាយ​ពាណិជ្ជកម្មគ្រឿងស្រវឹង ជាពិសេសការផ្សព្វផ្សាយនៅលើផ្ទាំងប៉ាណូតាមទីសាធារណៈ ដោយត្រូវកម្រិតឱ្យបានសមរម្យ ដើម្បីរួមចំណែកក្នុងការកាត់បន្ថយគ្រោះថ្នាក់ចរាចរណ៍ដែលបង្កឡើងដោយ​សារ​ការបើកបរក្រោមឥទ្ធិពលគ្រឿងស្រវឹង។

បន្ថែមពីនេះ លោក ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ កាលពីខែកក្កដា ឆ្នាំ២០២៤ បានដាក់គោលការណ៍ឱ្យរដ្ឋបាលខេត្តទាំងអស់ពិនិត្យសើរើឡើងវិញរាល់ឯកសារព្រមព្រៀងជាមួយក្រុមហ៊ុនផលិតគ្រឿងស្រវឹងដើម្បីឈានទៅបញ្ចប់រាល់ការផ្សព្វផ្សាយផលិតផលគ្រឿងស្រវឹងតាមដងផ្លូវ និងទីសាធារណៈ។
ក្រោយការណែនាំនេះ​ សង្កេតឃើញថា អាជ្ញាធរខេត្តមួយចំនួនបានអនុវត្តរុះរើស្លាកផ្សាយពាណិជ្ជកម្មគ្រឿងស្រវឹងក្នុងភូមិសាស្រ្តខេត្តរួមមាន ខេត្តកំពង់ស្ពឺ តាកែវ និងខេត្តបាត់ដំបង ជាដើម។

ជុំវិញបញ្ហានេះ រដ្ឋាភិបាលកម្ពុជា ក៏បានបង្កើតក្រុមការងារ​គ្រប់គ្រង​ការផ្សាយពាណិជ្ជកម្ម​ផលិតផល​គ្រឿង​ស្រវឹងមកពីក្រសួងព័ត៌មាន ក្រសួងសុខាភិបាល និងក្រសួងពាណិជ្ជកម្ម ដើម្បី​ជំរុញ និង​លើកកម្ពស់​សុខុមាលភាព​សណ្តាប់ធ្នាប់​សាធារណៈ​ឱ្យ​កាន់តែ​ល្អប្រសើរ តាមរយៈ​ការគ្រប់គ្រង​ការ​ផ្សព្វផ្សាយ​ផលិតផល​គ្រឿង​ស្រវឹង​ឱ្យមាន​សណ្តាប់ធ្នាប់​ល្អ​៕

អត្ថបទ៖ ឡាយ សាមាន